【車迷觀點】艾納斯續唔續菲歷斯都好 車路士或成最大贏家

戴返個頭盔先,標題嗰句「車路士或成最大贏家」,係抽水呃 Click 嘅,至於抽邊個水……交俾大家自行想像。
事緣係菲歷斯過咗去沙特踢波之後,大家一直以為佢同車仔已經再無瓜葛。點知去到 11 月,沙特傳媒突然爆出內幕,話當日車仔賣佢去艾納斯嗰份「永久轉會」合約入面,原來寫咗條好神奇嘅條款:去到 2027 年,無論艾納斯決定同菲歷斯續約定係唔續,車仔喺呢單交易入面都仲有後著跟尾。
如果沙特嗰邊嘅報道屬實,我又真係有少少佩服 BlueCo 冷氣房入面嗰班華爾街狼人:呢種條款諗得出已經幾有意思,最神奇嘅係,對面艾納斯又真係肯落筆簽喎。
艾納斯兩年後要揀啲乜?
由頭梳理返一次件事先。當日菲歷斯過檔艾納斯,車路士官方寫得好清楚係「永久轉會」,基本轉會費係 €3,000 萬。一般理解下,沙特交錢我哋交人,呢位葡萄牙金童之後踢成點,都同史丹福橋無關啦。
但按照爆料嘅沙特報道版本,呢單交易去到 2027 年,其實擺咗個價值 €2,000 萬嘅重大選擇俾艾納斯揀:
第一條路,係艾納斯覺得菲歷斯好使好用,決定同佢續兩年約。如果揀呢條路,艾納斯就要俾多€2,000 萬車仔,令成單交易嘅總價由 €3,000 萬推高到去 €5,000 萬,車仔成功將當日嘅買價同賣價打個和。
第二條路,係艾納斯喺限期前叫停唔續,而菲歷斯本人又同意嘅話,咁總轉會費就會維持喺 €3,000 萬封頂;至於球員本人,據報就會返去倫敦報到。
續約仲要俾錢舊球會,有冇人試過?
聽到「同自己個球員續約,竟然要嘔錢俾前度球會」呢種玩法,好多人第一反應可能覺得係沙特記者鳩噏。畢竟轉售分紅大家聽唔少,續約收錢就真係少見。但翻查返球壇紀錄,續約牽涉舊球會收錢,其實又真係有人玩過。
我查到最近嘅例子,係河床同馬體會當年喺前鋒波利(放埋個英文名俾大家:Rafael Santos Borré)身上嘅交易。當年河床買入波利嗰陣,只係買咗佢一半嘅轉會經濟權益;合約入面寫明,如果河床之後想同波利續約,就必須先向馬體會俾多 €350 萬,買起埋額外一部分嘅權益先至續得。最後河床無續到,波利約滿自由身去咗法蘭克福。
呢個例子起碼解釋到,「續約」呢個動作,喺合約條款設計上係可以變成舊球會嘅收錢觸發點。當然,車仔同艾納斯之間份約未必係用同一個概念,當係參考就好。
至於沙特報道後半截講嗰句「唔續約就會返車仔」,我自己就做咗好多 Searching,同時又摷勻晒近年歐洲同南美嘅轉會紀錄,暫時都搵唔到一單夠貼切、又核實到嘅同類前例,亦無任何報道解釋過點解永久轉會唔續約會返舊會。所以呢一截究竟係變相嘅「兩年長借」、定係一個預設咗條件嘅回購權,一日未見到份合約真身,呢部份就先當係傳聞聽住先。
艾納斯點解會肯簽?
寫到最後,與其估兩年後菲歷斯會唔會真係返倫敦,不如調返轉由艾納斯嘅角度諗下:點解咁刁鑽嘅條款,對面又會肯落筆簽?
其實當佢係一個「分期買斷加試用期」嘅打包方案,件事就即刻講通晒。對艾納斯嚟講,與其一開波就俾車仔撳住搶 €5,000 萬,依家先俾住三千萬就可以將人帶返沙特用兩季睇下效果。踢得好、啱使嘅,兩年後先至再補埋尾數留人;萬一踢唔起或者水土不服,限期前叫停就可以鎖死止蝕位,唔使硬食長約。
對車仔嚟講,與其喺轉會窗死咬住五千萬唔放搞到無人問津,不如先收三千萬落袋平咗今年盤數;到兩年後艾納斯真係用得順手想留人嗰陣,車仔又可以隔空袋埋嗰兩千萬尾數。
至於萬一兩年後艾納斯真係揀唔續、而車仔又真係要接返人呢?到時菲歷斯份人工點計、擺喺邊個位、邊個領隊肯用,嗰盤數就要等更多細節爆出嚟先至計到。起碼喺今日呢一刻,睇住班華爾街狼人連賣走個球員都可以寫出咁嘅劇本,我哋車迷買定花生等睇兩年後開估就夠啦。
