【球壇風向室】曼聯養咗四年都留唔住　JJ Gabriel風波究極懶人包

呢張SSR，曼聯唔係今日先知值錢

青訓入波多、拎獎多，唔代表將來一定踢得成。每年歐洲各大球會都總有幾件YouTube球王，十幾歲嗰陣睇落會拎金球獎，過多幾年再搜尋個名，可能已經去咗地盤返工紮鐵。

但JJ嘅情況，的確唔係普通青訓吹奏。

佢14歲半就代表曼聯U18上陣，對列斯聯梅開二度。上季再喺唔同青年梯隊合共29場攻入26球，除咗成為曼聯歷來最年輕嘅Jimmy Murphy年度最佳年輕球員，亦當選英超U18年度最佳球員。

Jimmy Murphy獎本身當然唔係球星保證書，但歷屆得主包括傑斯、史高斯、碧咸、拉舒福特同格連活特。即係話，至少喺曼聯內部，呢個獎唔係隨便印張獎狀氹細路仔開心，而係頒俾球會認為最接近踏入下一階段嗰批人。

傑斯甚至直接形容JJ係「generational talent」，又將佢嘅成長速度同朗尼比較。當然名宿吹奏就信一半先，但曼聯實際上亦的確將佢當成特別個案處理：跳幾級踢U18、安排落U21、定期跟一隊操練，季前亦四次進入一隊比賽名單。

問題係，名單入咗四次，真正落場就只有對馬體會嗰幾分鐘。計正常比賽時間大約8分鐘，連補時先接近13分鐘。

所以曼聯並無將JJ掉喺青年軍雪到硬一硬。以一個15歲球員嚟講，佢得到嘅跨級比賽、一隊操練同季前曝光已經遠超普通青訓；但所謂「通往一隊嘅道路」，暫時仍然停留喺操練場、比賽名單同口頭承諾。

今次爭議，正正就係雙方對呢條路仲要行幾耐，有完全唔同嘅理解。

由戴帽到反枱，前後只係幾日

今次風波爆得咁突然，其中一個原因係，JJ出事之前根本唔似一個被曼聯投閒置散嘅球員。

9月9日，佢首次出戰青年歐聯，對Sabah上演帽子戲法，協助曼聯大勝5：0。賽後U21教練Adam Lawrence仲公開強調，由球會高層到教練團隊都非常信任JJ，球會亦一直安排佢接觸不同級別嘅訓練同比賽。

然後第二日，佢嘅Instagram突然刪走所有曼聯相關內容。

再過幾日，事情由社交媒體估估下，正式升級成球會危機。JJ一方向曼聯發出通知，要求即時取消球員註冊，等佢可以回復自由身；同一時間，佢亦無再參與操練。

「罷操」呢個字聽落當然夠爆，但目前最穩陣嘅講法，係JJ喺雙方關係惡化後無參與操練，部分報道就直接形容佢拒絕操練。無論用邊個版本，結果都一樣：一個啱啱先戴帽嘅15歲小將，正式停止參與球會日常運作。

曼聯一方就表示震驚，聲稱完全唔理解點解事情會急轉直下，亦認為球會已經盡力向JJ及其家人展示一隊發展路線。行政總裁Omar Berrada、足球總監Jason Wilcox同青訓主管Stephen Torpey，據報都直接介入談判。

亦係風波爆出之後，先有消息話JJ原本會進入對白禮頓嘅聯賽盃大軍，甚至有機會打破球會最年輕上陣紀錄。但呢一點要大大隻字戴返頭盔。

「原定入選」係JJ提出取消註冊後，先由接近曼聯嘅消息來源向傳媒放出。多間傳媒都收到類似消息，未必純粹係臨時作故仔；但JJ有無收到實質通知、係預定上場定後備陪坐，外界都無法核實，亦唔可以據此判定係佢自己放棄咗一次地標戰嘅機會。

咁JJ果邊又點講？

Sky Sports收到嘅消息係，JJ及其團隊認為曼聯季前同開季後有足夠機會安排佢接觸更多一隊比賽，包括歐聯，但球會最終無做到。BBC方面就將矛盾指向一隊發展路線，指JJ一方認為曼聯吹水唔抹嘴。到9月17日，Sky再報道JJ已經下定決心，認為自己踢完曼聯最後一場。

但要留意，以上仍然全部係消息人士轉述。直到目前為止，JJ本人同家人都未有公開解釋：曼聯究竟承諾過啲咩、邊一項承諾無兌現、無列入歐聯A List係咪真正導火線，又或者佢哋一早已經決定離開。

可以肯定嘅，只有雙方對「足夠機會」有完全唔同嘅定義。曼聯認為15歲已經跳級、跟一隊操練同參與季前賽，絕對算係Fast Pass；JJ一方就覺得，既然球會一直將佢當成特殊天才，機會就唔應該仍然停留喺名單同口頭承諾。

