【車迷觀點】受靶嘅保利時代終於完結　盤點肥Todd短暫嘅藍軍生涯

由一個笑話開始，變成所有笑話都係佢

肥Todd問古烈治「你做啲咩架？」嗰單，我上年已經出文寫過，今次唔再重播呃稿費。究竟係唔識人，定係溝通誤會，暫且放低。我當時嘅判詞無變：班主唔係球會歷史教授，識唔識名宿，同識唔識管理球會，始終係兩回事。

但呢單尷尬相遇，實在太符合大家對肥Todd嘅印象。

佢提出過英超南北明星賽，將沙拿同迪布尼稱為車路士青訓產品，又將La Masia講成「La Messiah」。幾單加埋，一個有錢、自信、鍾意發表偉論，但連歐洲足球基本常識都未搞清楚嘅on9美國佬，人物設定已經非常完整。

明星賽尤其能夠代表佢。肥Todd睇到嘅係美式體育嘅收入潛力，英格蘭球迷聽到嘅就係：「我啱啱到埗，而家教你哋玩足球。」就算個構思有討論空間，呢種出場方式都好難令人有耐性聽落去。

偏偏佢又係主席、收購財團嘅門面，第一個夏天仲親自落場做體育總監。每次車路士出事，轉播鏡頭影到佢坐喺看台，記者連新聞配圖都唔使再頭痛，幾方便。

肥Todd當然有份製造自己嘅惡名。但一個班主好唔好笑，同佢應該負幾多責任，唔可以永遠用同一個表去計。

第一個夏天，佢真係抵鬧

2022年接手之後，Marina、施治等舊管理層相繼退場，肥Todd兼任臨時體育總監，接手一份自己從來無做過、亦明顯未準備好做嘅工作。

車路士一個夏天花超過£250m，買入史達寧、高列巴尼、古古尼亞、科芬拿、奧巴美揚等人。有人後來證明自己有價值，有人踢唔夠一季就離開。更混亂嘅係，杜曹明明有份參與建立呢套陣容，轉會窗關閉幾日之後卻被炒，再用一大筆錢由白禮頓挖走波特。

制裁同倉促賣盤，的確令新班主接手時非常狼狽。但接手爛攤子，唔代表一定要自己拎住幾億鎊入轉會市場玩真人版Football Manager。

最好笑嘅口供，最後由肥Todd本人提供。佢今年回顧嗰個夏天，直認自己當時唔識判斷球員好壞，買古古尼亞嘅思路就係：「如果曼城想要佢，我就想要佢。」

古古後來踢得好，唔代表閉埋眼㩒掣就係一套值得表揚嘅球探系統。抽中SSR可以開心，但唔好扮自己有料。

呢個夏天最值得鬧嘅，亦唔只係個別球員買得值唔值，而係花咗大錢配合一個領隊，轉頭又推翻原本安排。呢種決策次序，先係肥Todd無得卸責嘅地方。

之後新班主陸續建立體育部門，由Winstanley同Stewart出任聯席體育總監，肥Todd亦逐步退出日常足球運作。佢交出咗一份好差嘅開局成績表，但至少無繼續坐住個位，堅持自己先係球探之神。

至於交咗出去之後嗰班人係咪真係識，就係另一回事，今篇唔深入討論住。

佢想要嘅車路士，其實幾似球迷

令我對肥Todd有少少可惜嘅，係撇除啲笑料，佢部分諗法其實幾啱我……或者球迷聽。

當然，佢唔係藍軍死忠，亦支持長約、年輕球員投資同多球會模式。但佢談及足球生意時，一直強調透過贏波建立長期競爭力，再吸引更多球迷、提升球會價值。動機仍然係賺錢，至少呢條路同球迷想要嘅結果有交集，Well，畢竟球迷都會想自己隊波贏架嘛……

2024年季尾，普捷天奴終於將一班幼幼砌出少少樣，肥Todd公開稱讚球隊踢出「漂亮足球」，強調好嘅嘢需要時間。報道亦指佢一方傾向肥普留任，艾格巴利同體育總監一方則推動分手。

炒杜曹、請波特嗰筆帳唔會因此消失，但至少喺肥普呢件事上，佢願意俾一支開始有起色嘅球隊繼續行，而唔係再撳Restart。

另一個重點係球場。

史丹福橋得四萬幾個座位，限制收入同發展，肥Todd同清湖都知道要處理。原址重建定搬去Earl’s Court、工程規模同融資點搞，之前幾篇已經講過，今次唔再詳講。

值得記住嘅係，2025年肥Todd親口講過，球場發展能否達成共識，可能決定佢同清湖繼續合作，定係分道揚鑣。呢件事對佢唔係新聞稿入面一句「持續投資基建」，而係足以影響自己留低與否嘅長遠決定。

公開資料未足以將佢寫成守護史丹福橋嘅浪漫派，球場至今未有答案亦係事實。但穩定建立贏波能力，加上解決球場限制，的確比無止境討論邊個幼幼將來可以升值，更容易令我呢個球迷產生共鳴。

佢想去嘅終點，我大致理解。至於點樣去，大家之間仍然隔住成間投資銀行。

主席有責任，但唔等於包辦所有決定

「肥Todd係主席，衰嘢唔搵佢負責，唔通搵門口個保安？」合理。但追究責任之前，起碼要搞清楚佢有幾多權。

清湖一直持有61.5%，肥Todd自己實際約12.8%，餘下由Walter同Wyss持有。不過持股少唔代表無權：當年安排俾咗肥Todd同清湖共同控制及平等管治權，重大決定需要雙方協調，佢唔係純粹掛名坐喺主席房飲咖啡。

所以管理架構運作得唔好、老闆內鬥拖住球會發展，佢同樣要負責。但共同管治，同每日主導收購，始終有分別。

隨住肥Todd退後，艾格巴利同兩位體育總監成為足球運作核心。之後嘅買幼幼、長約、青訓出售，唔能夠全部當成肥Todd一個人玩FM嘅結果。佢有份支持建立呢套Project，唔係無辜旁觀者；但亦唔係每張合約背後唯一嗰隻手。

今次官方公告話日常運作、領導層同策略不變，正好同呢個權力轉移吻合。肥Todd離開，並唔代表車路士要重新開始，因為現行路線早已主要由清湖推動。

同一道理亦要倒轉用。歐協聯同世冠盃係領隊同球員踢返嚟，唔可以講成肥Todd個人功勞；但如果失敗要佢以共同班主身份孭，成功亦無理由當佢完全不存在。

我想還俾佢嘅公道，其實就係呢度：做過嘅決定照鬧，主席應負嘅責任照計，但唔好因為佢個樣最易認，就當車路士過去四年只有一個老闆。

結語：未必會掛住，但的確有啲可惜

我唔會扮感性話自己好唔捨得肥Todd。四年時間，加上後期逐步淡出，實在未足以建立油王或者Bates爺嗰種同球會命運糾纏多年嘅感情。

我覺得可惜嘅，係佢留下咗一啲令我想睇落去嘅可能性。

如果佢對領隊穩定嘅想法得到更多支持，如果球場遠景真係有機會落實，佢會唔會成為一個更稱職嘅班主？無人知道。無發生過嘅事，唔可以預先當係佢功勞，但亦不妨承認，我係有少少想知道答案。

如今大概無機會喇。

所以唔使幫佢起銅像紀念佢，亦唔使突然扮晒掛住佢。只係以後再提起肥Todd，我希望自己記得嘅唔止係嗰個唔識古烈治嘅美國佬。

以後講笑之前，查清楚單嘢係咪真係佢做先，呢點由我開始………