【車迷觀點】英超高薪榜上無車仔　低薪長約憑咩留住球員

人工開咁低，份約仲有傻仔簽？

搵工睇人工好合理，但真係收到幾份Offer，你又未必次次都揀月薪最高嗰份。合約幾長、有無機會上位、份工穩唔穩定、Office喺邊，全部都係條數入面嘅一部分。

年輕球員都一樣。眼前份週薪可能比其他地方低，但換返嚟係一份七、八年合約，同埋喺大球會爭取上陣嘅機會。對一個仲未完全踢出身價嘅球員而言，呢份保障有實際價值。足球員職業生涯得十幾年，仲要隨時一腳俾人踢傷，之後條路完全唔同。你肯用幾多年去保障我，我自然會將呢樣嘢計入叫價。

球會嗰邊亦有自己盤算。買入潛力球員，本身已經承擔緊發展風險，如果連人工都一開始開到球星級，之後踢唔起，清人就麻煩 (望向曼市紅色某隊)。買家要俾轉會費，仲要接得住份糧；球員又無理由為咗方便你清貨，主動放棄原本簽好嘅待遇。打工仔無做錯，買錯人又開錯價嗰個先應該頭痛。

低底薪至少可以減輕呢部分壓力，但長約亦代表車仔自己要孭更長承諾。球員踢唔起、長期受傷，唔會因為球會一句「睇錯咗，唔好意思」，份約就自動消失。所以呢套做法有交換條件，球會同球員都有付出，無邊個可以穩賺。

而英超嘅財政環境，亦令呢盤數愈來愈重要。由2026/27開始實施嘅SCR，將球員及主帥薪酬、轉會費攤銷、經理人費等陣容成本，同球會收入及球員出售損益掛鈎，以85%為基本門檻。簡單講，人工用多咗，其他組軍用途嘅空間就會收窄，老闆有錢都唔代表可以無限加碼。

順帶一提，英超早喺2023年12月已經將新簽或延長合約涉及嘅轉會成本攤銷限制為最多五年。今日再簽八年、九年，已經唔可以單純用「攤薄轉會費」解釋晒；合約年期本身提供嘅保障同議價空間，仍然有價值。

所以，初加盟嗰刻願意接受較低底薪，完全可以係球員計過數之後嘅選擇。真正難搞嘅，係佢幾年後再望下JobsDB，發現自己已經值另一個價。

變成球星之後，仲係俾新人價我？

去到呢度，BlueCo個算盤其實唔難明：唔係想所有球員一世收低薪，而係唔想你仲未踢過半場好波，就預先當球星出糧。新人價入職，踢得好先再加，至少聽落幾公平。

球員合約入面本身會有唔同獎金，表現達標、球隊有成績，收入自然會向上調。不過打工仔都知，Bonus還Bonus，加人工還加人工，兩回事嚟。公司今年生意好派多兩個月糧，當然值得開心；但如果你已經由普通員工做到部門精英，下年張糧單個底薪仲係完全無郁過，睇怕都係時候約老細入房飲杯咖啡。

至少目前睇到，車仔又唔係完全唔肯加人工。彭馬加盟一年後，已經喺2024年夏天續約兩年，將合約延長至2033年；卡些度亦喺2026年4月簽下新約至2033年，《Guardian》報道佢會因為過去幾季嘅表現獲得加薪。

兩個人原本份約都仲有大把時間，車仔如果真係只想靠長約㩒住球員，根本可以扮睇唔到，等多幾年先算。但球會最後仍然選擇提早重新傾條件，至少證明BlueCo口中嗰套「踢得好就有回報」，唔係得個講字。

不過，老細肯加，同員工覺得加得夠，從來係兩回事。

你由五萬加到六萬，喺公司入面可能已經升得算快；但隔籬幾間公司同級職位開緊八萬、九萬，獵頭又不斷問你有無興趣傾兩句，咁你一樣會心郁。球員都唔會淨係望住車仔內部張人工表，仲會睇下同級球員喺其他球會收緊幾多。

