死因研究

【死因研究】曼聯 0:3 般尼茅夫 屋漏兼逢連夜雨卡域克仲有幾多時間

發布於

短期內第三篇講曼聯,想叫我「曼迷9up天地」嘅巴打可以將自己Bookmark個名改咗佢。呢篇真心唔可以少,畢竟分分鐘已經係卡域克任內,我最後一篇講佢嘅文章。

周中慘敗科木,般奴公開質疑戰術;幾日之後,卡域克將佢放喺後備席,試圖用另一套人腳搵出路。去到半場兩球落後,佢再換人調整,最後仍然喺主場輸俾般尼茅夫0:3。

睇完今場,我腦海得一句:屋漏兼逢連夜雨。

卡域克明明想做出改變,但世界始終唔係圍住曼聯一隊轉。佢需要時間整理間屋,般茅就帶齊工具上門,準備再拆多兩塊磚頭。


案情重組:換咗人,場雨繼續落

今場最大變動,當然係般奴坐後備。卡域克賽前話係「足球考慮」,正選中場由山度士同巴利巴拍檔,泰利文斯踢較前位置,曼治同Amad支援最前嘅安保姆。約羅同天堂仔守住防線。

般茅開局就主動壓迫,曼聯前場接應斷斷續續,反而兩邊不時被對手打入。頭半個鐘,主隊未有射門中目標;其後雖然開始組織到幾次攻勢,38分鐘仍然先被Rayan接應罰球射入。五分鐘後,約羅跣腳,般茅再由Tavernier入波,曼聯帶住0:2同球迷嘅噓聲入更衣室。

卡域克半場用古亞換走泰利文斯。曼聯下半場多咗控球,亦多咗機會將波送到前場,但後面仍然險象環生:般茅開波不久有入球因越位被取消,之後Rayan再獲機會,由拉文斯救出。

65分鐘,L馬換走天堂仔;71分鐘,拉文斯出迎失誤,Evanilson將比分拉開至0:3。卡域克之後再換入舒克斯同Shea Lacey,般奴坐喺後備席睇足全場。

曼聯最後有17次射門,仍然未能製造一次重大機會。全場結束,八場不勝,聯賽八戰七分,跌到第16位。卡域克行向看台致意,球迷仍然唱住佢個名。


死因一:收起般奴,但無人可以代替到佢

先講明,我唔識讀心術,我哋知嘅係般奴近況差,曼聯連場不勝,無論卡域克係想改變踢法又好、俾般奴休息又好,定處理周中訪問帶嚟嘅問題都好,收起般奴係現實。但換人之後最基本嘅要求,係有人接手將進攻運作落去。

今場負責較前位置嘅泰利文斯,上半場只有26次觸球,完成14腳傳球,創造機會同對方禁區觸球都係零。佢原本需要連接中場同前鋒,但實際上接到波之後嘅處理都相當吃力。

般茅對呢套安排有明確應對。曼聯開龍門球或者向後傳,對手就人盯人壓上,追到拉文斯面前;後面嘅James Hill同António Silva亦會跟住中場向前,壓縮接球者轉身嘅空間。曼聯就算避過第一個迫搶球員,接應嗰個亦未必有時間抬頭,前場自然難以連續組織。

泰利文斯半場被搶走腳下球四次,九次地面對抗只贏兩次,正好反映佢喺呢種壓力下有幾辛苦。球隊需要佢喺中間接住個波,等其他人跑上去;佢自己都企唔穩,安保姆同兩邊自然更加難等到下一腳。

曼聯亦有試過打通。32分鐘,巴利巴同泰利文斯喺右路配合,後者送出低傳,由Hill解圍。嗰次配合顯示,靠走動同連續傳送,曼聯有能力穿過對手;可惜成個上半場,類似攻勢只係零星出現,未能令般茅收斂迫搶。

上一篇講般奴,我已經寫過曼聯交咗幾多工作俾佢。今場真正將佢抽走,其他人就要分擔返嗰啲工作:有人接住後場傳送,有人帶球越過壓力,有人搵到最前嗰個。

卡域克換咗人,但唔止無人做到一樣嘅嘢,甚至連相似嘅表現都做唔出。泰利文斯踢唔到預期效果,身邊亦未有人持續提供另一條出路。般奴今場坐足後備席,曼聯用90分鐘證明咗,佢哋幾唔鍾意般奴都好呢一刻都唔可以無咗佢。(至少喺搵到第二個解法之前………)


死因二:等到要追,調整已經唔夠

般茅頭半個鐘嘅優勢相當明顯。分段Field tilt入面,曼聯喺頭15分鐘只佔33%,之後15分鐘更跌到20%。配合場面睇,就見到般茅壓住曼聯喺佢哋半場,主隊只係忙住過半場已經一頭煙。

