【球壇風向室】撕走「天才少年」嘅標籤 18歲耶馬其實去到咩高度？
早幾星期有巴打敲碗，叫我間中寫下非車球員分析。
問題係球壇咁大，我又唔係黃大仙，無理由有人嗌個名就即刻開壇作法。何況「邊個勁啲」、「邊個被高估」呢類問題，十次有九次都係各自帶觀點入場，最後由討論足球變成鬥邊個把聲大、人數多。
所以，不如轉個玩法。
今次我揀咗三名被數據網站分類為右翼嘅球員，各自抽出一個單一聯賽球季。三個樣本全部超過2,000分鐘，圖中數值按每90分鐘計算；姓名、年齡、球會同球季就暫時收埋。
循例戴返個數據頭盔。雷達位置係球員喺各自聯賽、同位置比較群組入面嘅百分位，用嚟睇角色形狀，唔係總能力分數。外圈唔代表一條友必然更勁，真正嘅每90分鐘數值已經列喺每條軸旁邊。
大家唔使急住估，後半自然會開估。當然，其中一個人我已經講咗，係耶馬。
三條線入面，邊個最似世界級右翼？邊個係專門收割嘅入球機器？邊個掌握最多球權？至於工作範圍最闊嗰個，如果完全唔知道佢叫咩名、幾多歲，你又會將佢評到咩高度？
買定離手，先睇圖。
三條線，三種右翼
先由橙色線Player A講起。佢每90分鐘有0.38非十二碼xG、0.40 xA、10.71次禁區內觸球，另外仲有5.28次成功盤扭。由進攻發動、中段爆破到最後終結都有份，成張卡最似一個乜都要做嘅全包型右翼。
藍色Player B就完全相反。佢每90分鐘只有22.73次成功傳球、1.55次成功盤扭，控球參與遠低過另外兩人；但去到龍門附近，條線就突然向外爆。
0.49非十二碼xG、0.77 xGOT、10.50次禁區內觸球。佢唔需要由廚房開始又煮又切，隊友會自動波將碟餸送到面前，佢負責食。雷達面積雖然較細，工作就集中喺球場上最值錢嘅位置，係一個專門將進攻變成入球嘅終點型右翼。
白色Player C就係第三種生物。
佢每90分鐘有58.13次成功傳球，長傳成功率77.7%，盤扭成功率64.6%，全部係三人最高。0.38 xA與Player A非常接近，但禁區內觸球只有4.73次，連另外兩人一半都唔到。
Player C更加似放喺右翼嘅控制台，透過接應、轉邊、盤扭同最後傳送，決定成次進攻點樣行。
單睇雷達，A最全面，B最似殺手，C就最似大腦。不過實際產量最高嘅係Player B，每90分鐘交出1.25個入球加助攻；Player A有1.07，Player C就係0.84。
改睇機會質素，A同B又幾乎無分別，兩人每90分鐘嘅xG加xA分別係0.91同0.92，C亦有0.80。扣除十二碼後，C嘅npxG加xA係0.80，A有0.78，實際產量最高嘅B反而係0.73。
三個形狀完全不同嘅右翼，原來用三條不同路線，製造出非常接近嘅非十二碼底層威脅。
所以雷達圖從來唔係高達戰鬥力探測器，外圈亦唔等於自動較強。而家買定離手：邊個最好？邊個最年輕？如果由零開始建立一套進攻，你又會揀邊張卡？
開估：最年輕嗰個，係Player A
Player A，係完成呢個球季時仍然只有18歲嘅耶馬。
Player B，係2024/25球季嘅沙拿。
Player C，就係2021/22加盟巴黎聖日耳門後第一季嘅美斯。
