【球壇風向室】蜜月期過後嘅卡域克　識得變通但點擺脫米一久釀

發布於 2026年10月21日

之前有巴打問我點睇今季卡域克，本來睇完曼聯開季五場，諗住入國際賽期交功課。結果我自己拖拖拉拉，篇文一直無出街。拖到曼聯又和熱刺、又輸馬體會，再領先俾列斯迫和，佢哋每踢一場，我就要返去改文。再唔出，呢篇季初觀察分分鐘要直接改名做季後檢討或者死因研究。

所以今次決定，趕喺下一場歐聯之前交稿。曼聯可以暫停提供新素材，俾我寫完先，多謝合作。

卡域克……嗯，有夠神奇。上季尾帶住曼聯氣勢如虹，佢哋好似終於搵到個真命天子咁款；去到今季，又硬係chok住chok住，卡撚住條氣。有人怪占Sir無補強左翼同左閘，有人話中場實力唔夠，亦有人睇住前面幾個輪流踢中鋒，問點解仲未試完。

人腳有缺點，傷患亦真係影響選擇。不過今篇，我想將著眼點放返喺卡域克身上。同一班人點樣分工，對手封住條路之後點樣再搵出路，領先咗又準備點踢落去，始終有領隊可以處理嘅部分。

上季卡域克令曼聯踢返起，今季對手開始知道佢想做乜。咁佢手上，仲有幾多個答案？

一、中鋒不停換，前面嘅分工定好未？

錫斯高受傷之後，卡域克一直喺古亞、安保姆同舒克斯之間搵答案。人選有限可以理解，但三個人踢法唔同，換咗最前嗰個，其他人嘅工作亦要跟住改。

古亞鍾意墮後接波，再帶住個波向前；
安保姆最有威脅嘅地方，係跑入空位之後完成射門；
舒克斯就比較適合幫手駁腳，護球再等隊友上嚟。

用古亞，佢退後就要有人攝入禁區；用舒克斯，附近要有人接應；用安保姆，就要有人持續搵到佢。

曼聯有時做到，亦入到波，但仲未踢得穩定。前面幾個人輪流移位，個波卻未必跟得上；有人返落中場，禁區又未必有人補返入去。最後變成大家都參與緊組織，但真正可以埋門嗰個，反而接唔到波。

對列斯就最清楚。安保姆上半場三次射門，累積大約0.52 xG，佔曼聯全場0.71 xG接近四分三，亦成功入波；但下半場卻一次都無起腳。即係曼聯全場最有威脅嘅機會，幾乎集中晒喺同一個人、同半場波。卡域克搵到一條有效嘅進攻路線，但未能令佢繼續運作。

所以我對前鋒位置最大嘅疑問係，卡域克有無將每種安排配套做齊。球員把握唔到機會，當然要負責；但當最有威脅嘅人長時間接唔到波，領隊就要搵方法重新接通條線。

錫斯高未返嚟之前，曼聯更加需要一套清楚嘅替代安排。否則名單上換咗個中鋒，場上其餘人仲係各自搵緊位，試幾多個都好難順。

卡斯米路離隊之後，曼聯中場最值得留意嘅變化，係防線前面嘅保護由邊個負責。

呢份工有好多部分。

隊友上前迫搶，要有人留後封路；
閘位壓上去，要有人照顧旁邊；
對手避過第一輪壓迫，要有人拖慢攻勢，等後面重新企好。

安排清楚，中堅就唔使成日離開自己位置救火。今季曼聯嘅中場，問題就係呢啲工作未能穩定接上。有人上前，身後未必即刻有人補；有人跟住對手外移，原本守住嘅空間又可能漏咗。前面想搶返個波，後面卻要不斷補位，球員自然容易踢到顧此失彼。

泰利文斯同明奈有處理球嘅能力，巴利巴同山度士亦可以增加防守人手。但用邊一對，都需要卡域克安排好邊個上、邊個留。單靠換兩個比較搶得嘅人落去，唔會自動令全隊知道點樣互相保護。

