車迷觀點

【車迷觀點】沙比頭十場少分過四眼羅生 復賽後五場止血嘅結構代價

發布於

又到國際賽期,趁住無球會波睇,去望下公海啲風向都幾好笑。有人好用心咁計咗條數,話沙比帶車仔踢頭十場英超,只係拎得 16 分,仲少過年頭四眼羅生。

睇返,佢啱,羅生帶完十場拎到17分。沙比OUT,BlueCo食撚屎,車仔即時降班,多謝大家。

但……車迷們撫心自問,對比起上季羅生帶車路十嗰種絕望,而家至少未使向下碌都仲搵到自己隊波,仲想點先?頭十場先得 16 分,其實沙比喺入面都做咗唔少功夫:放假前五場英超,車仔場場派膠至少失兩球;放完假返嚟一開波就大炒般尼茅夫 5:1,五場波加埋先失四球,連輸俾新特蘭嗰粒十二碼都計埋入去喇。

同一個沙比,前後隔咗三個禮拜,車仔由有前無後變成下半場算係守得住,中間肯定係改咗啲嘢。今篇文唔同大家爭拗 16 分算多定少,我哋直接睇下沙比套 4-4-2 到底幫車仔執好咗啲乜,又同時犧牲咗啲乜。


沙比改咗踢法,車仔守得好咗幾多?

由前五場足足失咗 12 球,去到復賽後五場只係失得四球,中間只係隔咗三個禮拜。沙比首先郁手嘅,係車仔無波時點企。

對般尼茅夫嗰場,沙比退守時排咗個無球 4-4-2,呢點佢自己賽後都有講。去到對愛華頓,個分工就睇得仲清楚:彭馬同祖奧柏度留喺前面,專門遮住對面傳入中路嘅路線,尼圖同羅渣士就收返落兩邊。只要個波一轉去邊線,近波嗰個翼鋒就可以即刻出去做截擊,中間嘅卡些度同軒達臣唔使下下跟住個波追到去邊線。只要身邊隊友補得切位,出去逼嗰個人身後就永遠有人睇住。沙比平時講起陣式,最在意嘅正正就係呢個球員之間嘅距離。

我知大家實會問,失少咗波,唔俾係對手垃圾架?

你啱,所以要睇埋 Power Ranking,前五個對手平均 1,883 分,後五個係 1,833 分,整體牌面的確係弱咗少少。不過如果抽返各隊開波前嘅純攻力再計埋主客場,前後兩段賽程預計會俾對手造到嘅機會(預期失球)其實差唔多。但實際踢出嚟,復賽後車仔平均每場少俾對手造出約 0.73 xG,當中跌得最明顯嘅就係下半場。

睇返對愛華頓嗰場就最易明。車仔下半場一開波就領先,愛華頓有差唔多成個半場時間去追和,結果佢哋下半場造到嘅機會,反而比上半場仲要少。去到要守住一球勝局嗰陣,車仔終於有一套穩陣嘅企位可以用,踢到完場真係頂得住。單憑呢一點,我覺得沙比係值得加分嘅。

不過守完搶返個波之後,下一腳可以交俾邊個,就係另一回事喇。


個波搶返嚟喇,跟住交俾邊個?

頭先講到尼圖同羅渣士收返落兩邊,幫中場守住條線。但針無兩頭利,去到搶返個波嗰一刻,佢兩個好多時仲留喺自己半場啱啱幫手防守嗰個位。前面兩個人要有人接應第一腳,兩邊閘位又要趕得切推上嚟,車仔先有機會趁對面未企定就打反擊。如果搶完波第一腳只能夠橫傳,等到車仔慢慢組織好推上去,人哋條防線都一早企返齊。

睇返復賽後五場,車仔平均控球率由 48% 升到 53%,但傳入禁區次數由 119 次跌到 86 次,上半場 xG 亦由 5.07 跌到 2.73。即係個波喺我哋腳下嘅時間多咗,但真正可以殺入禁區搞到人哋手忙腳亂嘅次數,反而少咗。