先戴返最大頂嗰個頭盔。呢個比較唔係想證明耶馬勁過沙拿或者美斯，更加唔係將21/22美斯當成巔峰版本。三個樣本嘅球季、聯賽、年齡同實際職能都不同，單靠雷達圖排歷史地位，同用FIFA能力值決定金球獎差唔多。
沙拿同美斯只係兩把畀英超觀眾認得嘅尺。我估唔使講大家都記得：
24/25沙拿代表進攻終點嘅極致。佢唔需要大量傳球或者盤扭，仍然可以用接近耶馬嘅禁區觸球，製造更高npxG、xGOT同實際產量。Player B被A包住，只能證明沙拿將工作集中，唔代表耶馬比佢高效。
21/22美斯就代表另一端。嗰季唔係巔峰美斯，但佢仍然係成熟嘅組織核心。數據網站將佢歸類為右翼，實際活動範圍更加自由，會大量回撤接球、控制節奏同處理長距離傳送。
一邊係終點，一邊係控制台。耶馬最值得留意嘅唔係某幾項數據贏過邊個，而係佢張卡竟然同時向兩邊生長。
如果揭盅前已經將Player A評為成熟嘅世界級進攻核心，知道佢個名同歲數之後，就無理由突然將佢降返做「好有潛質嘅𡃁仔」。
所以真正要問嘅唔係耶馬將來會唔會成為世界級，而係撕走「天才少年」呢張包裝紙之後，佢目前距離世界最高嗰張神枱，仲有幾遠？
耶馬而家究竟去到咩高度？
答案嘅第一部分其實幾清楚。
每90分鐘1.07個入球加助攻、0.91 xG加xA，唔係「以18歲嚟講好勁」，而係放入任何年齡組別都屬於世界級嘅進攻產量。與24/25沙拿相比，兩人底層輸出只差0.01。
當然，底層輸出相若，唔代表已經一樣好。
沙拿每90分鐘有0.49非十二碼xG同0.77 xGOT，耶馬就只有0.38同0.48。耶馬雖然射得更多，沙拿拎到嘅機會就更靚，射門亦更具威脅。耶馬今季16個入球來自12.81 xG，實際結果暫時跑贏機會質素，能否年年複製仍然要觀察。
但如果只用沙拿嗰把尺量佢，又會漏咗耶馬最特別嘅部分。
耶馬每90分鐘有84.84次觸球，與21/22美斯嘅84.90次幾乎一樣；同時又有10.71次禁區內觸球，接近沙拿嘅10.50次。
即係佢接觸比賽嘅頻率似組織核心，出現喺禁區嘅頻率就似終結型右翼，中間仲有每90分鐘5.28次成功盤扭。由接應、推進、拆走第一個守衛、製造機會，到最後走入禁區，幾乎每一段都有佢。
呢種全面唔代表每一項都已經世界第一。美斯樣本嘅傳球量、長傳及盤扭效率仍然更高，沙拿就喺射門質素與終結威脅上更加成熟。再加上不同聯賽、球季與比較群組嘅差異，雷達圖始終只係一把參考尺。
所以如果一定要落判詞，我會話世界級已經成立，金球級球季亦正在發生；至於世界第一，暫時未需要咁快派獎。
但「佢仲要幾多年先去到世界級」呢條問題，可以正式收檔。耶馬唔係向住嗰個高度前進，佢已經企咗喺上面，只係仲未知道最後會再向上爬幾多層。
希望有日，二安都唔再需要年齡加持
做完呢次盲測，我最大感想唔係耶馬勁過邊個，而係有少少羨慕。
一個年輕球員最理想嘅狀態，唔係每次讚佢之前都要加句「以佢呢個年紀嚟講」。真正可怕係遮住出世年份之後，剩低嘅數字仍然足以同最成熟嘅世界級球員坐埋一枱。
寫到呢度，車迷自然會諗起二安。
我唔希望佢變成另一個耶馬，兩人本身就唔應該共用同一份使用說明書。只係希望有一日，我哋同樣遮住二安個名同歲數，讀者第一個問題唔再係「呢個𡃁仔將來可以有幾勁」。
而係望住張圖，忍唔住問：
「呢條友個雷達圖好撚癲，係邊位傳奇級球員？」