去到呢個階段,卡域克已經有理由介入。可以調接應位置,可以改變前場跑動,亦可以提早換人;重點係令般茅原本有效嘅壓迫,需要面對新問題。

曼聯上半場後段其實推返前過。31分鐘至半場,Field tilt升到84%,即係領土控制上已經有起色。不過球隊仍然缺乏可以持續威脅球門嘅配合,之後再連失兩球,卡域克返到更衣室先用古亞換走泰利文斯。原本只係處理進攻問題,點知變成要連入三球………

古亞入場之後,曼聯確實多咗人帶波向前,禁區觸球由上半場7次增加到22次,射門亦由3次升到14次。卡域克調整有功勞,但同時亦要計埋般茅領先後退守,讓出更多前場空間嘅影響。

最值得深究嘅,係曼聯點樣用呢啲空間。

下半場14次射門,有8次喺禁區外,運動戰xG合共只有0.47。去到對手防線前面,曼聯仍然搵唔到足夠方法,將球送到一個可以好好起腳嘅人腳下。古亞可以帶波、可以轉身,隊友亦開始推得上去,但攻勢去到最後一段,仍然經常靠外圍射門完成。

般茅已經有兩球優勢,守住禁區、等曼聯慢慢攻。曼聯就要一邊增加進攻人手,一邊承受後場再出事嘅風險。比賽愈遲,雙方可以接受嘅踢法就愈唔同。

所以今場對卡域克最實在嘅批評,係佢點轉都好仍然跳唔出個困局。開局受限於陣式,曼聯搵唔到穩定出口;去到落後再增加攻勢,改善嘅幅度又不足以追返比分。佢有郁、有修正,但般茅早已經將場波帶到卡域克點修正都修唔到嘅情況。


死因三:間屋本身漏水,自己友再篤多兩個窿

死因三,嗯,我真心認為有部份責任不在卡域克身上。今場幾次最攞命嘅防守問題,幾乎都係球員自己造成。

第一球,般茅個死球設計做得好,Rayan趁曼聯球員全部望住來球,成功避開視線回後再起步。呢球係對手準備充足,曼聯場上無人留意身後造成。第二球約羅本身贏咗身位,巴利巴亦因此收步,點知一下跣腳,成個局面突然變晒。至於天堂仔後場傳失,同拉文斯出迎判斷出錯,都係球員當下需要處理好嘅工作。

領隊安排幾多接應、諗幾多變化,都需要場上球員完成基本動作。卡域克可以要求防線集中,可以提醒佢哋小心,但佢無辦法喺場邊扶實約羅等佢唔好跣腳,亦無辦法叫拉文斯早少少決定衝出去。

般茅全場10次射門,9次喺禁區內,重大機會上下半場各有3次。呢啲數字配合幾次失誤睇,反映曼聯持續將自己擺喺一次處理失準,就可能再失波嘅位置。半場有時間喘氣,換人亦換過,後面仍然有人繼續出錯。

信心可能係其中一個因素。連場不勝,球員知道每次失誤都會被放大,處理時自然承受更多壓力。但幾個人喺唔同情況下犯錯,各自仍然要交代自己嗰一下,唔可以全部塞入「無信心」三個字就算。

更令人擔心嘅,係曼聯而家承受呢啲錯誤嘅能力有幾低。

一支球隊總會有人狀態差、有人跣腳、有人判斷錯。其他環節夠穩,就仲有機會撐住,等犯錯嗰個重新企返起身。曼聯今場就係前面仲搵緊方法,後面已經連環爆炸;想靠進攻追返嚟,又造唔到足夠機會。每次失手,都令其餘人要再冒多一分險。

呢份脆弱,先係球會長期累積落嚟嘅問題。幾任領隊、幾輪換人之後,曼聯仍然未建立到一個令人信得過嘅基本盤,讓核心低潮時有人分擔,讓球員犯錯後全隊仲有能力撐落去。卡域克今場要為自己嘅安排負責,球會亦需要回答,點解隊波去到今日,仍然咁容易一處失手、處處失救。

屋漏嗰幾個窿未補好,球員偏偏再逐個篤多幾個窿出嚟。卡域克拎住工具企喺入面,想救都唔知先救邊度。


雨未停,卡域克可能要先走

睇到球迷最後仍然支持卡域克,我多少明白嗰份心情。佢上季接手,確實俾過曼聯一段值得開心嘅日子,亦靠自己帶隊嘅表現爭取到呢份工作。如今走到呢一步,睇住佢喺場邊嗰個樣,呢粒花生係有少少難入口。

但球迷嘅感情,幫唔到曼聯喺積分榜加分。卡域克今場想改,結果失敗;有啲打擊佢控制唔到,佢自己可以處理嗰部分,亦未做得夠好。當球隊已經連續八場贏唔到,佢手上仲有幾多時間,恐怕已經由唔到佢決定。

如果呢篇真係我最後一次寫卡域克嘅曼聯,我會覺得可惜。尤其上星期先寫完,希望佢可以將局部改善變成穩定表現,幾日之後,話題已經變成佢仲有冇下一場。

卡域克可能好快就要執埋工具離開。曼聯之後再請邊個返嚟都好,希望佢哋高層今次肯認真睇清楚,間屋究竟仲有幾多個地方漏緊水。