邊個講得啱，現階段未有足夠證據。

但問題嚟：一個連職業合約都未夠歲簽嘅15歲球員，憑咩反過來要求曼聯放人，甚至有機會令球會四年投資付諸流水？呢個先係成件事最有趣嘅地方。

未簽得職業約，先係JJ最大籌碼

答案有少少反直覺：JJ之所以夠膽同曼聯攤牌，某程度上正正因為佢仲未夠歲簽職業合約。

JJ現時同曼聯之間並無一份正常職業合約，維繫雙方關係嘅係青訓球員註冊。按照英超規例，呢份註冊唔係球員或者家長一句「唔玩啦」就可以單方面撕爛，取消註冊需要球會、球員同家長三方同意；如果傾唔掂，任何一方都可以要求英超作出具約束力嘅裁決。

換句話講，JJ目前只係提出要求，曼聯有權拒絕，佢哋亦的確無打算即刻放人。但曼聯可以拒絕取消註冊，唔代表可以逼JJ繼續操練，更加唔可以逼佢簽合約。

JJ要去到10月6日滿16歲，先可以簽獎學金合約；再到17歲，先可以正式簽職業合約。據報曼聯已經準備好獎學金條款，亦有意預先協議佢17歲後嘅職業合約，但JJ一方完全可以選擇唔簽。

車仔巴打對「獎學金」呢樣嘢應該唔會太陌生。車路士每年都會公布新一批Scholar，當中亦有唔少後來大家熟識嘅面孔。占士、高維爾、細查呢類Cobham畢業生，當年都係由呢一關正式進入全職青訓。

但獎學金只係由Schoolboy踏入全職足球嘅第一關，唔係球會派俾你嘅一隊入場券。簽完之後一樣要踢U18、升U21、爭操練機會。有人成功爆上一隊，有人被外借幾年，亦有人兩年後連職業合約都收唔到。

JJ真正想要嘅，睇落唔只係一份合約，而係一條比正常Scholar更快、更具體，甚至最好寫埋預計到站時間嘅Fast Pass。

而JJ手上仲有另一張牌：愛爾蘭護照。

一般情況下，18歲以下球員唔可以隨便跨國轉會；但JJ持有歐盟護照，滿16歲後就有機會轉投歐洲球會，只要新球會符合相關要求，再得到FIFA批准。呢個亦係點解皇馬、巴塞同拜仁呢類球會，可以喺呢個時間點加入戰團。

不過，10月6日生日一到，唔代表JJ就會「叮」一聲自動變成自由身。佢同曼聯之間嘅青訓註冊仍然未解除，英超亦未就事件作出裁決；現時一邊報道話佢滿16歲後可以轉戰歐洲，另一邊曼聯就認為有權留住佢直至季尾，暫時未有一個可以寫死嘅離隊日期。

唯一比較肯定嘅係，如果JJ最終成功離開，曼聯應該唔會收到一筆正常轉會費。部分報道估計補償可能只有約30萬鎊，但實際金額仍然要視乎裁決、目的地同離隊方式而定。

簡單講，曼聯養咗四年、投入大量資源，最後可能只可以收返一筆對豪門嚟講近乎象徵式嘅補償。亦難怪球會口中所謂「爭取最大程度補償」，聽落好有氣勢，實際上可能只係由跌剩一條底褲，努力爭取保住對襪。

A List，真係曼聯對唔住佢？

拆到最後，最令我R頭嘅反而係歐聯A List。

曼聯提交名單嗰陣，JJ仲係15歲，未符合B List資格。如果想安排佢對Sabah上陣，就要將佢放入最多25人嘅A List。

阿仙奴願意為Max Dowman咁做，證明唔係無可能；但球會願意為小將使用一個名額，同小將有權要求球會咁做，始終係兩回事。

以JJ當時連正式一隊比賽都未踢過嘅情況，曼聯無特登預留一格俾佢，我唔覺得係咩不可原諒嘅決定。

更加關鍵係，JJ去到10月6日滿16歲，由於已經連續效力曼聯超過兩年，就可以加入人數無上限嘅B List。即係話，無份踢Sabah唔代表成季踢唔到歐聯，佢真正要等嘅只係幾個星期。

如果無列入A List真係今次反枱嘅主要原因，我就更加難理解。

曼聯當然唔係完全無責任。如果球會一直用Fast Pass留住JJ，球員同家人覺得實際機會追唔上承諾，唔係毫無道理；假如佢身處一支競爭無咁激烈嘅球隊，亦可能一早獲得一隊上陣機會。

但以上文見到嘅發展速度，曼聯條路已經遠快過普通青訓，點都談不上阻住佢上位。

投入過資源，唔代表JJ欠球會一世；但同樣地，曼聯亦唔係欠咗一個15歲球員A List名額。

所以現階段要我講，我會偏向JJ同佢身邊嘅人太心急。如果下一站真係可以更快接觸成年隊足球，今次攤牌自然會證明佢哋賭啱；但如果只係轉去另一間豪門重新排隊，問題可能從來唔係曼聯無提供道路，而係佢哋接受唔到道路唔按自己時間開放。

SSR代表你稀有，唔代表抽返嚟嗰刻已經滿級。Fast Pass可以加快練級，但唔代表沿途每一關都可以直接Skip。年輕人，有時耐性都好重要架。