車迷觀點

【車迷觀點】C朗宣佈告別國家隊 連自大嘅佢都留唔住嘅歲月

發布於

講起 C 朗,我一直記住一件同入波無關嘅事。

艾夫拿話,有次練完波,C 朗請佢去屋企食飯。到坐埋枱一睇,得雞肉、沙律,同清水。

艾夫拿仲以為後面有其他餸,結果等到 C 朗食完,都係得咁多。跟住,主人家拎埋個波出嚟,叫佢一齊練。

本來諗住去朋友屋企食餐飯,點知原來係控制飲食同加操。

每次諗起呢個故事,我都覺得好笑。換轉係我,下次佢再約,應該會話自己唔得閒。不過,隔咗咁多年,我始終記得呢餐飯。

直到見到 C 朗宣布退出葡萄牙國家隊,平時嫌佢難頂就嫌得多,今次望住個消息,反而停咗一陣。有啲感想,想寫低。


我佩服佢,但應該同佢做唔到朋友

我係 2006 年開始睇車仔。C 朗仲踢曼聯嗰幾年,場上有幾勁,老實講已經無乜具體印象。真正越來越欣賞佢,係後來佢同美斯爭一日之長短嗰段日子。

我一直比較偏向 C 朗。美斯踢波嗰種天才橫溢,睇到會嘩一聲;C 朗吸引我嘅,就係佢對自己嗰種近乎苛刻嘅要求。

當然,C 朗本身都有頂級天賦,美斯亦唔會瞓喺度就變成美斯。只係睇住 C 朗,你會特別感受到,佢有幾認真對待「我要做最好嗰個」呢件事。飲食、訓練、身體管理,連請朋友食飯都離唔開,足球幾乎就係佢嘅全部。

一餐半餐,我都可以食雞肉沙律。長年累月咁維持,我自問做唔到。尤其當你已經贏過咁多嘢、賺到幾世都使唔晒咁多錢,仍然肯繼續要求自己,呢點我真係佩服。

至於做人,佢呈現出嚟嗰種自我中心,同埋凡事都要爭贏嘅性格,我又真係頂唔順。就算佢係普通人,我估都好難同佢做到朋友。

所以我對佢一直都有啲距離。佢某啲言行,我照樣會反白眼。


連佢都去到要告別嘅一日

今次見到佢退出國家隊,最令我感慨嘅,係連一個咁自律嘅人,都去到要告別嘅一日。當然,C 朗有權彈出彈入,幾個月後又宣布復出。

但睇得耐,好容易習慣咗 C 朗仲喺度。每次大賽又見到佢,每次大家覺得佢差唔多,佢又繼續踢落去。慢慢連自己都少咗諗,呢件事始終會有完結嘅一日。

我哋都知道運動員會老,亦睇過好多球員退落嚟。但去到 C 朗身上,嗰份感受會深一啲。因為佢已經係我心目中,最肯為延續球員生涯付出嘅人之一。

佢靠住自律,將職業生涯維持咗咁多年。到最後,佢一樣要逐步同自己熟悉嘅舞台告別。

今次只係國家隊,球會嗰邊仲會繼續。不過,以後再睇葡萄牙,已經要開始習慣無佢。

諗返以前,佢同美斯每季入幾多球、邊個又贏咗、今年邊個勁啲,總有得拗。當時覺得呢啲係睇波嘅日常,過完一季,下季繼續。

而家先慢慢感受到,原來嗰種日常,都有期限。


慶幸睇過絕代雙驕嘅年代

以前睇佢同美斯爭,總會希望自己偏心嗰個贏多啲。去到而家,反而想佢哋踢耐啲。有時見佢哋入波,仲會開心,心諗:得喎,仲有貨喎。

由自己開始睇波,到今日,身邊好多嘢都變咗。佢哋就一直仲喺度,踢得少咗,離我哋平時睇開嘅聯賽遠咗,但間中仍然會有消息,提醒你兩個老鬼仲未踢完。

如今開始要逐個舞台告別,先發覺自己原來想一直睇落去。慶幸我活喺一個有 C 朗同美斯嘅年代。至於邊個勁啲,留返俾大家慢慢拗。

趁仲有得睇嘅日子,我想再睇多幾場。