【球壇風向室】般奴卡域克賽後隔空開火 救火整濕梳化係邊個問題

一個星期兩篇文講曼聯,我估巴打們會開始話我係「曼迷9up天地」。放心,暫時未有轉會打算,除非曼聯用150m轉會費挖我角啦………
今次會寫,係因為留言區有巴打認真寫咗篇長文,同我傾曼聯嘅問題。人哋打咁多字,我覆兩句「多謝支持,講得好」就收工,好似有少少對唔住佢。傾落去,般奴成為咗其中一個值得另外開篇講嘅人物,啱啱曼聯又慘敗科木,佢同卡域克賽後隔空打情罵俏,唔係,係隔空互片,連開場白都幫我準備埋,唔該晒。
般奴話球隊應該更勇敢壓上,卡域克就話無論用咩戰術,球員都要肯向前跑、向後追。隊長公開質疑領隊,當然惹火;偏偏般奴自己近況亦唔好,講完自然更加多人問:咁你自己又踢成點?
呢句有道理。但曼聯踢成咁,作為隊長嘅般奴責任究竟應該孭到邊?
救火救到成屋濕,張單就入消防員數?
般奴今季表現差,呢點我估無人會唔同意。
英超頭七場三入球一助攻,全部係喺對葉士域治嗰場刷出嚟,其餘六場蛋都冇隻。呢六場佢有15次射門,合共約1.05 xG,另外供應0.98 xA,創造威脅嘅表現確實有限。
但睇般奴,有時令我諗起一個入火場救火嘅人。佢拎住條喉入去射水,最後火未完全救熄,傢俬就濕晒,屋主返嚟第一句係:「屌呀,做乜鳩噴濕我張梳化?」
梳化濕咗係事實,屋主心痛亦正常。不過,間屋本身燒成點、救火嗰個手上有乜工具、有冇人幫手,都會影響最後結果。追究佢整濕傢俬之前,至少要諗下當時仲有咩方法可以用。
我覺得對般奴嘅批評,往往就跳過咗呢一步。
傳失一腳波,畫面好清楚,大家自然記得。但佢接波嗰刻有冇人走位、前面有冇空間、對手係咪已經封住其他路線,要睇埋前面幾秒先知。急住向前傳,有可能係判斷差,亦有可能係佢見到球隊再拖落去,連嗰個機會都會消失。
要批評嗰個決定,就應該將當時嘅選擇攤開嚟講。今季產量跌咗,可以確認般奴近況欠佳;至於佢應該為曼聯嘅困局負幾多責任,仲要睇球隊交咗幾多難題俾佢處理。
曼聯有幾多場火,要般奴一個去救?
上季般奴交出13.68 xA,佢一條友已經佔曼聯球員約三分一,第二位安保姆只有4.39。射門助攻亦有約三成來自佢。由於助攻數字包括死球,般奴有食到紅利,但佢同其他人嘅創造產量差距仍然相當大。
同一季,佢有375次推進傳球嘗試,係隊內最多,另外有345次傳入進攻三區。曼聯既需要佢參與將波送上前場,去到前場又依賴佢搵最後一傳。
用球隊最好嘅傳球手做呢啲工作,好合理。問題係兩段工作之間,其他人又做成點。
般奴回後攞波,傳過中場之後,前面需要有人接應、Hold波、拉開空間,等佢上返嚟參與進攻。如果個波去到中途就斷,或者兜咗一輪又交返俾佢,咁佢就要重新搵路。佢愈多時間用嚟處理前段出波,就愈少時間留喺對手禁區附近,等機會出現。
所以,般奴嘅工作量要放返喺全隊配合入面睇。佢交出去嗰腳波,有冇幫球隊推前?隊友接到之後,有冇能力繼續攻?當攻勢卡住,曼聯仲有邊個可以帶個波出去,或者製造另一條路?
呢啲都會影響佢最後交到幾多貨。
一支球隊將最好嘅球員放喺核心,理應俾佢更多發揮機會,同時安排其他人分擔佢身邊嘅工作。尤其般奴已經承擔咁大份創造產量,隊友能否穩定供應、接應同保護,就更加重要。
曼聯對般奴嘅高期望,來自佢多年嚟交出嘅表現。但期望愈高,球會就更加應該諗清楚點樣支援佢。長期有個人肯衝入火場,唔代表每次着火,都照舊塞條喉俾佢等佢搞掂。
卡域克曾經做得到
上季卡域克接手之後,般奴就交出過一段幾有參考價值嘅表現。
阿莫林同卡域克麾下,佢各上陣17場英超,每90分鐘傳球嘗試都係約51次,接球量亦相差唔大。但卡域克接手後,般奴嘅射門助攻由每90分鐘1.98次升到3.60次,xA由0.21升到0.46。差唔多嘅傳球參與量,帶嚟明顯更多威脅。
當時卡域克將般奴放返較前嘅位置,俾佢自由搵空間,配合隊友跑動。般奴有更多機會面向球門,利用自己最擅長嗰腳傳送,直接威脅對手。
呢段變化令我更加在意曼聯點樣用佢。球員嘅能力可以透過安排發揮出嚟,亦會因為接應不足、位置唔合適而受限制。上季嘅效果,至少提供咗一個值得沿用同改善嘅方向。
今季維持唔到,當然要再搵原因。般奴嘅狀態、對手嘅應對、隊友嘅跑動同供應,都可能影響結果。卡域克曾經做到嘅,正好說明球隊有空間透過調整,幫般奴重新發揮。
所以睇到今次賽後互片,我比較想知兩人返到訓練場會點處理。般奴覺得壓唔到對手,卡域克覺得球員跑唔到要求,咁就要將邊度跟唔上、邊個需要支援講清楚。要求一個近況欠佳嘅核心重新交貨,亦要俾返佢做得到嘅條件。
間屋成撚日着火……
講到尾,我始終唔覺得,般奴今季踢得差,就值得成為曼聯困局嘅主要問責對象。
作為車迷,我對佢嗰啲攤手、投訴、燥底場面,當然冇乜好感。(加上佢本身又唔係靚仔……) 但對住一個多年嚟反覆幫球隊解圍嘅球員,我會想俾多啲耐性,睇清楚佢今次點解做唔到。
佢踢得最好嗰陣,大家享受佢救返嚟嘅分數;去到佢救唔掂,就將成隊波踢唔順嘅帳攤喺佢面前,呢種要求未免太方便。
曼聯有般奴,車仔有彭馬,其實道理係一樣。大家係諗點樣令佢哋少啲疲於奔命,多啲機會用長處決定比賽。佢哋亦應該可以有一段低潮,而隊波仍然有人Cover到。
救火嗰個總有救唔掂嘅一日。但我想大家圍住張濕梳化追究嘅同時,可以問下點解間屋成日着火。
