【車迷觀點】借到維拉仍列後備 加拿祖今鋪係咪玩x完?

加拿祖,嗯,識行路同踢波嘅流量密碼。
雖然一講起佢,唔少曼迷依然會咬牙切齒話佢反骨、態度差,我完全明點解大家會咁諗;但公道少少,起碼喺車仔呢一年半載,我對眼見到嘅加拿祖,算係收起咗少爺脾氣、乖乖地修心養性。
之前寫文都講過,佢今個夏天唔肯留多季證明自己,我個人係覺得幾可惜嘅。不過既然人各有志,佢揀咗去維拉,我當然亦真心祝福佢喺嗰邊踢出個名堂。嗱,我認我有少少私心㗎。加拿祖踢得多啲,車仔就有機會早啲見到維拉觸發買斷條款,幫盤數鬆一鬆。曼聯到時仲有分成,相信曼迷對呢份「祝福」都幾有同感。
之但係,時間去到十月,打開維拉張出場名單,呢位金毛仔依然坐緊冷板凳。《The Athletic》喺 10 月 8 日就出咗篇專題報告,同大家交待佢喺維拉公園嘅處境。連當初點名想簽佢嘅艾馬利都仲未肯放佢落場,究竟加拿祖今鋪係咪真係玩X完?家陣已經11月,我哋嚟望下加拿祖搞成點。
連輪換都無,的確幾令人失望
截至TA 10月8日出稿,加拿祖喺英超後備落場三次,夾埋31分鐘。到11月7日,正式比賽加埋有95分鐘,比當時多咗64分鐘。但拆開一睇,英超只係多咗對富咸嗰3分鐘。等咗差唔多一個月,佢喺聯賽仍然等緊一次似樣嘅機會。
回帶睇返上季喺車仔,佢英超點都叫做踢咗 1,268 分鐘,交出 1 球 4 助攻。呢個產量當然有大把改善空間,而我當初想佢留低,正正就係想睇下佢第二季可唔可以搶到個正選位。最後佢揀咗去投奔一直好欣賞佢嘅艾馬利,照計換個新環境、又有伯樂照住,應該好快有運行啦?
點知去到十月,莫講話正選,佢連常規輪換個位都未摸到。最令人擔心嘅唔係英超坐波監,而係九月場聯賽盃對高雲地利:艾馬利嗰場一口氣換咗七個正選,擺明係留俾班副選同新兵搵狀態,結果加拿祖依然由頭坐到尾,一分鐘都無。連呢種盃賽都排唔到佢,好明顯佢喺艾馬利心目中嘅出場順位,已經跌到去相當後嘅位置。
因為唔想留喺車仔坐後備,結果換咗件紫色波衫,無諗過仍然係坐後備席。對於想睇佢吐氣揚眉(同埋想順利收錢)嘅車迷嚟講,呢個開局的確幾令人洩氣。
當然,正式比賽夾埋得嗰 95 分鐘,只係得一場多少少,我哋好難評論佢喺場上踢成點。但眼下最赤裸嘅問題係:點解一個由艾馬利親自拍板簽返嚟嘅翼鋒,去到要用人嗰陣,領隊自己都會猶豫?
準備追唔上,爭位就更加辛苦
睇返佢加盟維拉前後嘅經歷,其實答案好簡單:加拿祖今次,又双叒輸咗喺起跑線。
翻查返 TA 篇報道,佢今個夏天忙住搞離隊手續期間,完全錯過咗車仔嘅 Pre-season,主要都係自己單機訓練,搞到去維拉報到嗰陣,體能水平本身就偏低。然後禍不單行,跟隊去亞洲之旅嗰陣又撞正腦震盪,連對 PSG 場超級盃都無得踢。對一個急需融入新環境、搶正選位嘅新兵嚟講,季前呢段時間本來係用嚟儲氣、夾熟隊友同摸清領隊底線嘅黃金期,偏偏佢個準備過程就一截截咁斷開晒。
呢點亦係我最覺得可惜嘅地方。舊年寫加拿祖嗰陣,我已經提過佢季前準備不足嘅問題,落到場踢亦暴露出唔識同隊友配合、無球防守參與度低嘅死穴。去到新球會,佢本來已經有一大堆戰術功課要補交;依家連最基本嘅體能底都未打好,要佢一邊喘住氣追 Fitness,一邊即時消化艾馬利嗰套極度嚴密嘅戰術體系,難度自然係 Hell Mode 級數。
