【車迷觀點】積臣突然變成維拉神鋒 係咪世界線變動咗?

積臣對114入咗兩球,我只係出咗個 post 講下佢,碌完留言區,見大家講到車仔賣走咗新夏蘭特咁款,嚇到我即刻望咗望世界線變動率計測器,確認自己有無唔小心叮飯去咗第二條世界線。
因為我記憶入面嗰個積臣,跑起上嚟可以令人好興奮,個波去到佢腳下又令人好失望。仲有搶十二碼、上腦拎牌,同埋去拜仁嗰場大龍鳳,全部都仲歷歷在目。突然間見到大家問可唔可以回購,我一時間真係有啲跟唔上。
寫文有樣好,自己講過乜有紀錄。我索性掘返以前寫積臣嗰幾篇,睇下當年點讚、點屌,再望返今季喺維拉嘅佢。
究竟艾馬利手上嘅積臣,比起當年令我哋又愛又恨嗰個,進步咗幾多?嗱,如果你同我一樣係金魚型球迷,得兩秒記憶,咁呢篇啱晒你。
有佢激心,無佢頭痕
2025年6月,我幫積臣嗰篇季後分析改咗個名,叫「薛丁格的前鋒」。當時最難頂嘅,就係佢明明做咗好多啱嘅嘢,去到最後幾下處理,又可以令全部人屌出聲。
積臣最值錢嘅地方,係佢識得跑到有波接嘅地方。佢有速度衝中堅身後,亦肯橫移拉扯防線,令彭馬同安素有直線可以放。24/25英超佢有14.86 xG,證明車仔確實能夠透過佢製造到有威脅嘅埋門。偏偏最後只入10球,接近五球嘅差額,就係成季睇波嗰份激心嘅其中一個來源。
而且,佢做波都有貢獻。同一季積臣有20次傳送直接形成隊友射門,前場嗰啲駁腳同配合,一早已經係佢工作嘅一部分。佢可以交到一腳好波,可以同隊友配合;問題係下一次差唔多嘅處境,佢又可能將個波控遠咗,要多追一步、多調整一下,對手已經返到位包抄。
我喺2024年寫佢嗰陣,已經提過第一腳處理間中失靈。以防大家唔記得,積臣嘅成長背景幾特別:細個主要踢街場,16歲先加入ASC Tilene,第一次接觸有組織足球,之後先去Casa Sports,再到維拉利爾接受歐洲青訓。佢踏入車仔一隊嗰陣,接受系統訓練嘅年資,其實比好多同齡球員短得多。
所以當年對佢嘅期望,一直都好具體:保留嗰份走位觸覺,再將接波、決定同埋門磨穩定啲。佢已經有作用,車迷亦真係等緊佢再行前一步。之後拜仁嗰場大龍鳳,令我對佢嘅選擇多咗幾分不滿;至於腳下嗰幾個問題,我早喺佢走之前已經寫低。
艾馬利俾佢衝,仲俾佢帶住個波衝
今次翻查資料,我自己都要修正一個講法。我喺留言區話,艾馬利將積臣嘅弱項收起,俾佢做最簡單嘅工作。睇完數據,「最簡單」呢三個字原來講得太簡化。
「那個男人」嗰季,積臣每90分鐘嘗試2.04次盤扭;今季喺維拉,升到4.62次,多咗超過一倍。更值得留意嘅係,同一組統計口徑之下,盤扭成功率亦由57.4%升到70%。佢持球挑戰對手多咗,而且暫時完成得更好。
艾馬利對114賽後嘅解釋,正好幫呢組數字補返個畫面。佢話積臣可以回撤幫手,但球隊更需要佢跑防線身後;同時,佢亦欣賞積臣一對一衝擊對手,再將個波交俾隊友嘅能力。早喺對費倫巴治之後,艾馬利已經講過,積臣可以墮後接應,球隊進攻嗰陣就需要佢出現喺禁區。
按呢個要求去理解,積臣有幾份工作要連埋做:落嚟接波、引對手跟出,搵機會用速度衝,再趕返入禁區接應。教練要安排好隊友點樣支援,積臣自己亦要判斷幾時交波、幾時轉身、幾時起步。就算每一下都只係簡單動作,串埋一齊嘅時機,都要靠球員自己掌握。
當然,佢仲有甩波。今季每90分鐘失去球權10.63次,比「那個男人」嗰季嘅8.80次更多。呢個數字涵蓋傳送同對抗等情況,當中有幾多係第一腳控失,仲要逐段畫面睇;可以肯定嘅係,積臣今季持球突破做多咗,球權風險亦繼續存在。
暫時七場英超,最值得肯定嘅就係呢度:佢敢帶、帶得過,亦能夠用持球衝擊幫球隊推前。艾馬利畀佢發揮嘅範圍,比我原先一句「做最簡單工作」闊得多。而積臣要將呢份威脅變成大家口中嘅「神鋒」,最後仍然要處理好嗰一腳。
嗰一腳,今季暫時交到貨
講到埋門,今季積臣確實交出咗更好嘅回報。「那個男人」嗰季,佢每90分鐘入0.38球,今季升到0.62球;同一時間,每90分鐘xG由0.56降到0.47。得到嘅預期入球量少咗,實際入球反而多咗,呢份效率改善,值得讚。
艾馬利自己亦留意到呢個變化。對114賽後,佢講起積臣季初適應得比較辛苦,起腳成日高出,近期射門處理先開始改善。換言之,積臣今季同樣有一段調整過程,近期先逐漸將表現變成入球。教練同佢重新合作,亦需要時間磨合。
不過,今次令大家突然興奮嗰場波,對數字嘅影響真係好大。對114之前,積臣六場英超入兩球,累積約2.74 xG;跟住一場約0.34 xG就入兩球,直接包辦咗佢今季英超一半入球。短短一個下晝,原本入球少過預期,變成入球多過預期,留言區亦即刻熱鬧晒。
嗰兩球梗係要計,對住114入波仲要加分添。只係七場英超嘅樣本,仲好容易俾一兩場表現大幅拉動。積臣今季嘅持球突破有進步,近期入球效率亦好咗;至於以前嗰種令人血壓急升嘅埋門,可唔可以長期穩定落嚟,就係佢之後要繼續交嘅功課。
世界線仲喺度,舊文都仲喺度
今次掘返啲舊文,最有趣嘅係,原來我自己都將積臣記得愈嚟愈扁平。諗起佢,先浮出嚟嘅都係控甩、射失、上腦,同埋跳草裙舞去拜仁。當年認真寫過佢點樣幫隊友、點解無佢會頭痕,反而要打開篇文先記得。
見到佢喺維拉踢得好,我係替佢高興嘅。以前花時間寫佢、期待佢再進一步,今日見到佢真係磨好咗某啲地方,多少都有種追開嘅角色終於升Level嘅感覺。當然,佢而家著住維拉件衫,對車仔嗰陣可以做返嗰個把握力唔好嘅佢就車迷最開心。
積臣突然上身,今次睇嚟唔係命運石之門嘅選擇。El Psy Kongroo
