【球探報告】車仔睇中18歲「誠實仔」　Honest Ahanor到底邊Q個？

18歲先做意大利人，轉個頭已踢大國腳

Ahanor喺意大利出生，父母來自尼日利亞。一歲時全家搬到熱拿亞，五歲加入球會青訓，由U17、U18一路跳級，仲協助球隊贏過U18全國冠軍。

2024年，佢以16歲零7個月之齡首次為熱拿亞正選上陣，對手仲要係祖雲達斯。一隊生涯只係踢咗六場，阿特蘭大已經肯用連附加條款接近二千萬歐元將佢買走。上季Ahanor再交出35次上陣，當中包括9場歐聯，18歲已經由「有潛力」正式升級成「落場踢得幾好」。

佢嘅國際賽履歷就更加離奇。由於意大利入籍制度，Ahanor一直要等到18歲先正式取得國籍；結果三月先入選U21，六月已經跳級入選意大利國家一隊。等咗十幾年先拎到個意大利身份，三個月就唔小心入咗意粉國家隊，唔知我仲以為佢係咩備受期待嘅超級金童球星。

披住中堅皮嘅後場爆破手

背景講完，要講佢點踢波。Ahanor身高1.84米、左腳，主要踢阿特蘭大三中堅左側，亦可以兼任左閘同左翼衛。齋睇規格，的確好容易令人諗起哈圖；但兩個人真正相似嘅，大概只有膚色。

哈圖比較似一個可以Invert入中場、參與傳接同提供最後一傳嘅混合型後衛；Ahanor就無咁斯文。佢唔係企喺後場等住放長傳嘅類型，而係見到對手壓前，就自己帶住個波直踩入中場。過咗第一重逼搶之後，交完波亦唔會乖乖返位，反而繼續Overlap、內切，甚至一路衝入禁區做額外接應點。

對布魯日一戰就睇得最清楚。Ahanor幾次由後場直接帶波破壓，交波後繼續向前跑，最終踩入禁區參與攻勢。數據亦反映到呢種奇怪體質：佢每90分鐘只有0.33次成功盤扭，但有1.77次對方禁區觸球，仲可以博得1.83次犯規。即係佢唔係企定定同人玩Step Over，而係見到條路就一啖氣衝落去，逼到對手要伸腳截停。

呢種侵略性同樣出現喺防守。Ahanor每90分鐘有2.36次Tackles、1.51次攔截，整體對抗成功率59.6%。佢鍾意主動離開防線，搶喺對手接波之前落腳；就算第一下失手，亦可以靠長步幅同爆發力回追。阿特蘭大嘅三中堅體系啱啱好提供咗安全網，等佢可以放心衝出去咬人。

當然，18歲嘅價錢亦包含18歲嘅唔成熟。Ahanor傳球成功率有89.6%，但長傳成功率只有38.2%；空中對抗成功率55%，亦未算係可靠嘅制空點。佢過度依賴左腳，主動上搶有時又會畀人引離防線，上季更加領過一張紅牌。速度可以幫佢補鑊，但如果長期要靠身體質素執返位置判斷嘅手尾，去到更高水平遲早會出事。

所以Ahanor最吸引同最危險嘅，其實係同一件事：佢可以將一次截球直接變成向前推進，但一旦第一步判斷錯誤，留低嘅就唔係Highlights，而係一個單刀波。

同一副混合外殼，三套唔同玩法

講到左腳、左閘同左中堅通殺，車迷第一時間自然會諗起哈圖；再將時間線拉長少少，其實兵長亦行過一條相似嘅路。高維爾細個由左翼轉踢左閘，到U15左右先固定成為中堅；哈圖就長期喺左閘同左中堅之間切換；Ahanor則由左閘、左翼衛一路發展成阿特蘭大嘅進取型左中堅。

由形狀睇，兵長已經最徹底中堅化，傳球量、長傳同制空佔優，角色比較似後場中央處理器；哈圖最平均，保留最多邊閘式盤扭同製造機會能力；Ahanor就最進取，對方禁區觸球、博得犯規同主動攔截特別突出。

當然，三人來自唔同球季、聯賽同位置，張圖只係用嚟比較角色，唔係話邊個能力值最高。佢真正想講嘅只有一件事：三個人雖然部主機嘅機殼差唔多樣，但入面裝住嘅Hardware完全唔同。

兵長係由左路一路退後，最後成為出球中堅；哈圖可以喺兩個位置之間自由切換；Ahanor就啱啱相反，明明企喺中堅位，但個人卻由頭到尾都想向前衝。

所以佢唔係另一個哈圖，亦未係下一個兵長。誠實仔暫時只係三人之中最Raw、最鍾意自己撞穿第一重逼搶，同時亦最未識收韁嗰一個。

總結：十劃都未有一撇，當識多個球員

車路士現階段只係查詢同監察，連正式報價都未出現，十劃都未有一撇。依家就討論應唔應該買、買返嚟踢邊個位，甚至驚佢阻住哈圖發展，未免早得有少少誇張。BlueCo份觀察名單隨時長過我哋IG Follow靚女嘅List，今日傳一個，轉會窗閂咗之後無人再提亦完全唔出奇。

不過當係識多個球員，其實又無壞。至於車路士係真心想買、BlueCo純粹例行睇貨，抑或過幾日就有另一個2008年出世嘅細路取代佢登上新聞，暫時無人知。至少下次再見到「Chelsea interested in Honest」，大家已經知道記者唔係突然稱讚我哋班總監老實，而係誠實仔又返咗嚟。