球探報告

【RE球探報告】車仔再追阿歷斯史葛 有佢中場係咪安枕無憂

發布於

八月先寫完阿歷斯史葛,十月又寫,呢個專頁嘅回收再用效率,環保署見到應該會頒個獎俾我。

車仔據報準備一月再追,咁我自然要撳返篇舊文睇下自己講過乜。當時最介意嘅,係車路士準備用六千幾萬鎊買佢返嚟,究竟有無諗清楚點用。中場排住安素、卡些度同拉維亞,再加個史葛,咁貴價錢買個麻雀腳返嚟,發咗達咩。

結果開季踢咗幾場,篇文入面最需要重新驗貨嗰個,原來係我自己。

夏天望住個名單,覺得中場人手好似都幾齊;到真係落場踢,先發現安素走撚咗原來會有問題。後場受壓時邊個落嚟接波,接完點樣轉身送出去,場波開始亂嗰陣又由邊個控制節奏,依家睇得清楚得多。卡些度在陣,仲可以周圍撲火;佢一唔喺度,車仔個中場就亂過我屋企。

所以今次RE球探報告,我想問得直接啲:佢有無能力令車仔中場踢得穩陣啲,令卡些度終於可以少做幾份工?

沙比想踢點樣嘅足球,開季至今已經有得睇;車仔中場欠缺乜,亦開始有晒形狀。係時候攞住呢份實際需要,重新睇一次史葛嘅使用說明書。


軒達臣頂得兩場,頂唔到成季

最近兩場,軒達臣都踢足90分鐘。睇住佢靠經驗、預判同意志撐住個中場,係值得尊重。知道幾時要走近接應、幾時一腳交走、幾時叫隊友慢返落嚟,呢啲真係職人精神浸出嚟一樣。

問題係,識得去邊,同趕唔趕得切去,會愈嚟愈考驗佢。同用寫輪眼一樣,睇到唔代表身體可以反應到。

中場接應係一份連續工作。交完俾中堅,要移去另一個角度再接;個波去咗邊路,要跟過去提供回傳;隊友一失波,又要即刻收返入中間。靠經驗可以少行幾步冤枉路,但連續幾輪來回之後,雙腳仍然要跟得上。當一個接應點慢咗半步,持球嗰個就要多控一下,對手亦多半秒時間圍埋嚟。

軒達臣而家用意志克服年齡,硬踢咗兩場90分鐘,已經交足功課。長遠計,車仔仍然需要一個升級,承擔更多受壓接波同連續移動嘅工作。每星期都指望老將咬實牙關踢足全場,我怕社署會搵社工去車仔總部關心一下有無虐老。

尤其車仔需要處理嘅,係成隊波點樣一齊走出後場。中場有人接得住、轉得到身,對手就要收返去守,兩邊先有機會推上,前場亦唔使隔住半個球場等波。相反,每次都被迫倉卒向前送,隊形未推得切,個波已經返轉頭,中場就又要再跑一次。

呢個先係史葛應該接受嘅測試:佢能否成為一個隊友受壓時搵得到、接完之後又幫全隊行得前嘅人。


史葛帶得出去,仲要識得交棒

用咗成節講車仔情況,

今季五場英超,史葛每90分鐘有2.25次前進帶球,喺平台比較嘅62名中場之中,屬於最前嗰批;帶波製造威脅嘅表現亦接近同位置頂尖水平。佢每90分鐘仲搏到3.18次犯規,比絕大部分同位置球員都多。呢幾項數字放埋一齊,最突出嘅能力相當清楚:接到波之後,佢有本事帶波向前,逼對手埋身攔截,甚至要用犯規先停到佢。

技術分析對佢嘅描述亦吻合:接波前先觀察,調整身體方向,對手由後面埋嚟,就用身體承受接觸,再搵位置轉出去。放喺車仔,呢種能力可以令中堅多一個敢傳入去嘅接應點。史葛吸引一個人跟出嚟,再成功擺脫,對方下一個中場就要決定上前補位,定留低守住原本嗰個人,傳球空間就由呢度出現。

就算最後搏到犯規,亦已經幫到手。全隊可以趁機推上、重新站位,擺脫不斷失波再搶返嘅循環。Opta記錄史葛上季全季搏到60次犯規,排英超第五,呢種解壓方法有完整球季支持。

