【車迷觀點】摩納哥一晚玩爛兩單Deal　球員轉會到底點先算完成？

兩張支票，摩納哥只想收一張

講咩步驟都好，一切都要由摩納哥單鬧劇開始，嗯，呢度係新寫嘅。

死線日朝早，愛華頓同摩納哥已經就巴洛根轉會達成協議，價錢大約£40m。巴洛根中午已經抵達默西塞德郡，準備接受體檢同完成最後手續。去到呢一步，正常記者用字應該已經由「談判中」升級做「接近加盟」，成件事睇落無乜懸念。

問題出喺體檢。

根據Sky Sports同Guardian報道，巴洛根體檢期間出現問題，令愛華頓開始懷疑應唔應該按原有條件完成交易。

呢種情況唔算少見。薛耶治2023年轉投艾納斯時，體檢亦據報發現膝部疑慮，令對方重新考慮交易條款，最終成單Deal告吹。

今次愛華頓同樣無立即退出，而係一邊同摩納哥重新談判，一邊詢問其他前鋒嘅可能性，開始搵後備方案。

傳聞話摩納哥FFP差大約50M先過關，巴洛根單Deal突然踩Brake，原本唔想賣Camara嘅摩納哥就突然轉軚。

車路士早前已經出過約£38.1m，但摩納哥拒絕報價，仲一副「我無需要賣人」嘅態度。到巴洛根體檢出事，摩納哥擔心死線前無法完成原定出售，Camara個價就突然由高不可攀變成有偈傾。

車路士將報價提高至約£47m，兩間球會迅速達成協議；Camara亦同意一份六年合約，附帶延長一年選項，球會開始安排體檢同處理文件。

幾個鐘之前仲話唔賣，幾個鐘之後連Written Agreement都準備好。Deadline Day嘅供求關係，變得仲快過安素面色。

如果故事去到呢度，摩納哥其實仍然企喺一個幾舒服嘅位置。巴洛根賣唔成，就收車路士£47m放Camara；Camara交易失敗，就繼續搶救巴洛根。手上兩張支票，點計都應該收到其中一張。

偏偏摩納哥唔係咁玩。

愛華頓其後同摩納哥重新傾好巴洛根嘅付款結構。原本體檢帶來嘅風險，就由降低首期金額、增加浮動條款等方式處理。愛華頓重新對交易有信心，並趕及喺死線前提交Deal Sheet。

摩納哥一見巴洛根單Deal好似復活，就立即通知車路士取消交易，直接推翻較早前達成嘅Camara書面協議。既然已經可以賣巴洛根，佢哋就唔想再放走Camara。

唔知，仲以為佢哋喺旋轉拍賣賣嘢。

車路士方面形容摩納哥嘅處理手法「極不專業」，但嬲都無用，轉會窗唔會為車路士重新打開。摩納哥拒絕為Camara交易簽署Deal Sheet，英國時間晚上11點一到，車路士就算想繼續完成交易都無路可走。

然後戲肉先正式開始。

午夜過後，巴洛根突然改變主意，決定唔加盟愛華頓。愛華頓同摩納哥重新傾好價錢，Deal Sheet亦交咗，最後因為球員本人唔肯完成轉會而正式Collapse。

兩單交易，一單有Written Agreement但無Deal Sheet；另一單交埋Deal Sheet，最後仍然失敗。

但講到呢度，又會出現另一個問題：Camara單Deal唔係已經Written、Agreed、Signed咩？聽落同簽晒約差唔多，點解摩納哥仲有得反口？

Written、Agreed、Signed，點解仲可以反口？

呢度就係我本身準備咗嘅內容。好多用語，如果覺得難入口我都無辦法，規則本身就係咁鬼複雜。

首先要釐清一件事。球會所謂「買入一名球員」，法律上唔係俾錢買起一個人，而係向原有球會取得佢嘅註冊權，同時同球員簽訂一份新僱傭合約。

所以一單最基本嘅球員轉會，至少涉及三方同兩份主要協議。

第一份係買賣球會之間嘅Transfer Agreement。內容唔止得一個轉會價錢，仲包括固定轉會費、浮動Bonus、付款期數、二次轉售分成，以至咩情況下先需要支付附加金額。基本上就係我哋打FM時候嘅交易畫面。

