車迷觀點

【車迷觀點】戴納落車仍未搵返射門鞋 森林今次係咪接錯火棒

發布於

上一篇寫完積臣,見到佢喺維拉有進步,多少都有啲追開嘅角色終於升Level嘅感覺。跟住望返戴納,一種更熟悉嘅親切感就湧咗出嚟。

森林作客葉士域治踢成1:1,戴納重返舊地,最後都冇入波。睇住佢喺前面衝衝撞撞,去到埋門嗰下又交唔到貨,嗯,仍然係我哋熟識嘅戴納。森林球迷睇到頭痕,車迷睇到可能會點一點頭:係呀,我哋上季都係咁過。

諗返一年幾前,佢仲係轉會市場上備受追捧嘅年輕前鋒。喺葉士域治入咗12球,年紀輕、有身形、有衝擊力,換個更強嘅環境,身邊有人識餵波,仲唔入波多過夏撚、腳腳都法法聲?

結果車仔試咗一季,今季輪到森林。當年令人期待嗰個戴納,去到今日究竟仲剩幾多?趁住寫完積臣,今次就接住睇埋另一位前車前鋒。(嘩屌,前車前鋒好繞口)


嗰12球,令大家期待咗幾多?

葉士域治嗰季,戴納最重要嘅工作,係幫球隊將個波帶離後場。隊友捱打捱完一輪,搶返個波,前面需要有人接得住、頂得住,最好仲可以自己帶埋上去,等全隊有時間離開禁區殺上前線。戴納可以同中堅糾纏,亦有轉身向前衝嘅能力,正好符合呢種需要。

Opta季後統計,佢喺2024/25球季有26次帶波至少五米之後完成射門,係當季英超中鋒最多。佢能夠喺較遠位置接波,靠自己推到起腳,對一支經常受壓嘅球隊相當有用。後場辛辛苦苦搶返個波,前面有人可以幫手拉遠條戰線,至少唔使未抖順條氣又守過。

12個聯賽入球,加上年紀唔大仲要係英人,市場自然會有想像空間。

而嗰季嘅埋門,確實有交到貨。扣除兩個十二碼,戴納入咗10球,對應8.29非十二碼xG;62次非十二碼射門有28次中龍,中龍率約45%。佢將機會處理成有威脅射門嘅表現唔錯,實際入球亦高於預期。帶波衝擊可以幫球隊推前,去到埋門又入到波,呢兩樣加埋,足以令買家期待佢去到更好嘅環境,可以再行前一步。


衝得返,射唔返

去到車仔………唔講我以為佢俾人交換咗靈魂。

我們交換了?

上季28次英超上陣,當中12次正選,最後只入一球。傷停同斷續上陣令佢難以建立節奏,而場上原有嘅作用亦縮水。每90分鐘前進帶球由葉士域治時期約2.28次,跌到1.04次;以前接波之後可以一路衝到對手頭痕為止,喺車仔就少咗好多呢種畫面,頭痕嘅,變咗車迷。

一個主要武器用得少,另一邊嘅入球又補唔返,車迷睇到火滾好正常。至於換個地方會唔會好啲,森林今季已經開始俾緊答案。

先講有返起色嘅部分。恭喜晒戴納今季每90分鐘前進帶球回到約2.21次,接近葉士域治水平。事實證明佢仍然可以帶住個波向前,靠衝擊力參與進攻,森林繼續用佢有實際理由。

衝多咗,射門機會亦自然多咗。每90分鐘非十二碼xG由葉士域治嘅0.27、車仔嘅0.25,升到森林嘅0.42。至少今季呢七場,佢已經得到一批足以令人期待更多入球嘅機會。

結果20腳射門,只有三腳中龍。

廢事有偏頗,我特登逐腳拆開,當中6腳被封阻,餘下14腳仍然只得3腳中龍。葉士域治嗰季,同樣扣走十二碼同被封堵嘅射門,佢有47腳射門、28腳中龍。以前出到腳,過半數可以射向龍門;今季出到腳,連四分一連門框都唔中。對手封堵有影響,餘下嗰批射門嘅處理同樣差。

射門前後嘅威脅變化,更直接見到問題。森林今季俾佢嘅射門累積2.68 xG,起腳之後只剩1.03射門後預期入球(PSxG),最後入咗一球。PSxG會按射門落點等因素評估起腳後嘅威脅,射偏同被封堵都冇中龍價值。按呢套模型,佢得到嘅機會,有相當部分喺射出去嗰下已經流失。

呢個亦係今季戴納令人唔滿意嘅地方。森林已經搵返佢部分帶波用途,佢亦有更多射門,偏偏去到最需要完成嗰下,仍然交唔到貨。車仔嗰季可以討論用法、傷停同節奏,今季換咗環境,個9號魔咒仍然纏住佢唔放。


好彩,頭痛嘅已經唔係我哋

睇完呢段表現,再望返車仔今次賣人,我估唔少車迷真係瞓著都笑醒。

£30m買入,試咗一季發現唔Work,最後居然可以用報道£45m基本轉會費、另加最高£5m附加條款放走。實際賺幾多仲要計條款同其他成本,但經歷咗咁嘅一季,仍然搵到買家付出高於買入價嘅費用,呢單交易真心無得輸。

買年輕球員總有試錯嘅時候,最頭痛就係試完唔得,之後年年外借、年年搵下家,人工照出,個位又卡住。戴納呢次,車仔做咗決定,亦成功甩身。佢仲有幾多潛力、要用幾耐先搵返狀態,依家輪到森林去諗。

當然,我唔係希望戴納一沉不起。佢曾經踢過嗰季好波,我亦想知佢可唔可以搵返當時嘅埋門。但睇呢一刻嘅表現,件事的確有少少難搞。

好彩,今次頭痛嘅已經唔係我哋。