【球探報告】邊個話車仔中場無節拍機　16歲青訓屈臣仔上位機會嚟

16歲學徒　已經行到一隊門口

先做返基本人物簡介。屈臣2010年1月出生，最初喺水晶宮接受青訓，到U15階段先轉投車路士。上季仍然只有15歲，已經成為U18常規成員，協助球隊贏得U18英超南區同全國總冠軍，亦有出戰青年足總盃同青年歐聯。之後再跳上U21，並且代表英格蘭U16上陣。

佢老豆就係前英超中場Ben Watson，亦即2013年足總盃決賽補時頂入曼城，幫韋根爆冷捧盃嗰位。老豆有一球可以食足成世，個仔就仲要由零開始。不過單睇屈臣過去一年嘅上位速度，車路士內部顯然當佢係重點培育對象。

我估有唔少巴打都睇過季前首戰西悉尼流浪者。阿朗素安排屈臣同艾素高拍住踢中場，佢唔止正選，更加係全隊唯一踢足90分鐘嘅球員。之後對熱刺、AC米蘭同柔佛DT，屈臣繼續有得落場，整個季前賽合共踢咗166分鐘。

對一個16歲、連職業合約都未正式簽嘅學徒嚟講，呢個上陣時間點睇都唔似純粹帶埋去旅行見下世面。

如果只係季前賽出過幾場，咁仲可以話阿朗素純粹試人。但季前賽結束之後，車路士正式將31號交俾屈臣；聯賽盃對盧頓，佢更加第一次進入正式比賽後備名單。雖然而家主要戰場仍然係U21，但有需要嘅時候，阿朗素的確已經可以直接將佢抽上一隊。

所以問題唔再係屈臣有無機會，而係機會嚟到嗰陣，佢究竟可以幫手做到啲乜。

尤其係車路士而家最缺嗰部分中場工作，就同佢最擅長嘅嘢有少少關係。

U21已經將中場任務交俾佢

上面咁多廢話，相信睇到呢個位嘅巴打唔多，我哋入正題。咁屈臣究竟係一個咩類型嘅中場？

佢最主要嘅工作，就係做後場第一個出口。

中堅唔知傳去邊，俾佢；
邊路推唔到上去，交返俾佢；
成隊波想由左邊轉去右邊，又係搵佢。

屈臣唔負責衝入禁區入波，亦唔會專門追住對手搶波，而係不斷走去問隊友攞波，再將成隊波送去下一個位置嗰個。

季前首戰對西悉尼流浪者，阿朗素將佢放喺艾素高身邊，兩個人一齊負責中後場接應。返到U21之後，屈臣頭兩場聯賽更加直接踢4-1-4-1最底嗰個，身前放住兩個中場，擺明將第一腳組織交晒俾佢。

兩場U21踢足180分鐘，屈臣合共錄得224次觸球。即係平均每分鐘多過一次掂波，單睇呢個數字，已經知道佢唔係企喺中場等個波經過，而係車路士每次由後場開始組織，幾乎都要經一經佢對腳。

呢224次觸球入面，屈臣完成141次傳送，成功率83.9%。個命中率未算特別靚，因為佢唔係淨係企喺兩個中堅面前玩安全波。兩場波佢嘗試過24次長傳，成功14次，另外創造5次機會，當中包括2次重大機會。角球、罰球甚至十二碼同樣由佢負責，U21基本上連第一腳組織、遠距離派牌同死球都交晒俾佢。

實際踢起上嚟，屈臣最常見嘅做法唔係自己扭過第一個人，而係接波之前已經望定兩邊。對手唔迫，佢就轉身向前送；對手中場壓上嚟，就盡快將個波撥去另一邊。上季U18對西布朗，佢就曾經由較後位置直接送出長傳，搵到禁區內嘅Subuloye完成攻門。