同樣係£47m，可以係大部分金額固定支付，亦可以有一大截綁住上陣次數或者球會成績。Headline睇落一樣，實際價值同風險可以完全唔同。

第二份就係買方同球員之間嘅Personal Terms，包括人工、合約年期、簽字費、各種Bonus同Agent佣金。

呢條線通常會同球會談判同步進行，所以先會成日出現「球員已經開綠燈」、「Personal Terms唔成問題」，但兩間球會連正式報價都未傾掂嘅情況。

球員同新球會傾好，唔代表原有球會肯賣；兩間球會傾好價錢，亦唔代表球員一定肯走。兩份協議缺一不可。

問題係，轉會記者口中嘅「Agreement」，其實無統一定義。

Verbal Agreement可以係雙方口頭答應主要條件；Written Agreement可以係電郵確認價錢，亦可以係交換咗正式文件；再行前一步，先可能係由兩間球會授權人士簽署完整Transfer Agreement。

新聞Headline睇落都係「達成協議」，但實際約束力可以差好遠。

Camara單Deal就正正卡喺呢個灰色地帶。

Ornstein報道，車路士方面聲稱兩會已有Full Written Agreement；Guardian同樣確認雙方存在書面協議；Sky Sports收到嘅版本更加直接，形容成件事已經「Written、Agreed、Signed」。但另一邊廂，亦有報道將相關文件形容為Written Email Agreement，而摩納哥最後仍然拒絕簽署英超Deal Sheet。

即使文件有齊雙方簽名，入面仍然可以寫明交易Subject to Medical、Subject to Contract或者Subject to League Approval。我哋無睇過相關文件，自然無法判斷摩納哥係咪法律上違約，只能確認佢哋推翻咗較早前同車路士達成嘅書面協議。

「極不專業」唔自動等於「法律上違約」。要判斷車路士有無索償空間，關鍵唔係記者有無寫Written Agreement，而係份文件究竟由邊個簽、幾時正式生效，同埋有無保留退出條件。

Camara單Deal證明咗，書面協議可以將交易推到好接近終點，但仍然有位置可以拉死成單Deal。

Deal Sheet……咁又係咩？

Deal Sheet呢個名聽落好似好勁，彷彿球會一交上去，球員就已經自動著住新波衫企喺訓練場，剩低嘅只係等攝影師幫佢影相。

根據英超官方解釋，當兩間球會喺轉會窗最後一刻先達成協議，未必有足夠時間將所有合約同註冊文件完整提交。Deal Sheet就係用嚟通知英超，確認兩會已經完成談判，申請額外時間處理餘下文書工作。

以今次英國時間晚上11點閂窗為例，Deal Sheet只可以喺最後兩小時，即夜晚9點至11點期間使用，而且一定要喺轉會窗關閉前提交。英超收到之後，球會可以獲得額外兩小時，最遲凌晨1點交齊其餘文件。

留意返，Deal Sheet延長嘅只係文書時間，唔係談判時間。

兩間球會唔可以11點交張紙，凌晨12點半先繼續拗首期同Bonus；提交Deal Sheet嘅前提，係雙方已經傾妥主要條件，只係趕唔切交齊正式文件。

所以摩納哥拒絕為Camara簽Deal Sheet，效果相當直接。無論較早前嗰份Written Agreement去到咩程度，只要摩納哥唔願意向英超確認交易已經達成，晚上11點一過，車路士就無法使用額外時間補交文件。

