關於車迷狗up天地

車迷狗up天地最初係一個車路士球迷寫文、同其他車迷吹水嘅地方。寫下寫下，題目由一場波、一單轉會，慢慢去到戰術、數據、球會管理、足球財政，以至成個球壇值得拗餐飽嘅問題。

個名有「車迷」，因為我睇足球嘅起點同立場一直都係車路士；但呢度唔會只寫車仔，更加唔會因為係自己人就自動護航。車路士踢得差會照鬧，對手做得好亦會照讚。球迷身份唔代表要扮盲，反而令每個判斷都有一個講得清楚嘅出發點。

呢度亦唔係新聞網。我無打算同記者鬥快，或者COPY英文網叫AI譯完就放出嚟。比起「發生咗咩」，我更有興趣追問「點解會發生」、「數據究竟支持邊一邊」，同「之後可能會帶嚟咩影響」。有時係一篇戰術覆盤，有時係球員報告，有時會由一單笑料一路挖到球會制度同利益結構。

文章會有立場，語氣亦未必斯文。可以抽水、可以賤嘴，間中甚至會情緒激動；但笑話只係幫手講清楚件事，唔會當成證據。事實、報道、數據同作者判斷會盡量分開，唔肯定嘅地方會講唔肯定，寫錯亦會更正。

新站係公開文章同搜尋嘅入口，等內容可以被搜尋、被分享，同畀新讀者撞入嚟；網站會有廣告，收入用嚟幫補營運同內容製作。Substack就係另一個選擇：新文通知、無廣告閱讀、優先閱讀、會員限定內容同文章留言，都喺嗰邊。付費會員大概一杯咖啡嘅價錢，亦係用最直接嘅方式支持我繼續花時間搵資料、睇比賽、跑數據，同寫啲未必最呃流量但值得寫嘅題目。

簡單講，呢度係一個車迷寫畀球迷睇嘅廣東話足球專欄網站。把口未必會收，但唔會放流料；由車路士出發，但唔會停喺車路士。

點解叫「狗up天地」

「狗up」本身係一種自嘲。足球評論永遠有主觀、有估錯，今日講到斬釘截鐵，聽日可能就被球場打面。所以個名先提醒自己：可以有立場，但唔好扮上帝；可以講笑，但落到事實同數據就要認真。至於「天地」，純粹係因為當初改名諗唔撚到，而家睇返都有少少老尷………

作者

一個長期睇車路士、鍾意拆戰術、查資料同跑數據嘅香港球迷。唔係球會內部人士，亦唔扮專業記者；優勢係肯花時間將散落嘅資料砌返埋一齊，再用廣東話講到正常球迷都睇得明。

編輯原則

觀點與事實分開

報道、官方資料、比賽事件同統計數字會盡量交代來源；作者推論同球迷判斷則會清楚表達為分析或意見。文章有立場，但唔會將立場扮成事實。

數據來源

數據會按題目採用官方紀錄、可信媒體同常用足球數據平台。不同平台定義可能有差異，重要比較會盡量使用同一來源；如差異足以影響結論，文中會另作說明。

更正政策

如果文章出現影響理解嘅資料、數字或引述錯誤，我會盡快修正，並視乎嚴重程度加上更新說明。純粹改錯字、排版或不影響原意嘅句子，未必逐項記錄。

發現錯誤、想補充資料，或者有其他查詢，可以去聯絡頁。