【車迷觀點】占士又受傷入廠休息三個月　車仔嘅隊長仲有無得救

小手術，點解要抖三個月？

車仔官方確認，占士喺訓練受傷，經過檢查後接受膝部小手術，手術成功，已經開始復康。具體傷患結構同手術內容未有公開；「約三個月」就係BBC同《The Athletic》嘅預計。

見到「minor knee surgery」，再望吓「缺陣三個月」，難免會R晒頭：你老味休息三個月都叫「小」手術？

眾所鳩知，膝頭入面有唔同零件。半月板幫手分散壓力，關節軟骨令骨頭之間活動順暢，韌帶就負責維持穩定。傷咗邊樣、傷到幾深、手術做咗乜，都會影響之後幾時可以負重、跑步同踢波。

以膝關節鏡手術為例，醫生透過細小切口，將鏡頭同工具放入關節處理問題。外面嘅傷口可以好細，入面修補過嘅組織仍然需要時間癒合。美國骨科醫學會亦指出，手術後嘅恢復時間，取決於原本損傷同實際處理內容。

更何況，隊長返工要做嘅嘢，始終比我哋呢班真正文員多幾項。行得、上到樓梯之餘，佢仲要喺高速跑動中急停、轉向，同埋喺對手撞埋嚟嗰陣，繼續用隻腳撐住成個人。

所以所謂嘅「小手術」，仲包括咗傷處癒合、力量恢復，再到承受英超嘅跑動同對抗，每一步都要時間。

以前傷大髀，點解今次輪到膝頭？

講起占士受傷，大家第一個反應通常都係Hamstring。佢條大髀後肌反覆出事，2023年尾仲專登做過手術，點解今次又輪到膝頭？唔通大髀有問題會順便整傷埋個膝頭？

翻查紀錄，占士以前都有傷過膝頭。2022年10月作客AC米蘭受傷，直接令佢錯過卡塔爾世界盃；同年12月復出對般茅，踢到下半場又要退下火線，球會其後確認復康進度唔理想，再缺陣最多一個月。至於2023年尾做手術，處理嘅就係反覆出事嘅腳筋。

不過，車迷懷疑佢腳傷互相拖累，其實都唔難理解：畢竟人跑起上嚟，各部分都要一齊工作。

腿筋係大髀後面一組肌肉，參與屈膝、伸髖，跑步時亦要幫手控制隻腳嘅動作。尤其跑得快嗰陣，隻腳向前擺，腿筋要一邊受力、一邊被拉長，幫手煞住小腿，準備落地。大髀前後、臀部同小腿肌肉，都要配合得上。

試過拗柴嘅巴打，應該記得頭幾日行路會就住就住，另一隻腳做多咗嘢。呢個就係理解「代償」最簡單嘅入口。傷後力量未完全恢復，或者某個角度仍然拉唔開，身體就會調整動作去完成工作。復康要處理埋呢啲變化，先可以令成套動作重新配合。

更麻煩嘅係，反覆受傷會令往後風險增加。2020年一篇涵蓋78項研究嘅綜述發現，有腿筋傷患史嘅運動員，之後出現腿筋傷患嘅相對風險約為無傷患史者嘅2.7倍。呢個結果解釋到，點解占士每次復出，醫療團隊都要繼續小心管理。

仲有無得救？限速之外，仲要練返踩油門

我自己就仍然支持車仔繼續救占士。上季英超上陣時間由1,063分鐘增加到1,963分鐘，對巴塞同阿仙奴亦交出高水平表現，呢啲都係之前復康同管理值得繼續嘅理由。今次再傷，我更加在意嘅係：手術做過、負荷管過、位置改過，點解仍然甩唔開傷患？

因為每項措施處理嘅，都只係佢面對嘅部分問題。

手術可以處理受傷組織；之後仲要練返力量，恢復動作，再適應比賽負荷。轉位置可以減少某類跑動，同時會帶嚟另一套工作。球員每一日嘅恢復、訓練反應同累積疲勞，亦都會改變。醫療團隊要持續調整，無一份計劃可以喺季前寫好，就自動保用到五月。

所以我會認為之前嘅保養有功效，亦值得繼續。上季增加咗嘅上陣時間，就係實際成果。往後要推進嘅，係令佢喺更長時間內持續承受比賽。

七月我用「限速80嘅法拉利」形容占士。今次睇返運動科學資料，個比喻可以再講深一步：想返英超踢波，就要練返點樣踩盡油門。

2023年倫敦腿筋傷患國際共識，將跑步同衝刺列為復康重要部分。早期保護傷處，之後逐步增加負荷，令身體重新適應比賽需要。長時間避開高速跑，去到真正比賽嗰下，準備就會有落差。

對手一腳直線劏穿中場線，占士要即刻轉身追，唔可以舉手同防線講我今日限速80，叫大家自己執生。復康就要練到佢承受得返呢一下。呢個亦係管理最難嘅地方：要控制風險，又要提供足夠訓練，幫身體建立承受能力。

至於轉踢中場，我支持用呢個方法調整佢嘅工作。留喺較深位置接應同轉邊，由隊友前插提供闊度，可以減少沿邊線來回衝刺。中場同樣要迫搶、橫移同回追，沙比就要連埋佢嘅覆蓋範圍一齊安排。重點係占士每場實際要做啲乜，排陣表上個名搬到邊度，只係第一步。

我仲想等一個Reece James Season

七月寫季後分析嗰陣，我俾占士B，因為我仍然覺得佢可以交出更多。睇住佢再受傷，嗰份期待又要推遲，除咗嘆氣，車迷都無咩可以做到。

笑佢返去做文員，笑完其實都係想見佢快啲返球場。佢最吸引我嘅地方，我已經睇過好多次，實在好難就咁放低期待。我仍然想等一個完整嘅Reece James Season。

等到隊長個名出現喺正選名單，大家自然地傾佢今場點踢，連「終於復出」四個字都慳返。對其他球員嚟講只係日常，對占士，呢種日常已經值得等。