去到今季兩場U21，佢除咗不停喺兩個中堅前面接波，亦連續兩場射入十二碼。尤其對韋斯咸嗰球更加係89分鐘追成4：4，至少證明壓力嚟到嗰陣，佢夠膽行出去接管件事。

不過講到呢度，大家先唔好見到「墮後接波、長傳轉邊、控制節奏」，就即刻幫佢改名做小安素。

兩個人嘅工作有重疊，但做法並唔完全一樣。安素唔只會落後場接波，亦會一路向左half space甚至禁區邊推進，用大量直線傳送同穿透性傳球將個波送到前場。屈臣目前就企得更加固定，比較似一個留喺防線前面嘅傳送中樞，先穩定後場出口，再用長傳同死球製造威脅。

更何況安素面對嘅係英超逼搶，屈臣暫時主要對手仍然係U21。兩個人之間無論傳送速度、視野，定係受壓之下處理複雜局面嘅能力，都仲有一段好撚長嘅距離。

有空位　唔代表已經準備好

咁係咪代表屈臣可以即刻上一隊，坐低安素留低個位？

梗係無咁簡單。

頭先嗰堆數據只係來自兩場U21比賽，對手嘅逼搶速度、身體對抗同閱讀能力，全部都無辦法直接同英超相比。青年軍入面有時間擰頭望兩次、控定再傳嘅波，去到一隊可能半秒之後已經有人撞埋嚟。

兩場波入面，屈臣贏過12次對抗、交出6次攔截、2次截球同11次奪回球權，證明佢唔係完全唔防守。但同時間亦有4次被人直接搶走腳下球，車路士U21兩場更加合共失咗6球。

失波當然唔可以全部屈落一個16歲防中身上，但當屈臣被擺喺單防中，身後同身邊嘅空間點樣處理，佢面對高壓時可唔可以保持冷靜，暫時都仲係問號。

呢個先係佢上一隊最大嘅難題。

屈臣最有吸引力嘅地方，係佢敢接波，而且唔會每次都揀最安全嗰腳。但同一種踢法，亦代表佢好容易喺危險位置交失、判斷錯方向，甚至直接累到球隊失波。青年軍可以俾你下一次再試，英超未必有咁好耐性。

所以節拍機席位出現真空，對屈臣嚟講的確係機會，甚至可能令原本要行兩三年嘅路突然縮短。但縮短條路，唔等於可以飛過中間所有級數。

現階段最合理嘅安排，仍然係俾佢繼續喺U21大量正選，習慣成為對手針對同逼搶嘅對象；一隊有適合場合，就放入後備名單，或者喺比賽形勢許可下俾少量時間。真係要落場，身邊最好亦有卡些度、占士呢類球員幫手執第二點，而唔係一開始就叫佢單獨坐鎮中場。

車路士而家需要一個新出口，屈臣的確有值得期待嘅條件。但如果因為見到少少幼苗，就即刻當佢係可以收割嘅農作物，最後踩死佢嘅可能反而係我哋自己。

總結：想睇佢升Lv　就要預咗交學費

老實講，對於青訓球員，我嘅感想永遠都係嗰啲。

俾得佢上場，就要預咗交學費。

屈臣唔成熟係肯定嘅事。俾人迫會荒張、傳錯波會失控、企錯位置會漏人，甚至可能直接累到球隊失波。呢啲唔係「有可能發生」嘅意外，而係一個16歲球員成長期間幾乎一定會出現嘅過程。

問題從來唔係佢會唔會犯錯，而係車路士願意俾佢犯幾多次錯。

青訓球員要上場時間做陽光，要球會嘅耐性做土壤，至於交失波、輸對抗甚至累球隊失波，大概就係成長途中避唔到嘅肥料。無人會鍾意聞，但你又唔可以一邊嫌棄啲肥料臭，一邊問點解棵樹永遠都長唔大。

屈臣有無能力成為車路士未來嘅中場節拍機，今時今日根本無人答到。兩場U21數據、166分鐘季前賽，同阿朗素幾句讚賞，都只可以證明佢值得得到機會，唔可以證明佢最後一定成功。

但如果車路士只肯等佢成熟之後先俾陽光，最後見到收成嘅地方，好可能又係第二間球會。