【車迷觀點】車仔又搵到新嘅心口贊助　Circle係咪Blue Co解套嘅救星

Circle賣嘅係「數碼美元」…

先講Circle係做咩。由於佢嘅講法太商業，我睇文件譯覺得超出我嘅能力，所以有請GEMINI老師：

「Circle並非Binance或BingX類的加密貨幣交易所，主力產品是USDC，一款同美元掛鈎嘅穩定幣。用家投入一美元，Circle就發行一枚USDC；背後儲備主要由現金同短期美國國債等高流動性資產組成，等持有人可以按一比一兌回美元。

至於Circle的賺錢方式，原理其實比想像中傳統。

支持USDC的數百億美元儲備，Circle會從中賺取利息，再將部分收入分潤給Coinbase等分銷夥伴。USDC流通量越大、利率越高，公司賺得越多。」

唔知你明唔明，總之我盡咗責任………如果有巴打有自信可以解釋得比Gemini好，歡迎留言發表你嘅睇法。

總之，Circle睇落正正當當……但對車迷嚟講，更重要嘅問題始終係：佢同BlueCo有無關係？

我翻過Circle最新上市文件、主要股東、董事會、高層同IPO承銷團資料。現時公開披露嘅兩個外部大股東，分別係IDG Capital相關實體同Oak Investment Partners；創辦人Jeremy Allaire則透過擁有較高投票權嘅Class B股份，掌握公司約23.9%投票權。

成份名單入面，我自己就Search唔到Clearlake、Eghbali、Todd Boehly、Mark Walter或者Guggenheim，Circle管理層亦未見同BlueCo存在已知直接關係。

當然，枱面上無就唔代表佢哋私人無持股，話唔埋佢哋晚晚唱K我哋外人都唔知，但表面證供就話我哋知，今次暫時唔似Infinite Athlete，亦唔似將酒店或者女足由左手賣去右手。

Circle睇落真係一間外面公司，帶住真金白銀入嚟買車路士件衫個心口。

一年短約，先補返最貴嗰個窿

Circle係真街客，下一個問題自然係：佢實際畀咗幾多錢？

官方答案係，吳廣德，吳好緹。

車路士只確認Circle由2026/27球季起成為官方贊助，Circle同USDC個LOGO會出現喺男足、女足同青年軍心口，無公布金額，亦無寫明合約幾時完。

不過BBC官宣前已經報道，雙方接近簽下一份「initial one-year deal」。官宣用字亦幾有趣，只寫合作由2026/27開始，無好似之前IFS或者Twilio嗰啲公告咁明確使用「multi-year」或者「long-term」。

所以目前最穩陣嘅理解係，Circle固定承諾只有一季。「Initial」可能代表雙方有意合作落去，甚至預先設有某種續約機制，但未有證據顯示第二年已經傾好，更加唔知續約權喺邊一方手上。

至於金額，BBC只話交易「thought to meet valuation」，問題係車路士呢份心口贊助，市場上同時存在幾個完全唔同嘅估值。

球會上年有歐聯資格同世冠盃冠軍光環時，一直被指希望搵到每年£60m至£65m嘅長期合約。但今季無歐洲賽，獨立贊助估值機構The Sponsor將車路士心口位置估值降至£33.6m；另一方面，近期報道就指球會自己仍然認為價值約£45m至£50m。

所以「符合估值」唔可以自動當成Circle每年畀£65m。考慮到今次只係一年短約、車路士無歐洲賽，但權益又同時包晒男足、女足同Academy，我會將合理估算放喺£45m至£50m左右。

再戴多次頭盔，呢個係根據BBC用字同市場估值作出嘅推算，唔係已確認成交價。

而Circle可能只係第一炮。BBC同一篇報道亦提到，車路士接近完成新袖口贊助。FPT早前雖然宣布延長合作至2026/27，但新公告已經無再稱佢為袖口贊助，意味住嗰個位置大機會將會交畀另一間公司。

新袖口贊助商身份同金額仍然未公布，但如果做到約£10m至£15m市場水平，Circle加袖口兩份合約，合計有機會為車路士帶來約£55m至£65m收入。

呢筆錢最重要唔止令件波衫心口多返幾隻字，仲補返車路士過去幾年漏得最犀利嗰個窿。

Three離開之後，車路士先後搵過Infinite Athlete、DAMAC同IFS救火，但三次都係開季後先落實嘅短期安排。球會一直唔願意用低價鎖死長約，理念未必錯，代價就係最值錢嘅商業位置長時間無法折現。

