【車迷觀點】祖奧柏度接過車仔9號球衣　今次嘅魔咒會唔會唔一鳩樣？

JP係咪而家先成為9號？

要判斷係咪同一系列嘅恐怖片，先問一個問題：祖奧柏度由20號轉著9號，係咪代表佢今季先正式成為車仔中鋒？

答案好明顯，唔係。

JP上季雖然著20號，但做嘅早已經係9號份工。各項賽事20球、6次助攻，英超就有15球、5次助攻，而且無一球來自十二碼。佢唔止係隊內首席射手，最後仲成為球迷票選年度最佳球員。

JP本人對定位亦講得直接：「我一直都係9號。」只係因為技術比較全面，佢唔會成場企喺兩個中堅中間等人餵波，而係會走出禁區駁腳、接應中場，再揀時間入返禁區完成攻勢。

呢種踢法有時望落唔似傳統中鋒，但唔代表佢忘記入波。正如JP自己解釋，淨係企喺禁區可能等極都無機會，長期留喺外面又會離龍門太遠，真正重要嘅係判斷幾時出去、幾時返入去。

所以今次改號碼，無要求JP轉Position、學新踢法，或者突然擔任一個從未做過嘅角色。佢上季早已經係車仔實際上嘅9號，分別只係波衫個Number遲咗一年先追返上嚟。

件波衫真正改變咗啲乜？

既然位置、踢法同責任都無變，咁JP由20號變成9號，真正改變嘅大概唔係佢，而係我哋點樣望佢。

過去車仔好多9號，件波衫都似一張預先簽發嘅期票。球員啱啱加盟，甚至仲未證明自己適唔適應英超、夾唔夾領隊，球會已經將「鋒線答案」四個字印落佢額頭，再等佢日後用入球兌現。

一旦兌現唔到，錯失一個機會就變成「又係車仔9號」；連續幾場無波入，就會自動加入托利斯、莫拉達同盧卡古嗰張失敗名單。

JP今次就將次序掉轉咗。佢唔係先收到「車仔9號」呢個Title，再證明自己配得上；而係先交出成績，球會先將個號碼正式交俾佢。過去件9號係一張等待兌現嘅期票，JP收到嘅就更似上一年度嘅成績表。

但成績表派完，下一個學期始終要重新考過。

著20號嗰陣，JP幾場無波入，大家仍然會留意佢識墮後、駁腳同製造空間；今季背脊變成9號，同一段入球荒就更容易被問：「我哋個中鋒幾時先入波？」

呢種要求亦唔算無理。JP已經表明新一季會更專注入球，既然佢主動承認自己係9號，入球當然係最重要嘅KPI。其他能力可以令佢啞火時仍然幫到球隊，但唔可以變成長期唔入波嘅萬能擋箭牌。

真正要避免嘅，唔係用入球評價JP，而係將入球變成唯一評價。件9號可以提高標準，但唔應該將一個完整嘅前鋒，重新壓縮成入球數字。

如果再出事，真係件衫嘅錯？

講到呢度，好似已經可以開香檳，宣布JP係近年最有條件破解魔咒嘅男人。

但戴返頭盔先，上年我就係喺呢個位置開始奶嘢。

JP避開咗「未證明自己，就先被件9號定義」呢一關，唔代表之後已經一路綠燈。真正嘅變數唔係號碼，而係沙比。

上季球隊打法、身邊隊友甚至JP自己嘅企位都反覆改變；新球季又係另一套體系。沙比想佢留喺禁區做終點，定係更多墮後參與組織，暫時仍然未經正式比賽驗證。

季前五場七球當然係好消息，至少證明JP暫時無因為換領隊而重新開機失敗。但季前入波就似Mock Test攞滿分，值得開心，唔代表正式公開試自動有個A。

所以如果JP今季最終出事，真正值得調查嘅仍然唔係件衫有無落降頭，而係車路士有無再次改寫中鋒份Job Description。

沙比如果保留上季成功嘅角色，等JP繼續自己判斷幾時墮後、幾時入禁區，咁件9號就只係背脊換咗個數字；但如果球隊又逼佢放棄原本最有價值嘅部分，咁無論著9號、20號定99號，結果都可能一樣。

所謂魔咒真正可怕嘅地方，從來唔係件波衫，而係車路士總有辦法將一個原本合理嘅中鋒計劃，慢慢變到唔合理。

總結：今次劇本至少唔同

經過上季戴納嗰一巴，我當然唔敢宣布JP一定破解魔咒。呢個教訓已經用塊面親自驗證過，唔需要再做第二次實驗，畢竟再腫落去，我驚個仔會唔認得我。

但戴納失敗，亦唔代表每個接過9號嘅人都只係排隊等緊收皮。

JP未必對魔咒有特殊免疫力，但當件波衫交到佢手上之前，佢已經證明咗自己係邊個。今次同一套恐怖片，至少第一幕唔再係一個前鋒被逼成為大家想像中嘅車仔9號，而係一個已經成功過嘅9號，終於換返正確號碼。

佢真正要做嘅，只係繼續成為上季嗰個自己。

至於下年我塊面會唔會再腫多一次……呢篇文大家照舊幫我Cap低先。