當然要將今季數字講準:九次過人有八次集中喺對愛華頓同紐卡素兩場,其中七次起點已經喺對方半場。判斷佢後場拆壓能力,要連接波、短傳配合同帶波一齊睇,100%過人成功率本身承擔唔到全部答案。

真正決定佢可唔可以幫車仔穩住中場嘅,係擺脫之後點處理。

史葛今季37次前進傳球嘗試,成功19次;43次傳入進攻三區,成功30次。佢願意向前搵人,亦有能力將波送上去。下一步要求,就係吸引到對手之後及時放波,交完再移位,繼續做隊友嘅接應。車仔需要呢個過程可以重複,令一次成功擺脫延續成一段企得穩嘅進攻。

般茅對利物浦嗰場就提供咗一個實際考驗。蘇保斯禮上前限制史葛喺中路接波,般茅經常直接打去前線爭第二點。嗰場展示出嘅解法,仍然相當依賴前場接長波,未見到史葛持續主導短傳出壓嘅完整示範。

所以我會修正夏天嘅定位:史葛有足夠理由競爭車仔正選,受壓持球同推進都係現時中場所需。佢加盟可以增加出波方法,亦可以幫軒達臣分擔最吃力嗰部分工作。至於安素留下嘅節奏控制,沙比仍然要安排好全隊接應同傳球分工;史葛最有證據支持嘅貢獻,係幫車仔打開受壓時嘅出口。


卡些度終於有人幫,咁佢休息嗰日呢?

史葛拍卡些度,係目前最容易成立嘅用法。

史葛負責多啲受壓接波、帶波推進,卡些度就可以留喺較有利嘅位置保護中路。兩個人都可以向前搶,亦有人接應搶返嚟嗰個波,車仔就有機會將一次奪回球權,接成一段完整進攻,減少搶完又即刻送返俾對手嘅情況。

史葛自己亦肯跑。Opta記錄佢上季有184次由對方半場回追、恢復防守位置嘅跑動,英超最多。呢份投入值得買,尤其車仔需要有人陪卡些度一齊跑,唔好每次轉頭都只見到佢一個人追住成班對手。

真正要諗清楚嘅,係卡些度休息嗰日。

史葛帶波上前,身後邊個守?對手將佢拉去邊路,中間嗰條線由邊個接手?如果沙比打算用佢分擔軒達臣嘅工作,就要預先安排好另一個中場嘅位置。史葛嘅活動量可以增加追搶同接應,佢跑出去之後留下嘅空間,仍然要有人照顧。

今季般茅對利物浦就有現成例子。利物浦調動般茅左路防守,令加普喺史葛盲側接波轉身,再由嗰邊突破製造入球。成個過程涉及翼鋒、閘位同中堅嘅移動,亦提醒咗買家:叫史葛積極跟人,就要同時安排邊個接管佢離開嘅區域。

因此,俾你買到史葛,車仔有機會減少依賴卡些度做轉換;但卡些度缺陣時嘅中場,沙比仍然需要另一套分工。用史葛拍拉維亞,定由其他人留後保護,都應該喺買之前諗好。

去到據報超過£100m嘅叫價,我就唔支持車仔追落去。呢個價已經逼近當年買安素同卡些度嘅投入,車仔要買到足以承擔中場核心工作嘅人。目前史葛最清楚嘅價值係受壓持球、推進同跑動,節奏控制同獨立保護中路仍然欠缺足夠證明,加上史葛本身傷病史張單都長,俾錢之前最好都係CHECK清楚有無暗病先。

球員值得追,般茅亦有權開天價。車仔同樣有責任知道自己幾時應該停手。

今次要驗貨嘅,仲有買人嗰班

夏天寫史葛,我望住安素、卡些度同拉維亞個名單,太快就將佢擺咗去第四中場嗰張凳。開季之後,先睇到張名單填滿咗,場上仍然有份工無人做。

呢點我認,亦係今次值得重寫嘅原因。

再睇住軒達臣連續踢足兩場,卡些度一返嚟又即刻要周圍補位,車仔中場需要升級,已經相當清楚。史葛值得認真考慮,班體育總監亦應該攞得出一份同樣認真嘅使用計劃。

球員可以靠意志捱過一場,球會建軍就要諗埋佢捱唔到嗰日。希望今次車仔辦公室張枱上面,終於有份計劃書,唔使再掟飛鏢。