車迷觀點

【車迷觀點】肥普過檔曼聯重提舊事 當年落車係咪「炒」得唔抵

發布於

肥普去咗曼聯,然後11月11日佢喺訪問入面講返當年點解落車,話係自己決定走。到呢個位其實無咩問題,點知我去公海碌咗個圈,又見到有人出嚟屌 BlueCo,話當年根本唔應該炒肥普。

我睇到黑人問號。當事人啱啱先講完係自己決定走,點解每碌多兩下,又變返 BlueCo 無啦啦炒人嘅?

然後遠古嘅記憶就開始甦醒……我諗起自己喺開呢個 Facebook Page 之前,喺高登周街貼自己嘅文,同人解釋當年究竟發生咩事。搵返篇舊文出嚟睇,嗰陣已經寫咗,肥普對球會有唔滿意嘅地方,球會亦有啲嘢想改,最後兩邊傾完,算係好嚟好去。

既然今日又有人挖返單嘢出嚟鞭,咁就趁熱重寫一次。攞返當年嘅報道,同肥普而家自己講嘅嘢對返埋,一齊做個回帶撚,再諗下當年究竟係咪真係「炒」得咁唔撚抵。


因為一個死球教練而起嘅爭執

2024 年聯賽盃決賽,踢到加時尾段,雲迪克接應角球頂死咗車仔。車仔對住一隊出晒後生仔嘅利物浦,踢足兩個鐘,最後就係輸呢一球。

對車迷嚟講,呢球係輸咗隻盃;對車路士高層嚟講,呢球係提醒咗佢哋,有樣之前已經覺得要執嘅嘢,係時候落手做。

早喺決賽之前,肥普已經俾人問過,要唔要搵個死球教練返嚟幫手。肥普當時嘅意思好直接:成隊波由我哋教練團負責,死球自然都係我哋自己教。肥普身邊亦有人覺得,車仔守死球咁辛苦,本身就同成隊波唔夠高有關。你買返嚟嗰班人天生頂唔贏,就算早一日搵個死球專員返嚟,都唔會突然幫到班球員生高幾吋。

但球會擺明就唔係咁諗。照 Matt Law 當年嘅報道,車仔由賓福特挖咗 Bernardo Cueva 過嚟,仲要開一個專責部門,長期跟進角球同罰球。肥普嗰陣就講過,新嚟嘅教練嘅工作,應該由肥普自己決定。即係面對同一個死球問題,球會已經喺度度緊獨立部門,肥普仲喺度講緊主教練有權決定點用呢個人。當然,而家死球部門甚至已經唔係一個人,而係4個人……(笑)

而當年 Matt Law 其實仲有寫,根據肥普身邊人講,佢後來係接受咗 Cueva 加入。所以,如果淨係記住「肥普唔鍾意死球教練」,就會漏咗最有趣嘅部份:肥普肯讓步接受 Cueva,咁下次球會再覺得一隊有邊瓣搞唔掂、又想搵另一個專責部門接手嗰陣,到底邊個話事?呢條問題,續約嗰時仲要再傾。


五連勝之後,點解兩邊都肯放手?

當死球問題係各執一詞,由當年想肥普留低嘅車迷角度睇,我完全可以理解。頭大半季睇到想熄機,去到季尾終於見到古古尼亞內收入中場,前面班後生仔開始夾得埋,仲一口氣贏晒最後五場,由中游爬返上第六。你話想睇埋佢有個完整夏天、下季可以教成點,老實講我都係。

但嗰五場波贏完,肥普同車仔自然要開始傾續唔續約同去留問題。按 Matt Law 嘅版本,第一日肥普同老闆加體育總監傾完,大家返去瞓一晚,第二日朝早再坐低。諗多一晚之後結論一樣,朝早十一點半左右握手,同意分開。BBC 當時亦話,肥普原本對留任持開放態度,主要睇傾成點,結果傾完就覺得大家分開係啱嘅。

去到今日,拼圖終於多咗肥普自己親口講嗰半邊。四月嗰時,佢同加利仔做訪問嗰陣講過,當初自己理解嘅球會計劃,同後來實際經歷嘅有出入,佢亦大方承認可能係自己理解錯。講到買人,佢覺得教練團應該有份參與決定,但事實上當然係無Say啦。去到十一月《FourFourTwo》再問,佢就講得仲直接:自己同教練團都覺得同球會做嘢嘅方式夾唔埋,所以唔想繼續落去。

即係話,由頭到尾都唔係球會單方面請人食無情雞,而係兩邊坐低傾完,發現性格不合,理念唔同,嘴形唔啱,先至決定好聚好散。


咁當年係咪真係「炒」得唔撚抵?

你問我嗰陣想唔想睇肥普教多一季?想呀。成季睇到躁底,去到季尾終於有幾場睇完會令你忍唔住諗:喂,下季可能真係有啲嘢睇喎。無諗過球會隔咗兩日就叫你準備認識下一個領隊……嗰種衝擊,同個仔帶女朋友返嚟話結婚,兩日後話分咗手仲即刻識咗個新嘅差唔多。

但如果當時夾硬續落去,死球由邊個管、夏窗買人有無得俾意見、球隊唔順嗰陣邊個決定點改,呢堆問題遲早都會再爆多次。既然季後檢討傾足兩日,兩邊都覺得分開會好啲,我今日睇返,呢個決定好合理。

咁再問 BlueCo 喺呢單嘢有冇做錯?我覺得最值得問嘅,反而要倒帶返去再早一年:你哋請肥普嗰陣,究竟有冇講清楚想佢做一個點樣嘅主教練?

你搵個習慣自己揸主意嘅名帥返嚟帶班後生仔,季尾佢又真係帶到有啲樣;但同一時間,球會又想將一隊入面好多工作拆出嚟,交俾體育總監同自己設立嘅專責部門管。肥普有佢做開嗰套,亦有權覺得咁樣做落去唔啱自己。

佢今日都肯大方認一句,可能係當年自己理解錯;咁當初負責請佢入嚟嗰班高層,係咪都應該問返自己,請人見工嗰陣有冇講清楚份工包啲乜?兩邊有咁多嘢要一齊拍板,偏偏合作咗成季先發現大家對份工嘅理解差咁遠,呢筆帳,先至最值得同 BlueCo 計。


留低算係美好回憶,好聚好散就可以

翻睇返篇舊文,我自己最意外嘅係,隔咗兩年幾,我仲記得季尾嗰五場波睇得有幾開心。嗰陣一路睇,個腦一路開始諗緊下季,仲會自己喺度排陣,計緊邊個傷兵好返之後可以擺邊個位。點知排咗兩日,最先要換走嗰個,原來係領隊。成個暑假,就咁少咗一樣我本來幾期待嘅嘢。至於佢嘅下任……嗯,都去咗 114,就唔提啦。

所以今日再聽返肥普親口講當年點解走,我反而覺得「好嚟好去」呢四個字真係幾貼切。與其夾硬留低大家繼續拗氣,好在佢最後留低俾我哋嘅,係班後生仔終於開始踢得似一隊波嗰幾場。之後我哋每次講起肥普,除咗記得佢當年點樣落車之外,起碼仲有幾場波,係值得開返出嚟重溫嘅。