【球壇風向室】新帥對手觀察區EP1　伊拉奧拿改變咗利物浦乜嘢

一、伊拉奧拿帶過嚟嘅嘢

要睇利物浦有無改變，首先要知道伊拉奧拿原本係一個點樣嘅領隊。

呢樣我之前講過，唔長篇大論，總之概括講就係：點樣令對手無時間舒服處理個波。前場球員會先封住容易嘅短傳選擇，等對方將個波送去某個位置，成隊再突然向前收網。過去三季，般尼茅夫由前場搶回球權後製造咗147次射門，係同期英超最多。

所以伊拉奧拿嘅迫搶唔係十一個人好似放狗咁追住個波跑，而係先安排好個陷阱，再等對手自己踩入去。

呢個分別，單靠全場跑動距離其實睇唔到。跑動距離只係總里數，可以包括回防、拉邊、無球走位，甚至一堆無乜效果嘅來回跑。反而PPDA可以睇到一隊波幾快向對方出手，數字越低，代表迫得越主動。

利物浦頭五場嘅PPDA介乎3.6至6.7，五場都低過對手。高位搶回球權合計亦以93比47領先，證明伊拉奧拿最招牌嗰套，的確已經開始搬入晏菲路。

對手由後場開始組織，通常傳得幾腳就會有人衝埋嚟，身後亦會有第二、第三個利物浦球員準備包圍接應點。

不過，利物浦目前只係學識咗點樣撲出去，仲未完全學識撲空之後點算。

第一場對紐卡素，利物浦開波四分鐘喺右路連續短傳，中途被對手截斷。紐卡素之後只用一次直線傳送，就將個波送到伊蘭加腳下。由搶到波至入球，前後只係9秒。

第二個失球更加誇張。利物浦一次射門被封阻，紐卡素喺自己禁區附近搶返個波，14秒之後，韋洛克已經喺另一邊完成入球。

呢兩球幾乎係伊拉奧拿足球嘅使用風險示範。利物浦為咗圍住對手，會將大量人手推到個波附近；一旦第一浸包圍失敗，原本用嚟增加壓迫密度嘅人數，就會變成防線嘅漏洞。

第五場對般尼茅夫更加證明，迫搶方向存在，唔代表場場都迫得贏。利物浦今場PPDA只係6.7比6.9稍為佔優，高位搶回球權更加以10比21落後；去到下半場，PPDA升至9.7，壓迫強度明顯跌咗落嚟。

所以頭五場最明顯嘅改變，唔係利物浦跑多咗幾公里，亦唔係場場都可以逼死對手，而係佢哋願意用更大風險，嘗試更早搶返個波。

至於搶返個波之後，佢哋又想點處理，就係伊拉奧拿帶嚟嘅第二個改變。

二、所謂直接，其實係少兜兩個圈

伊拉奧拿搶返個波之後想做咩，其實唔複雜：入佢中路，唔好為傳而傳。

佢帶般尼茅夫嗰三季，球隊平均每秒向對方龍門推進1.95米，係同期英超最快；每段控球平均亦唔夠三次傳送。即係個波去到腳下，第一反應唔係點樣護球權，而係前面有無人可以即刻接應。

但直接唔等於長傳。

一腳四十碼橫傳當然係長傳，三腳短傳由中堅送到前鋒腳下，後者反而更加直接。長傳只係個波飛得遠唔遠；真正嘅直接程度，睇嘅係球隊用幾多時間、幾多腳傳送，同埋幾快將個波推去危險位置。

所以伊拉奧拿上任之後，利物浦唔係突然放棄後場組織，見波就斬。雲迪克五場都係後場組織入面最重要嘅球員，利物浦亦會由兩名中堅慢慢互傳，等對手露出空位。

分別係，一旦前面條路出現，佢哋會行得比以前快。

頭五場最明顯嘅例子，仍然係加普同伊薩。加普頭三場都係利物浦陣中xT最高嘅球員，即係佢嘅傳球同帶波，最常將攻勢推去更加危險嘅位置。第四場佢只係後備踢35分鐘；第五場重返正選，立即再次排全隊第一，兼送出3次射門助攻。五場合計，佢仍然係利物浦陣中xT最高嘅球員。

對森林，佢助攻伊薩；對葉士域治，再連續兩次送伊薩入波。

葉士域治嗰兩球更加啱啱好示範咗，直接足球可以有兩個樣。

第一球由攻勢開始到伊薩射門，只係三秒，加普接波之後即刻送穿防線。第二球就完全相反，利物浦先喺後場來回組織接近四十秒，等對手陣形開始移動，再由雲迪克搵到加普，加普一腳劏入去俾伊薩。

一球快，一球慢，但最後嗰個決定都一樣：見到前鋒有空間，就即刻俾。

對般尼茅夫亦係同一道理。加普全場不斷將個波駁入域斯同伊薩嗰條線，單係由加普送到域斯嘅傳球，已經製造咗兩次射門；送俾伊薩亦再製造一次。

所以利物浦目前最明顯嘅進攻改變，未必係長傳多咗，而係少咗一種「不如傳多兩腳先」嘅猶豫。伊拉奧拿唔係要求每球都大腳斬上去，而係想球員更早發現，幾時已經無需要再兜圈。