更麻煩嘅係,TA 話佢加盟初期信心偏低,跟維拉嘅訓練強度亦有啲吃力。踢過波嘅巴打都明,體能同心理從來都係掛鈎嘅惡性循環:副偈未掂,操練自然容易跟唔上節奏;操練落後又搞到遲遲爭唔到出場機會,到真係落到場嗰幾分鐘,個心自然更加怯、踢得更加綁手綁腳。當然,我哋無得企喺維拉訓練場邊睇足每課操練,實際情況有幾嚴峻,暫時都只可以由 TA 嘅內幕同艾馬利嘅選人決定去推敲。
況且,英超係一個唔會等人嘅殘酷 PvP 戰場,維拉喺左路亦唔係無其他牌可以打。嗰個位本身已經有老臣子麥堅頂住,就算簽咗加拿祖返嚟,球會轉頭一樣照買 Mbaye。對高雲地利嗰場踢完,艾馬利講得幾直接:有人排喺加拿祖前面。佢提到嘅 Hemmings 同 Mbaye 嗰晚都有正選,Alysson 亦有後備落場。加拿祖就由頭坐到尾。
傷患、斷開嘅 Pre-season 同埋跌落谷底嘅信心,全部都係擺喺眼前嘅實質阻礙。至於上季喺車仔已經見慣見熟嘅足球缺點:特別係點樣唔好淨係 Dup 低頭自己去、學識同隊友做撞牆配合,仲有甩波之後第一時間反搶回防等等,去到對戰術紀律有強迫症嘅艾馬利手下,呢啲功課佢更加係避無可避。
仲有人肯教,亦開始見到少少起色
我自己覺得加拿祖未至於玩X完。至少十月初 TA 出稿嗰陣,艾馬利仲願意等佢慢慢追返上嚟。之後歐聯同聯賽盃加埋,佢亦攞到61分鐘。離踢穩英超輪換仲有段距離,我會想睇埋佢下一步追成點。
艾馬利早喺佢離開曼聯嗰陣已經對佢流晒口水,今次借用交易亦係佢親自出手推動。根據 TA 篇報道,即使開季頭兩個月進度不如理想,艾馬利依然將加拿祖視為一個值得投資嘅長期 Project,維拉內部亦繼續有意留用佢。對一個狀態跌落谷底、急需重建信心嘅 22 歲後生仔嚟講,仲有領隊肯護住你、肯慢慢執你套基本功,呢個條件其實好奢侈。
而好彩嘅係,加拿祖自己亦開始交出少少回魂嘅訊號。十月國際賽期嗰陣,佢先喺對修咸頓嘅閉門友賽入波,跟住作客西維爾又入一球,總算見返少少起色。信心呢家嘢,喺訓練場跑幾多圈都補唔返,唯獨係將個波射入龍門先可以一滴一滴儲返嚟;呢個入波除咗幫自己止血,起碼亦俾咗教練團多一個理由去考慮放佢落場。
當然,友賽嘅對抗強度同英超真槍實彈完全係兩回事,入友賽波唔代表即刻可以升呢做正選。接下來我最想觀察嘅,係呢點微細嘅火苗,可唔可以幫佢由「坐足 90 分鐘」變成「穩定進入輪換名單」。先求有,再求好就可以。
肯改嘅人,我想再畀次機會
寫到最後,或者有巴打會問:人都借走咗啦,做乜仲對個過客咁長情咁在意?
我反而諗返自己點解一直對加拿祖無乜反感。無他嘅,因為喺史丹福橋嗰一年半載入面,我真係親眼見過呢個曾經俾人鬧爆反骨嘅金毛仔,肯收斂自己嘅脾氣、肯低頭做個順民。人誰無過,喺呢個充滿誘惑嘅球壇入面,一個廿歲出頭嘅球星肯認衰仔、肯改,其實已經好唔容易;當一個人努力嘗試緊改變、偏偏喺新環境撞板遇上挫折嗰陣,如果企喺場邊嘅全部都係擔定櫈仔等住睇佢折墮、笑佢玩完嘅花生友,試問仲有幾多人可以頂得住壓力捱落去?
曼迷有佢哋同加拿祖之間嘅恩怨,我完全尊重,亦無資格叫人一定要原諒佢。但作為親眼見證過「另一面加拿祖」嘅車迷,今次我願意付出耐性,繼續睇落去。未來喺維拉嘅正式比賽,如果佢出到嚟依然係 Dup 低頭盲衝、唔願回防踢到一 Pat 屎,我一樣會出嚟抽水;但如果佢肯一步一腳印咬實牙關追返上嚟,踢出應有嘅水準,我亦絕對唔會吝嗇我嘅掌聲(同埋順便祝車仔早日收到維拉張買斷支票)。
以前年少輕狂做過嘅嘢,佢要自己承擔返個代價;但往後付出汗水做出嚟嘅改變,我希望呢個球壇,亦有人肯張開眼睇見。