相反，愛華頓成功為巴洛根提交Deal Sheet，證明愛華頓同摩納哥已經重新傾好交易結構，亦獲得時間繼續處理正式合約同註冊程序。

但Deal Sheet只證明兩間球會傾掂，唔會代替球員本人簽約，更加唔會強迫球員加盟。

公開報道無講清楚巴洛根最後仲有邊份文件未簽，亦唔知道佢改變主意嗰刻，交易喺法律上準確去到邊一步。我哋可以確認嘅只有：Deal Sheet提交後，交易仍然未完成到足以阻止巴洛根退出。

巴洛根由摩納哥轉投愛華頓仲屬於國際轉會，除咗英超Deal Sheet，亦要符合FIFA Transfer Matching System，簡稱TMS嘅要求。

買賣雙方要各自在TMS輸入交易資料，兩邊內容成功Match，相關足總先可以處理國際轉會證明，將球員註冊由法國轉移到英格蘭。

英超Deal Sheet可以將部分文件限期延長至凌晨1點，但國際轉會仍然要遵守FIFA TMS午夜死線。即係球會同時間面對兩條線：一條屬於英超，一條屬於FIFA。交咗Deal Sheet，只係避免其中一條線即時殺死交易。

等到合約、國際轉會證明同其他文件全部提交，英超同足總仲要檢查內容。全部獲得批准，球員先算正式註冊。

咁講咗咁耐，你老母咁部Fax機呢？

英超官方確認，傳統Fax機其實已經退休。球會而家可以使用Desktop Fax，亦可以將掃描文件透過電郵提交。

換句話講，應該唔會再有職員企喺部實體Fax機隔籬，睇住張紙慢慢捲入去，但「Fax」作為一種傳送方式仍然未完全消失。

現代轉會真正容易出事嘅位，通常唔係Jam紙，而係文件未簽齊、雙方資料唔一致、體檢出現問題、TMS未能Match，或者其中一方去到最後一刻改變主意。

科技進步咗，人類派膠嘅能力依舊無變。

感想：車路士錯在太遲，摩納哥錯在太自信

講返安素轉會，我又唔覺得車路士決定收錢本身有咩問題。

球會早前將價錢定喺£120m，最終曼城支付總值£125m嘅Package。至少按目前公開數字，車路士無因為去到Deadline Day就突然腳軟減價，甚至比原本底線再高£5m。

安素本人想走，曼城又願意支付追平英國紀錄嘅價錢，單純由足球同資產管理角度睇，球會接受交易完全講得通。

真正有問題嘅從來唔係賣，而係幾時先賣。

車路士當初設定8月14日死線，最大目的理論上就係避免成件事拖到轉會窗最後一刻，令球會無時間搵替代者。結果曼城過咗死線先正式出手，車路士仍然接受報價，仲要去到最後一日先搶Camara。

咁條死線喺價錢上可能無被推翻，但喺陣容規劃上已經失去原本作用。

Camara交易告吹後，車路士據報仍然可以取消安素轉會，但球會最後選擇遵守同曼城及球員之間嘅承諾。商業信譽上，呢個決定值得肯定；但安素走咗、替代者又無到，所產生嘅陣容風險，一樣係車路士自己選擇承擔。

£125m賣安素或者無錯。錯就錯在拖到最後一日先放人，將補充中場嘅命運交咗俾摩納哥。

至於摩納哥，選擇賣巴洛根、保留Camara，其實亦唔係咩離譜決定。

一邊係25歲、體檢出現問題嘅前鋒，另一邊係22歲、仍然有升值空間嘅主力中場。如果兩單交易都可以穩定完成，收愛華頓£40m再留下Camara，長線價值確實可能高過直接收車路士£47m。

摩納哥唔係錯在揀巴洛根，而係錯在以為自己已經有得揀。

巴洛根單Deal明明因為體檢出現過問題，球員亦未正式完成註冊；摩納哥卻因為愛華頓重新傾好付款結構、提交咗Deal Sheet，就當第二張支票已經成功過數。為咗保留Camara，佢哋推翻書面協議，親手封死車路士條路。

「其實我知道你呢，對自己好有信心。問題係邊度你知唔知呀？就係對自己太有信心。」

大概就係咁。