【球壇風向室】新帥對手觀察區EP2　那個男人同曼城合拍嗎？

一、嗰陣味仲喺度，但閘位唔再係主角

頭三場睇曼城，有啲畫面的確熟口熟面：翼鋒拉闊，前面有人企喺兩條防線之間，後場慢慢搵空位。我原本仲以為，閘位會好似車路士時期咁，經常收入中路幫防中補位。

但睇落又唔係咁簡單。曼城更搶眼嘅一面，係對手仲喺後場處理個波，佢哋已經成隊壓上去，想盡早搶返。當然，睇到球員衝得快，唔等於成隊真係迫得密，呢度可以用PPDA幫手對一對。

頭三場曼城嘅PPDA分別係5.9、5.6同4.6，全部明顯低過對手；高位搶回球權亦有15次、17次同13次。即係呢種「唔俾你舒服出波」嘅感覺，唔單止係睇落熱血，數字亦見到佢哋出手快狠準。

不過，PPDA只係話俾我哋知曼城幾快干擾對手，唔會話俾我哋知閘位企喺邊。呢兩件事要分開睇。就目前五場而言，肉眼見到曼城會有人由後防上前幫忙，但未見到內切閘固定變成第二個防中，成為每場組織嘅必經路線。

對水晶宮一場，當科頓喺中場搶斷就已經見到曼城推得有幾高。

後兩場亦令「曼城場場壓住人迫」呢個講法無咁易成立。對曼聯，曼城PPDA升到8.1，高位搶回只有8次；對新特蘭，PPDA回落到5.6，但雙方高位搶回都係14次。尤其曼聯嗰場有少踢一人嘅情況，無理由拎住全場平均數，就話佢突然唔識迫搶。

所以我而家會咁睇：那個男人仍然想盡早搶回球權，但暫時最鮮明嘅方法係成隊向前搶，唔係叫一隻閘長期收入中場。至於搶返個波之後由邊個將攻勢接上去，曼城嘅安排就同車路士時期更唔一樣。

二、安素行前，安達臣留後

其中一個最容易認出、又最唔同嘅人，係車迷最唔鍾意嘅安素。

喺車仔嗰陣，就算身邊有卡些度，安素仍然要快上快落，幫手接波、運波、補位；換水換燈膽整微波爐都搵佢，忙過我公司班IT同事。去到曼城，佢第三場先開始上陣，但一入隊，已經唔使咁頻密返落去幫手運波。對高雲地利，佢更多時間喺前面接應，單場有6次禁區掂波。單靠呢個數字當然定義唔到佢嘅角色，但配埋場上位置睇，佢終於有多啲時間留喺前面等波。

因為後面有安達臣。

同一場對高雲地利，安達臣完成咗149次傳球、18次前進傳球。曼城有75%控球，個波可以長時間經佢腳下分去兩邊，再由前面幾個人搵空位。安素以前要兼顧嘅部分工作，喺曼城交咗俾安達臣。

但安達臣亦唔係真係一個人企喺中圈捱打。曼城啲中堅會推上嚟接應同補位，魯賓戴亞斯同古希都有能力直接將個波送前。呢個就係曼城人腳強嘅地方：安素可以專心向前，安達臣背後亦有人識得幫佢處理個波同守住位置。

問題係，安達臣要照顧嘅中路範圍始終唔細。一旦曼城失去球權，或者對手避過前面第一輪迫搶，佢同後衛之間點樣交接，就比對住高雲地利長時間控住個波時難考得多。

對新特蘭，曼城雖然入咗五球，但同時失三球，對手更造到3.69 xG。xG提醒我哋，曼城前面行得順，唔代表身後每次都有人執得切。

咁問題就嚟啦：當對手真係令曼城踢唔到自己最舒服嗰套，那個男人會點改？對曼聯同新特蘭，答案開始有啲唔同。

三、場波唔順，佢肯唔肯改？

今季實際上要對曼聯同新特蘭先真正考起那個男人：當比賽唔照住自己想要嘅節奏行，佢會點做？喺車仔就大家都記得，無乜PLAN B，位換位，輸咗就記者會放負……但今時唔同往日，人工高咗，球隊勁咗，頭髮都多咗，成個人醒神晒。

先講曼聯。曼城開波22分鐘就因為科頓領紅牌少踢一人，最後仍然贏1比0。雖然曼聯自己處理得差，致勝球亦有越位爭議。但呢場仍然見到唔少曼城少踢一人之後嘅處理。

佢哋無再死攬住個波控制球權，最後只有45%控球，攻門亦以6比16落後。曼聯嗰16次攻門加埋只有0.82 xG，曼城6次就有1.06 xG。少咗一個人，那個男人接受自己無辦法再照原本方法控制場面，改為先穩守、再突擊，最終真係憑夏蘭特嘅一刀小勝1球。

去到新特蘭，件事又唔同晒。曼城上半場三度入波，但亦兩度被追近，半場踢成3比2。換邊後，佢哋向前搶得更快，PPDA由上半場6.5降到4.9；進攻亦無再只係慢慢將個波運到前面，傳球同走位之間開始接得更快。

尾段嗰球最容易睇到變化。曼城先喺後場傳咗幾腳，古希搵到杜古，杜古即刻劏入去俾加華度爾，後者送到夏蘭特腳下完成入球。成段攻勢有耐性等空位，但空位一出現，最後三腳就直接劏穿新特蘭。

當然，新特蘭同樣製造到5次黃金機會，xG仲以3.69比2.84高過曼城，呢兩點都係唔可以睇少。尤其係曼城每次拉快節奏之後，對手亦有機會反過來打返佢哋。呢場贏波證明那個男人識得調整進攻，三個失球就提醒佢，調整完前面，後面仍然要有人執。

但睇晒五場，我對佢最意外嘅地方，正正係呢種願意改。對曼聯，少踢一人就接受控球少啲；對新特蘭，上半場踢到你一拳我一拳，下半場就嘗試將前場接應同搶波節奏拉快。未必每次都改到滴水不漏，至少佢無企喺場邊等套波自己突然正常返。

同一個人，換咗間公司

老實講，寫之前我心入面都有個幾懶嘅答案：那個男人去到曼城踢得順，咪因為曼城班球員勁囉。

睇完五場，我仍然覺得人腳係重要原因。安達臣可以幫安素孭起後面嘅工作，中堅質素高又識得上前接應，前面一個夏撚已經可以將一次空位即刻變成入球。呢啲條件，的確令佢好多想法更易踢得出嚟。

但功勞唔止球員，高位迫搶有佢嘅安排，安素企得更前有佢嘅用法，對曼聯同新特蘭兩場亦見到佢願意因應比賽改主意。

所以我嘅判斷係：那個男人同曼城目前幾合拍，而且唔止係因為佢終於揸到GTR。 睇落佢知道架車可以點開，遇到路況唔同，亦識轉波扭軚。

但部GTR嚟緊會唔會因為俾阿Sir抄牌而要拆走4個碌………我哋繼續睇落去。