車迷觀點

【車迷觀點】施治頭部受傷二十周年 我哋睇慣咗嘅頭盔背後

發布於

講起施治,大家腦海入面浮現嘅,應該都係戴住黑色頭盔、企喺車路士龍門前嗰個身影。我哋睇得太習慣,習慣到有時見返佢未戴頭盔嘅舊相,反而會覺得好似少咗啲嘢。

直到今個月大馬受傷,先突然令我諗起:原來施治受傷已經過咗二十年。

2006年10月14日,車路士作客雷丁。嗰場波,好多老車迷應該仲記得,最後連泰利都要戴手套守龍。但每次重提呢幕奇景,總會諗返起開場嗰次碰撞,同埋攤喺地上嘅施治。

施治係我最愛嘅門將。二十年後回望,我最想了解嘅,係由佢離開球場,到戴住頭盔返嚟之間,究竟經歷過啲乜。畢竟,比賽有片可以重播,但鏡頭之外嗰段日子,我哋未必知道得咁清楚。


開場唔夠一分鐘,差啲就係最後一場

嗰場比賽先踢咗約20秒,施治就要出迎,俯身收走一個送入禁區嘅波。追住個波衝入嚟嘅雷丁球員史提芬亨特,膝頭撞中佢個頭,施治隨即倒地。

意外發生一刻

最初嘅畫面,甚至容易令人低估件事。施治仲曾經自己爬向場邊,之後先由擔架送入球員通道。古迪仙尼入替,比賽繼續,但施治嘅情況就喺離場後逐漸惡化,一度失去知覺。

而球場入面,惡夢仲未完。補時階段,古迪仙尼接應角球時同雷丁後衛Sonko碰撞,失去知覺,同樣要送院。最後泰利要着起第三門將希拉利奧件衫、戴上手套,頂住最後幾分鐘。車仔贏咗1:0,但一場波送咗兩個門將入醫院,邊個仲有心情慶祝。

泰利守龍

摩連奴當時嘅震怒,亦係呢件事令人難忘嘅一部分。佢指責亨特蓄意傷人,之後再批評施治等救護車嘅安排,令爭議由球場一路燒到場外。不過,雷丁同救護部門公開反駁,指救護車接報後七分鐘已經到場。當時施治嘅救治安排,就咁成為另一場爭議。

施治嗰邊,醫生確診佢係凹陷性頭骨骨折,骨碎向內陷入,需要轉到牛津專科醫院接受緊急手術,再用兩塊金屬板修補頭骨。仲保唔保得住條命,已經比幾時可以再踢波更重要。

佢多年後特別感謝隊醫Bryan English同醫療團隊嘅判斷,亦慶幸當日距離牛津專科醫院唔遠。我哋係未來人,知道佢最後武士,但喺嗰一晚,冇人可以預先保證呢個結果。


我哋記得嗰一下,佢反而唔記得

手術成功之後,施治最初面對嘅困難,係連簡單資訊都留唔住。

醫生會問佢而家幾點、身處邊度、知唔知發生咩事。佢清醒時聽過解釋,之後瞓返低,再醒返又唔記得晒,要由頭再聽一次。大約過咗三日,佢先開始留得住呢啲記憶。

呢度最令我在意嘅,係我哋可以反覆睇返嗰次碰撞,施治本人對嗰一下卻完全冇印象。佢後來講過,對太太嚟講,成件事比佢自己承受嘅更加難受。佢記憶空白嗰幾日,身邊人要清醒地等消息,面對所有未知。

所以,同一宗意外,佢自己同最親近嘅人,經歷嘅其實係兩回事。

受傷十日後,施治終於出院,但返到屋企仍然會嚴重頭痛,要靠藥物應付。當時醫療團隊以受傷後約三個月作為頭骨修復、恢復完整訓練嘅目標,但無人保證可以三個月後就一定踢得返職業足球。施治自己亦準備過,生涯可能就此結束。

復康期間,佢形容有時狀態好,可以做多啲;有時腦部承受唔到,就要停兩日。想操返好體能,亦要先等身體容許。

直到2007年1月,神經外科醫生確認,佢可以戴住保護裝備恢復合練。身邊仍然有人擔心佢喺心理同情緒上未準備好,但施治自己覺得,係時候。

1月20日,晏菲路。距離雷丁嗰晚98日,施治再次企喺車路士龍門前。

晏菲路照片

嗰場車仔輸咗0:2,佢當然失望。但施治賽後話,對佢自己嚟講,能夠上場已經係一次個人勝利。

對我哋嚟講,可能只係等咗98日,然後見返一個戴頭盔嘅門將上陣。對佢本人嚟講,呢段時間要先保住條命,再爭取保住球員生涯。


戴返手套,亦要戴住嗰晚留下嘅嘢

施治返到球場,嗰頂頭盔亦由復出裝備,慢慢變成佢嘅標記。我哋睇慣咗,但佢本人就戴得唔多舒服。

到2015年,距離受傷已經九年,施治仍然講過自己想除低頭盔,因為個頭盔遮住耳仔,會影響佢聽周圍嘅聲音。但醫生唔准,而且除咗亦會影響保險保障。

對門將嚟講,聽隊友叫聲、判斷周圍情況,本來就係比賽一部分。為咗繼續踢,佢亦要適應保護裝備帶嚟嘅限制。

至於係咪因為撞過一次,所以驚到一定要戴住先安心?施治自己反而話,因為唔記得嗰次碰撞,復出後再撲向對手腳邊,佢並冇特別驚。不過,佢亦清楚,頭盔唔能夠完全避免腦震盪。

佢接受咗風險,再喺需要嘅保護之下繼續踢。嗰頂頭盔一直跟到退役,嗰次傷帶嚟嘅影響,亦一直跟住佢。

而英格蘭足球亦有啲嘢要改。事件後,球員工會推動檢視嚴重傷患處理,球會之間嘅醫療資訊、醫療人員資格,以及比賽日急救安排都得到加強,包括場邊救護人員同待命救護車。

呢啲安排未必會令觀眾留意,但當下一個人出事,救援準備好未,就會突然變成全場最重要嘅事。


我最愛嘅門將

作為車迷,當然想自己最愛嘅門將永遠健康,最好連嗰頂頭盔都唔需要。但既然嗰晚已經發生過,我最慶幸嘅,係之後仲有十幾年時間,可以睇佢撲救、睇佢贏波,甚至睇佢失波之後黑面鬧隊友。仲有,就當然係睇住佢喺安聯球場一次又一次守住條白界,最後幫車仔贏得歐聯。

就算後來贏過好多嘢,受傷仍然唔可以當成一段勵志故事嘅必要章節。對施治同身邊人嚟講,嗰段日子能夠平安過去,已經值得慶幸。

二十周年,再望返嗰頂頭盔,我想記住嘅係:我哋之所以可以慢慢睇慣,係因為佢仲有機會繼續企喺嗰度。

希望大馬亦可以早日康復。