當然，網上流傳嘅週薪榜口徑相當混亂，有啲只計底薪，有啲可能連獎金都撈埋，張圖唔足以證明彭馬或者卡些度實際少收幾多。不過佢帶出嗰個問題仍然存在：車仔可以自己建立一套人工標準，但唔可能叫外面個市場一齊跟。

正選地位、長約保障、生活環境、爭標前景，全部都可以令球員接受唔係最高嗰份Offer。祖奧柏度、羅渣士呢類球員今季仍然肯簽，至少證明車仔份Package唔係完全無吸引力。但當一個球員愈踢愈好，人工差距亦愈拉愈遠，最後都係要返去最現實嗰句：你肯加幾多？

彭馬同卡些度已經證明車仔肯加。下一次再傾，先至係考驗球會到底肯加到幾高。

長約留得住份約，留唔留得住個人？

咁如果最後真係傾唔埋呢？

長約去到呢一刻，就會發揮另一個作用。佢唔會令球員突然愛球會愛到海枯石爛，亦阻止唔到人哋想轉工同舊上司重聚；但球員仲有幾年合約，其他球會想帶佢走，就唔係同經理人傾掂Personal Agreement，然後執衫走人咁簡單。

仲要問過車路士肯唔肯。

出價夠高，無話邊個一定唔賣；出價唔夠，唔該下季請早。至少車仔唔會等到份約得返一年，明知對方㩒住搶，都要焗住收個友情價。所以話「低人工實留唔住彭馬、卡些度」，我會話佢只講中一半。佢哋可以要求加薪，可以想走，但想走唔代表可以走得咁輕鬆。

我對呢件事又唔係特別在意。球員真係想走，買家又願意用天價買斷份合約，咁賣亦唔係世界末日。車仔近年成日買後生球員，本身就預咗有人踢得起、有人踢唔起，亦有人升值之後成為市場目標。低薪長約其中一個價值，正正係球員要離開時，球會仍然可以收返足夠轉會費。

只不過，銀行戶口收到錢，同球場上搵得返同一個人，係兩件完全唔同嘅事。

一個已經適應英超、戰術同隊友嘅核心，唔係開Transfer Market撳幾下Filter，就會自動彈出平價同款。新球員要轉會費、要人工、要時間適應，買返嚟仲隨時貨不對辦。賣走彭馬或者卡些度，條數可能靚到識發光，但抽中下一張SSR之前要食幾多張R卡，無人答得到。

去到呢度，車仔要計嘅就唔止係加薪後每年多支出幾多，仲要計賣走佢之後，搵個替代品要俾幾多錢、等幾耐，同埋承擔幾大機會率中伏。有時打破少少薪酬級距留住核心，可能反而係最平嗰個選項。

但人工又唔可以見一個加一個。今日一個核心升到頂薪，聽日另一個表現差唔多嘅自然會拍門；新援經理人見到隊內有人收緊呢個價，叫價亦會跟住升。最後又變返以前嗰種人送唔走、貨換唔到，個個坐喺長約上面嘆冷氣，咁就真係成個改革白做。

所以我唔覺得車仔需要因為一張高薪榜，就立即推倒成套低底薪、長約、重獎金制度。球會目前買到人，亦有為踢出身價嘅核心提早改善合約，至少證明套玩法仲行得通。

真正考功夫嘅，係分得出邊個值得加，邊個可以賣，邊個就算經理人拍爛張枱，都唔值得跟價。

加人工唔等於破壞薪酬架構。唔識揀人加，先係。

高薪榜上有車仔，未必係壞事

所以再望返開頭張圖，英超高薪頭20位無車仔，我唔會特別驚，有無人上榜，本身就唔算係咩話題；我更想在意嘅，係班球員踢起之後，車仔仲有無本事留低佢哋。

我唔介意車仔高薪榜上無人。但如果連續好多季都無，我先會開始擔心。

畢竟車仔一路贏落去，球員先會加薪加到頂，如果無，睇嚟戰績相當之………嗯。