【球壇風向室】曼城115條終於有結果？逐個罪名講吓指控懶人包

115條，其實告緊乜？

話明懶人包，當然係嚟解釋呢個名，今次最核心嘅爭議係一條數：曼城話自己賺到嘅錢，究竟真係自己賺返嚟，定有部分其實係班主俾？

2018年有流出文件報道，曼城部分贊助費表面由贊助商支付，背後資金可能來自班主。曼城果然就當然係否認有關指控。

因為「班主投資球會」同「球會靠贊助賺到收入」，喺財政規則入面唔係同一條數。如果筆錢係班主自己貼出嚟，但當成球會賺返嚟嘅贊助收入，球會喺財政規則下睇落就會比實際更有能力負擔開支。英超控罪中最大一組，就係質疑曼城喺2009/10至2017/18球季提交嘅財務資料，尤其贊助收入、關連方同成本，係咪準確反映實際情況。

另一邊係球會究竟使咗幾多錢請人。英超指控曼城冇喺相關合約完整申報領隊同球員報酬。流出文件其中一個具體例子，係前領隊文仙尼除咗曼城合約，據報仲同班主旗下另一間球會阿爾渣辛拉簽咗顧問合約。

咁呢筆錢到底係另一份獨立工作嘅報酬，定實際上係曼城請領隊嘅成本？球員報酬亦有類似嘅申報指控，但英超公開文件冇逐名列出涉及邊啲球員。

如果球會報上去嘅收入或支出有問題，下一條問題自然係：按嗰盤數去計，仲有冇遵守歐洲足協嘅財政規則，同英超當時嘅PSR？ 呢兩樣各自成為一組控罪。

最後，英超仲指控曼城由2018年12月開始，冇按要求交齊資料及配合調查。呢組唔係追究當年使咗幾多錢，而係追究查案期間球會有冇履行責任。

所以大家成日講嘅「115」，就係將財務資料54項、領隊及球員報酬14項、歐洲足協規則5項、英超PSR 7項，以及配合調查35項加埋嘅總數。

應該清楚易明啦呱？

咁「114項成立」，係咪即刻扣分？

跟住就應該大家都有睇到，《The Athletic》引述知情人士報道，獨立委員會裁定115項入面有114項成立。呢個當然係大消息，但目前未有公開嘅逐項判決理由，連邊一項唔成立都未知。

更重要係，罰則仍未決定。眾所周知，英超規則容許罰款、扣分等唔同處分，但判決從來都唔係話出咗結果就即刻有，所以我唔會喺呢度估佢會唔會降班，而家講話要褫奪曼城過去嘅英超冠軍都係言之尚早。

難聽啲講句，全世界都預咗曼城會上訴；就算委員會公布咗罰則，都未必即刻係最終答案。我個仔讀幼稚園嗰陣會唔會仲見到大家拗緊曼城應該扣幾多分？嗯，有可能。

除咗罰曼城，其他球會會唔會追數？

仲有條支線，可能比估扣幾多分更加熱鬧。

據《The Times》報道，阿仙奴、利物浦、曼聯同熱刺早喺2024年就已經採取法律程序，保留日後向曼城追討賠償嘅權利。佢哋想追嘅唔係「當年我哋無咗粒魚蛋」嘅精神損失費，而係如果曼城違規令自己少咗聯賽排名獎金、歐聯資格或者相關收入，嗰筆損失可唔可以計返出嚟。

呢條路唔係完全得個講字。今年般尼就喺另一宗英超財政案入面，獲判愛華頓賠償；愛華頓已經提出上訴。不過曼城案橫跨咁多年，要證明「如果冇嗰啲違規，我本來會攞到邊個名次、賺多幾多錢」，恐怕比睇返當年張聯賽榜複雜得多。當年輸一個位，亦唔等於今日就可以拎張單去曼城收銀處排隊。

所以之後可能同時有兩條大數兩邊嘈：一邊係英超點處分曼城，另一邊係其他球會能否證明自己真係蒙受損失。114項成立嘅報道令追數更值得留意，同時球會層面都會令件事相當有趣。

所以話……老闆肯科水咁又點……

寫到呢度，嗯，果然有少少感觸嘅。當年油王肯用錢，車迷睇得鬼死咁開心，我自己都係其中一個。嗰陣見到球隊差個前鋒，第一反應真係「買囉」，第二反應先係「買邊個」。至於筆錢喺盤數上點處理？老實講，我當年根本唔會諗。

但嗰個年代已經過去。今日BlueCo肯科水，我當然歡迎；車仔需要補強嗰陣，我都一樣會叫佢買人。不過肯俾錢，同球會可以將嗰筆錢當成收入、想點使就點使，已經係兩回事。人工要報齊，贊助要交代清楚，盤數要過到關。規則合理唔合理可以拗，覺得佢保護緊舊豪門亦可以討論；但只要大家仲喺英超踢，就唔可以當啲規則唔關自己事。

所以，下次有人同我講「啲錢又唔係你出，理得佢使幾多」，我大概都係同一句：我都想老闆繼續科水呀。但而家真正要問嘅，係球會收咗筆錢之後，究竟可唔可以咁樣計、咁樣使。曼城115條，講到尾就係將呢個問題放大到全英超都避唔開。

好喇，月餅食完，花生就留返判決理由同罰則出爐嗰陣先開。