對馬體會，曼聯地面對抗贏咗40次，對手只有21次；成功攔截亦以21比5領先。單睇呢啲數字，曼聯球員其實有落腳、有贏對抗，但場上仍然被對手穿過迫搶，直接威脅防線。搶贏眼前嗰個人，同成隊守得好係兩回事，卡域克要處理嘅就係出手時機、隊形距離，同埋第一個人撲出去之後，其他人點樣接住。

所以「卡斯米路走咗」算係引爆點，可以解釋曼聯需要改變，但卡域克始終要重新分配佢留下嘅工作。今季買返嚟嘅中場各有特點，領隊要將佢哋砌成一個互相補足嘅組合，俾每個人知道，自己行出去嗰陣，身後究竟有邊個睇住。

卡域克唔係睇唔到問題，亦唔係完全唔識改。對熱刺，下半場換入達洛治、舒克斯同巴利巴，右路多咗支援，前場有人接波，中場亦多咗覆蓋。曼聯由上半場幾乎出唔到波，踢到下半場開始威脅對手，最後成功領先。呢啲改善喺熱刺紅牌之前已經出現，功勞應該俾返佢。

但睇到而家，卡域克最令人疑惑嘅地方，就係佢經常可以修正一部分問題，卻未能令修正之後嘅曼聯穩定落嚟。

有時前面終於接得上，後面仍然要逐次拆彈；有時守住咗一段，進攻又完全斷線。幾場波好似公司部Printer咁，整好雙面列印，轉頭就連唔返Wi-Fi；Scanner搞掂，就到下面Jam紙。

對列斯就幾典型。曼聯入波領先之後，到被追和之前，一次射門都無，對手就有五次。等到失咗優勢，再重新增加攻勢，追和後九次射門加埋卻只有大約0.18 xG。即係領先嗰陣無辦法繼續威脅對手，需要再入波嗰陣，又只剩低大量成功率唔高嘅嘗試。

呢度值得問嘅，係曼聯領先之後，究竟準備點踢。想退後守，就要有人接住解圍出嚟嘅波，令全隊有時間行返出去；想繼續攻，就要保留足夠接應，唔可以前面幾個各自等波。領先唔會自動令場波容易踢，反而更加考驗領隊有無安排下一步。

愛華頓、熱刺、列斯，曼聯三次領先都只得一分，合共跌咗六分走。三個失球有唔同成因，我唔會話係同一個戰術漏洞。尤其對熱刺，多打一人之後，對手其實只得一次射門，就係追和嗰球，但結果反覆出現，卡域克始終要答：點樣令球隊辛苦爭取返嚟嘅優勢，可以維持到完場？

排陣有偏差、臨場需要改，全都係領隊工作一部分。只係補完第一次，仲要補第二次，球員就永遠踢緊應急方案。卡域克需要做嘅，係將比賽中修正成功嘅安排，變成下一場一開始就用得返嘅嘢。

睇到而家，我唔會話卡域克完全無諗法。曼聯有踢得好嘅時段，亦有真正幫到球隊嘅調整。問題係，嗰啲好嘢仲未累積成一種令人信得過嘅表現。

上季尾氣勢如虹，可以令大家相信佢搵到方向；今季對手有準備，傷患又打亂人選，先更加睇到佢點樣處理原本唔順手嘅局面。唔可能等到每個位置都買齊理想人選，先開始要求曼聯踢得有條理。

對卡域克嚟講，下一步最有說服力嘅進步，未必係突然大炒邊隊。係一套有效嘅分工可以連續用到，對手改變踢法之後仍然接得住，領先之後亦知道點樣將場波踢完。

曼聯球迷大概已經唔缺「有啲時段踢得幾好」呢種安慰。佢哋想要嘅，係嗰啲時段長啲，俾個五連勝，曼迷開心，剪頭髮嗰個都開心，INEOS都開心，皆大歡喜。