【死因研究】沙比上任後史超活離職 總監要執位車迷開香檳？
終於輪到體育總監落鑊，有請小鳯姐，另外香檳唔該開定先。
英國嗰邊多個消息報道，車路士共同體育總監史超活準備離隊。繼Vivell之後，BlueCo足球領導層再有人走。
見到史超活準備離開車仔嘅消息，我第一個反應係開心。諗返佢加盟嗰陣，其實我真係期待過。你諗下佢：摩納哥、Red Bull、球探、數據，幾個字擺埋一齊，好j到呢……車仔唔通終於識得喺人哋成名前搵到寶，自己養出個麥總級數嘅怪物？
我知，麥總唔係佢發掘嘅。但當時見到摩納哥個招牌，個腦就係會自己加戲。然而期待越大，史超活老母就越辛苦，呢幾年應該都幾忙。
教練換完一個又一個，負責足球方向嘅總監層，又續約又請人，但今次終於都有人離場。報道引述內部人士話係領導團隊嘅「自然演變」，我反而想知，沙比返嚟做Manager之後，原本堆到成枱都係總監嗰套架構，係咪終於發現要執一執？嗯，同時恭喜史超活成為第一個死因研究對象嘅總監。
死因一：負責規劃，疑似交唔到功課
先戴頭盔：我哋作為外人，睇唔到車仔內部評核，足球決策亦由多人共同參與。所以我哋只可以按史超活公開職責檢視成果，反向研究邊啲問題可能削弱佢留任嘅理由。
以前就有講過，史超活主要負責預算規劃、足球理念及數據協作。呢份工嘅成績，就應該體現喺資源有冇對準需要、陣容同領隊有冇接得上，以及分析有冇幫球會作出更好決策。
今年4月，Eghbali親口承認球隊需要增加成熟球員，亦承認領隊穩定性未做好。對負責規劃嘅總監而言，呢兩項都係唔太好聽嘅評語。陣容經驗不足，涉及預算同招聘優先次序；領隊反覆更換，就涉及足球方向同揀人配合。
數據協作同樣值得追問。今次重組特別提到，要令數據更直接融入決策。球會既然需要改善呢條連接，原本負責協作嘅位置，就自然………你明嘅。
幾項需要修正嘅地方，都落喺史超活工作範圍附近。嗱，我唔係有證據話佢做得差，但………側面證明佢負責嘅規劃成果可能未達期望，或者係今次離任值得考慮嘅第一個原因。 車迷見佢走人會開香檳，唔係無原因嘅。
死因二：沙比加盟，重新分配足球決策權
然後，到沙比加盟，Blue Co破天荒主動畀佢Manager職銜，據報包括增加決策權，沙比可以更深入參與建軍。呢個安排直接改變咗領隊喺車仔架構入面嘅位置。
Kinsella亦明確報道，沙比到來引發咗改善陣容及幕後運作嘅討論，佢亦參與引入成熟球員嘅決策。即係球隊需要咩人、點樣建軍，沙比都開始有更大影響力。
史超活原本參與足球理念同規劃，當Manager承擔更多相關工作，總監層就需要重新界定職權。對佢而言，問題係新分工之下，仲有幾多工作需要保留喺自己個位置。
時間線亦配合呢個推論。《Standard》指，5月仍未決定史超活去留，之後幾星期及幾個月，佢嘅職責反而逐步交畀其餘人。
沙比而家有無做得好好我未敢大聲講，但………當你份工開始做交接，唔好話明眼人，連小欣姐都知你有機會走人啦係咪。
死因三：內部有人接手，佢個位變得可以撤走
一個職位要撤走，首先要有人接到工作。今次報道最實在嘅線索，就係Jewell同Shields地位提升，並已經逐步承接史超活嘅職責。
離任之後，日常足球領導會由Winstanley、Jewell同Shields負責，配合沙比及數據團隊，球會亦冇計劃作同職位替補。即係車仔認為，現有班底經過重新分工，可以繼續完成相關工作。
所以第三個可能死因，係Jewell同Shields嘅角色增強，令史超活失去必須獨立保留嘅位置。 沙比加盟帶來改分工嘅動力，內部人員接手就提供咗落實條件。到最後，球會選擇將佢份工拆開，連佢個位都順便一齊撤走。
結尾
老實講，我支持車仔重整體育總監架構。呢幾年總監愈請愈多，個架構愈砌愈臃腫，球迷想知邊個負責邊瓣，都要先做一輪research。既然沙比返嚟做Manager，亦參與轉會同建軍，球會就應該圍繞呢個分工，將決策層執得清楚啲。
今次有人走，個位亦唔補，我覺得係一個好嘅開始。留低嘅人各自負責咩、交咩功課，往後都應該更清晰。
所以見到史超活離任，我係開心嘅。平時感性嗰邊想開香檳，理性嗰邊總會伸隻手出嚟叫我冷靜。今次連理性嗰面都冇叫停，仲好似幫手搵緊開瓶器，你就知我幾撚開心。