Circle目前仍然只似係另一份一年合約，所以話車路士已經解決長期贊助問題，肯定係講得太早。但今季無歐洲賽，本身已經會失去一截轉播同比賽日收入；如果心口同袖口可以同時由季初開始賣出，至少補返其中一大部分缺口。

只不過，一間錄得£262.4m稅前虧損嘅球會，當然唔會靠件衫多兩個Logo就突然健康返。

真正令今次情況同過去幾年唔同嘅，係另外兩條數亦開始郁。

贊助、賣人、人工，三條線終於一齊郁

跟開我，都知我其實KEEP住MON緊車會財政，我堅係會睇財報，文亦唔係第一次寫，所以車仔個虧損，我只要搵返自己嘅筆記就會大約記得。

球會近年真正嘅問題係使錢速度長期快過自己賺錢。2024/25年度，車路士錄得£262.4m稅前虧損；UEFA亦因為球會違反足球收益同陣容成本規則，合共罰款€31m。BlueCo可以繼續注資，但喺PSR同UEFA規例底下，有錢唔代表可以無限倒落去。

要執返盤數，最直接得三個方法：開源、節流、賣人回血，降低每年球員成本。

而今個夏天，三樣終於同時發生。

第一條當然係上面講嘅贊助。

如果Circle份約真係接近£45m至£50m，再加一份約£10m至£15m嘅袖口贊助，車路士有機會由兩個最值錢嘅球衣位置，帶來約£55m至£65m收入。因為係直接收入，每一鎊收返嚟都可以直接幫球會改善收入同陣容成本比例。

第二條係賣人。

截至執筆時，外界統計車路士今夏轉會收入已經接近£200m。古古尼亞、戴納、積臣等交易，除咗帶來現金，亦可能製造相當可觀嘅賬面利潤。

足球會計最煩膠嘅地方，就係買同賣唔會用同一種速度入賬。攤銷、分期、人工等等嘅嘢，唔喺度重提啦。總之今夏賣人真正幫到車路士嘅，唔只係銀行戶口多咗接近£200m，而係一批可以即時入賬嘅轉會利潤。

第三條就係人工同每年攤銷。

每賣走一名一隊球員，球會同時移除嘅唔只係一份人工，仲包括獎金、剩餘攤銷，以及部分相關成本。過去車路士清走好多青訓同邊緣球員，賬面利潤可能好靚，但對人工總額幫助有限；今夏離開嘅就包括多名真正佔據一隊薪酬同賬面成本嘅球員。

當然，新加盟球員一樣要人工，巨額轉會費亦只係分期入賬，唔係憑空消失。車路士今夏買人支出仍然超過£330m，按現有估算，淨支出依然有約£130m至£160m，肯定未去到自給自足。

但淨支出只反映轉會費差額，唔等於當季財政效果。條數，作為外人就無辦法直接估到，但至少比前幾年不斷囤積球員、再靠內部交易救數健康得多。

單獨一份Circle合約，當然救唔到車路士。

但正常商業收入返嚟、大額賣人製造即時利潤，再加上一隊人工同攤銷成本開始清理，三條最重要嘅財政線，今次罕有地向住同一個方向行。

兜咗四年，終於開始正常做生意

老老實實，過去幾年每逢研究車路士財政，最後都會跌入同一個黑洞。

酒店賣畀自己、女足賣畀自己、八年長約攤銷，然後再研究Premier League同UEFA到底認唔認。BlueCo每次公布新操作，大家第一反應都唔係球會賺到幾多，而係班會計師今次又變咗咩魔術。

搞到今次Circle出現，我哋又自然先去查佢同BlueCo有幾多親戚關係。呢份不信任唔係車迷疑心重，而係BlueCo自己用四年時間儲返嚟。

但今次查完一輪，反而暫時無驚天秘密。

Circle似係一間真係有能力畀錢嘅外部公司；心口同袖口位置開始正常變現；一批球員亦真係賣得出價，順便移除人工同攤銷成本。

最諷刺嘅係，BlueCo兜咗幾年大圈，又玩財技又搞衛星球會又研究推廣方法，最後開始幫車路士解困嘅方法，係最普通嗰三樣：搵人落廣告、賣走唔需要嘅球員、控制每年成本。

當然，我唔會因為一份一年Circle合約，就話車路士已經財政自由。但「未上岸」同「完全無改善」係兩回事。

去到今個夏天，車路士終於向岸邊方向努力爬水………係，個身都仲濕緊，但至少見到終點先。