【車迷觀點】清湖喺車仔自己話晒事　但新球場仍然遙遙無期

一、中環有塊空地，你就可以起球場？

試諗下，如果中環突然有塊夠大嘅空地，港鐵又到、交通又方便，喺度起個六萬人球場，去又快走又快，係咪諗起都覺得正？睇完波落蘭桂坊飲兩杯，贏波慶祝，輸波借酒消愁。嗱，球迷角度，呢個配套我俾滿分。

但地主可能想起甲級寫字樓，發展商可能想賣豪宅，附近居民可能想要公園，政府就想增加住宅供應。你拎住個球場模型同人講「呢個位真係好適合踢波」，人哋可能覺得你痴Q線Only。

換成倫敦，Earl’s Court當然唔係中環，但道理差唔多。一幅喺成熟城市入面，交通方便、面積又夠大嘅土地，唔會因為暫時未起樓，就代表無人有打算。車迷望落去見到嘅係新主場，其他人見到嘅可能係住宅、辦公室、夜繽紛甚至係自己籌備咗幾年嘅生意。

負責發展嘅ECDC已經有一套相當具體嘅方案：約44英畝土地，提供約4,000個住宅，連同工作空間、文化設施同公共綠化地方，整個項目估計發展成本達到100億鎊。留意，呢個係發展成本，唔係話清湖拎張支票出嚟寫住100億就可以成幅地皮買走。

而且Hammersmith & Fulham同Kensington & Chelsea兩區嘅規劃委員會，分別喺去年11月同12月通過批准決議一個無球場嘅方案，所以車仔想搬入去，要傾嘅唔止係價錢。買邊部分土地？發展商肯唔肯調整方案？原本嘅住宅同其他設施點處理？改完之後，規劃要求又點滿足？你話球場可以帶動人流同消費，人哋亦有自己嗰套住宅、就業同公共設施嘅理由，要傾，簡直難到核爆。

二、向外無位，向上起到魁地奇咁得唔得？

咁搬屋咁煩，不如留返喺史丹福橋啦。唔夠位就買旁邊啲地，拆幾棟樓，擴大個球場，搞撚掂。

但倫敦啲地唔係你玩大富翁，行到嗰格，俾錢就買得。地貴已經係一回事，人哋肯唔肯賣又係另一回事。就算買到，原本起住宅嘅地方可唔可以改成球場，拆樓起樓會點影響附近居民，都仲要傾。史丹福橋旁邊仲有鐵路同Brompton Cemetery，你總唔可以叫架火車兜個圈，順便問埋隔籬班先人介唔介意搬屋。

既然向外咁難，咁不如向上起？加多幾層看台，起到哈利波特個魁地奇球場咁款，大家坐高啲，順便睇埋倫敦夜景，反正車仔攻擊線間中都會將個波射上天，啱晒。

偏偏連向上都有限制。Richmond Park有個叫King Henry VIII’s Mound嘅地方，可以望到遠處嘅聖保羅大教堂，而呢條望過去嘅視線係受保護嘅。史丹福橋重建，就要考慮會唔會遮住呢個景。倫敦政府早喺2015年同球會討論方案時，已經點名提過呢件事。即係你想加高看台，唔止要睇附近啲樓，連遠處有人望唔望到教堂，都關你事。

咁又唔代表史丹福橋永遠唔可以擴建。油王年代嗰個六萬座方案，2017年確實獲得規劃批准。但你睇返當年點做，就知唔係加幾排櫈咁簡單：球場要向旁邊兩條鐵路上方延伸，連運送建築組件入場，都受到通道同重量限制。圖就畫得好靚，起嗰陣要解決嘅嘢，遠遠多過我哋望住張效果圖會諗到嗰啲。

仲未計拆晒重起嗰幾年，車仔去邊度踢。借另一個球場，唔係打個電話問「下季借嚟用吓得唔得」就搞掂，人哋有自己嘅賽事同活動，租幾耐、點安排，全部要傾。對習慣去史丹福橋嘅球迷嚟講，仲要連續幾年改去另一個地方睇波。話就話起返喺原址，但中間嗰段日子，照樣要搬一次屋。(除非倫敦有另一隊波唔小心降咗班，個場又大又靚又等英超球隊用啦………係咪呀熱刺？)

所以「留返喺度咪得囉」，其實都無想像中咁得。只係搬出去嘅難題未解決，留低嗰堆已經等緊你。

三、無原地踏步，但真係舉步為艱

咁買咗車仔四年，仲喺度研究，清湖到底有無做過嘢？

有。至少買地嗰步唔係齋吹。BlueCo喺2024年完成收購史丹福橋旁邊、屬於退伍軍人慈善機構Stoll嘅1.9英畝用地。原址重建一直都有做準備，唔係Earl’s Court俾人拒絕之後，先突然醒起自己仲有個史丹福橋。

搬走嗰邊亦一路有諗緊。《City AM》今次一邊報道發展商話無球場，一邊亦指出車仔仍然考察Earl’s Court同其他選址。即係對方公開講緊自己想做乜，車仔就繼續搵機會，暫時未有一個雙方都接受嘅答案。話新球場玩撚完，未算；話就嚟有得搬，亦無根據。

清湖而家自己話晒事，可能真係有幫助。以前想買邊塊地、使幾多錢，都可能要先同其他老闆傾掂；而家少咗一班人拉扯，至少自己想點做，可以快啲有決定。BBC記者Nizaar Kinsella亦認為，今次股權變動可能令決策順暢啲，但球場計劃仍然受到外部因素拖住。

問題係，清湖嘅獨裁範圍只限車仔。你喺董事局拍完枱，行出去同地主傾，人哋唔需要聽你支笛。唔係話老闆有錢都無用，而係要將幾班人嘅要求傾到埋，錢只係其中一樣。

仲有CPO。佢哋持有史丹福橋永久業權同球會名稱相關權利，車仔想搬，亦要同佢哋取得協議。不過唔好未有方案，就先屌班球迷阻住發展。主席Chris Isitt之前接受《Standard》訪問時講得好清楚，股東有唔同意見，要睇過方案先知支持乜。搬去邊、起成點都未知，你叫人而家答應搬屋，換轉係我都會叫你講清楚先。

當然，球迷無義務因為你有買地、有傾過，就無限期等落去。四年過去，仍然未知道最後會點，心急有乜出奇？我都希望清湖今次集中權力之後，至少可以早啲講清楚車仔準備行邊條路。唔使聽日就開工，但總要有啲嘢俾大家睇，唔係每次新聞出嚟，我哋又由「搬唔搬」嗰度重新傾起。

結尾：想有個新屋企，點解咁難？

老實講，我都想有一日寫篇球場文章，係介紹新看台、新設施，順便研究自己買唔買得起張機票去朝聖。次次都寫地主、鐵路、景觀視線，唔知嘅仲以為我由足球專頁轉行做地產經紀。

睇熱刺個新場，我梗係羨慕。但如果問我，願唔願意為咗一個更大更靚嘅球場，永遠離開史丹福橋，我又未必答得咁爽快。想要新設施，又想保留舊地方嗰種感覺，連我呢個只需要坐喺度狗up嘅球迷，都唔係一句搬啦就講得出口。

所以今次望完啲資料，我反而少咗句「做乜仲未起」，多咗句「屌，原來真係咁難」。倫敦唔會因為車仔想有個新球場，就突然變出一幅大家都滿意嘅地。球迷可以繼續追問，但睇完呢堆難題，至少明白點解傾咗咁耐，仲係未有答案。