只係條路知道要向前行，唔代表每次都接得通前鋒。

第四場對富咸，加普先列後備，伊薩踢足95分鐘，全場只有5次傳球同3次禁區掂波。利物浦仍然試過喺前場搶返個波，14秒內經域斯送到伊薩起腳，但成場無辦法穩定重複。

去到般尼茅夫，加普重返正選，利物浦前場幾個人之間又重新接通。呢個未足以證明「無加普就唔識踢」，但至少反映伊拉奧拿套直接足球，仍然需要一個識得由邊線接入中路嘅人幫手開門。

三、方向睇到，完成度未夠

咁頭五場實際效果又點？

利物浦五場加埋有76次攻門，對手係56次；黃金機會係14比5，整體預期入球亦以11.87比5.65領先。單睇大方向，伊拉奧拿唔係亂鳩咁改，隊波製造出嚟嘅攻勢比9分反映出嚟更好。

但最值得留意嘅，反而係另一組數字。

五場加埋，利物浦只有88次禁區掂波，全部對手夾埋反而有89次。即係利物浦入禁區嘅次數並無壓倒性優勢，但佢哋製造出嚟嘅黃金機會接近對手三倍。

般尼茅夫一戰就係最直接嘅示範。利物浦全場只有12次攻門同13次禁區掂波，兩項都唔算多，禁區掂波甚至少過對手嘅17次。但佢哋製造到5次黃金機會，般尼茅夫只有1次，xG亦以2.11比1.01領先。

換句話講，禁區掂波只會話俾你知個波去過幾多次，唔會話俾你知入到去之後發生咗乜。利物浦目前嘅方向，唔係靠不停塞個波入禁區堆數字，而係條路一旦打開，就盡快將攻勢變成真正有威脅嘅機會。

當然，未穩定亦係事實。

對紐卡素，雙方願意放開手腳嚟踢，利物浦全場有27次攻門。呢種你一拳我一腳嘅比賽，最啱伊拉奧拿胃口。

去到森林，利物浦有69%控球，攻門跌到13次，但仍然製造到4次黃金機會。對葉士域治，佢哋開波九分鐘已經由伊薩入晒兩球，但成場只有10次攻門、1次黃金機會同1.32 xG。

富咸一場就更加古怪。利物浦有14次攻門同1.99 xG，睇落唔差，但全場無製造到黃金機會，禁區掂波亦只有15次，反而少過富咸嘅24次。

然後下一場對般尼茅夫，禁區掂波仍然唔多，卻突然製造出5次黃金機會。

即係五場入面，攻門最多嗰場和波，產量最低嗰場贏波，xG唔差嗰場可以食白果，攻勢次數唔多嗰場反而連續劏入心臟。足球就係咁，場面、過程同結果之間從來唔會乖乖排成一直線。

呢個亦正正係伊拉奧拿由般尼茅夫升級去利物浦，最難解決嘅問題。

般尼茅夫年代，好多對手願意控住個波攻佢，伊拉奧拿自然可以設陷阱、搶波，再利用對方身後嘅空間。上季般尼茅夫控球超過55%嗰13場聯賽，只贏過1場，某程度已經反映，當對手唔肯主動行入陷阱，佢哋就會踢得辛苦好多。

但利物浦唔同。

大部分對手見到利物浦，第一反應都係縮後、塞中路、等你自己攻。伊拉奧拿唔可能每星期坐喺度等人踩陷阱，有時要親手捉住對手，再夾硬塞對面個頭入個陷阱入面。

所以佢真正要做嘅，唔係將利物浦變成一隊更有錢、球員更勁嘅般尼茅夫，而係保留原本嘅迫搶同向前意識之餘，補上一套可以長時間控制比賽、穩定拆開防線，而且唔會一失手就被人反劏嘅方法。

頭五場睇落，迫搶已經裝好，向前嘅方向亦好清楚。對般尼茅夫更加證明，利物浦唔一定要先將對手迫到爆炸，先識製造機會。

只係一場可以製造5次黃金機會，上一場又可以食白果，證明部機雖然識行，輸出仍然未夠穩定。

最麻煩嘅對手，係知道自己想做乜

作為車迷，我唔需要每個星期追晒利物浦九十分鐘，亦唔打算睇五場波就走去教利迷點樣睇自己隊波。今次做呢個系列，同我開頭講嘅一樣，純粹係唔想永遠等到交手甚至輸波之後，先突然發現原來對手已經變咗另一個樣。

至少下次遇到利物浦，我哋知道，對住佢哋最危險嘅唔係一腳四十碼長傳，而係當你以為自己避過第一個人，第二、第三個人已經開始收網；當你以為雲迪克仲喺後場慢慢傳緊，加普同伊薩其實已經等緊嗰一下前插。

當然，五場波唔足夠證明伊拉奧拿會成功。迫搶被打穿點算、加普被封鎖點算、比賽唔照住自己節奏行又點算，佢仲有大把功課未交。

但對手有問題並唔可怕，最怕係對手已經知道自己想點解決。

車仔，準備好對利物浦未？