呢度要分開兩件事嚟睇個波係點樣卡住。

由後場搶返個波、但兩翼仲未跟得切上嚟,呢啲係防線收得深自然要俾嘅代價。但去到對新特蘭嗰場,車仔全場有近七成控球,對面擺明車馬一早縮返去禁區頂等你。呢個時候,車仔有晒時間慢慢推上去圍住人哋嚟攻,問題就變成:邊個肯留喺對面兩個中堅中間接波?又有邊個會喺隊友拉開嗰一刻順勢攝入去?

全場猜足七成波,上半場只係造到 0.24 xG,沙比暫時嘅問題就喺呢度:既然你一早預咗對面會縮入去死守,咁禁區入面個位,本身打算留俾邊個?


傷兵換咗沙比手上副牌,佢又點打?

除咗戰術取捨,前後五場仲有個好大嘅變化,就係傷兵名單大幅度咁換咗沙比手上副牌。

防守嗰邊,卡些度傷癒復出,同沙比執過個防守企位撞正同一時間發生。正因為兩邊翼鋒肯收返入嚟幫手,卡些度先可以安心留守中路,睇準對面下一腳傳送先上去攔截,或者等個波解圍頂出嚟嗰陣第一時間執第二落點。沙比排出嚟呢套 4-4-2 企位,正正係將卡些度最擅長嗰瓣放大到極限。至於如果換個人落去做同一份工,車仔仲可唔可以守得咁穩?頭十場暫時未有答案。

但去到前面,情況就啱啱相反。祖奧柏度對般尼茅夫同愛華頓都有得踢,去到對熱刺之前先至受傷。有佢喺度嗰陣,後面有需要可以直接一腳長傳搵佢,由佢背身頂住對面中堅,等彭馬同羅渣士跟上嚟駁腳。

換咗尼圖去踢正前鋒,佢嘅習慣係外切去邊路或者回後接波;如果對面中堅肯跟佢出嚟,身後自然就有空位俾隊友攝入去。但對住新特蘭呢種死守唔出嘅球隊,人哋對中堅大可以企定定喺禁區。結果就係,尼圖不但無足夠身位喺中路護波,就算控到落嚟對面禁區都企滿咗人,根本無機會發揮佢嘅速度。

沙比開波揀咗用尼圖打中間。我唔知兩個後備前鋒係得罪沙比定狀態真係唔夠,但既然沙比揀得一個鍾意外切攞波嘅人打箭頭,到時邊個負責入禁區埋門,開波前就要一早諗埋。祖奧柏度一傷,車仔就少咗一條本身行得通嘅直路;點樣用手上現有嘅人腳再踩出另一條路,呢份功課,沙比暫時仲未交齊。


總結:止咗血先再算………

講到尾,返去開頭嗰條問題:頭十場得 16 分,少過四眼羅生,沙比到底係好定壞?

如果只睇 16 分呢個結果,就100%係沙比垃撚圾;但拆開頭十場嘅過程嚟睇,沙比至少證明咗自己唔係死牛一面頸。見到頭五場流血不止,佢識得用三禮拜時間排出兩條四人防線,再夾埋復出嘅卡些度幫球隊止血,令車仔下半場終於識得守住勝局。單憑呢次自我修正,沙比已經比羅生好。

只係,止血還止血,當對手學識縮後任你猜、而前面又傷咗祖奧柏度嗰陣,沙比喺破密集上面明顯仲未搵到Plan B。下個禮拜放完國際賽假返嚟,後面個地基既然已經砌穩咗,就要睇下沙比敢唔敢喺保持防線距離嘅同時,重新塞返個人入禁區。

沙比識得睇住副偈嚟補鑊,但進攻嗰幾版仲有一半未填。等埋傷兵齊腳、睇埋下一個五場佢點拆鐵桶陣,到時先再決定叫唔叫沙比 OUT 都未遲啦。