【球壇風向室】熱刺轉死性豪洗買人　哪來咁多錢又唔使守財政RULE？

四億鎊唔係現兜兜俾出嚟

我估呢個問題，跟開我嘅車迷已經知。

唔計沙雲奴同馬莫殊，熱刺已確認嘅買人支出約為2.29億鎊；另一邊廂，佢哋靠賣走胡斯高域、史賓斯、羅美路同一批年輕球員，亦已經收回約1.42億鎊。換言之，現階段真正嘅Net Spend其實只係約8,700萬鎊，甚至低過阿仙奴、葉士域治同高雲地利。當然，沙雲奴同馬莫殊先係隻Boss。兩單合共大約1.6億鎊，一旦完成，熱刺總支出就會升到接近3.9億鎊，淨支出亦會暴升至約2.5億鎊。

第一個原因係，當然係因為轉會費一般都會分期支付。只要唔係要一筆俾清，多少現金流處理到就無問題。

第二個原因，車仔一定好熟，就係會計上嘅攤銷。將買入價按合約期攤銷，但財政計算最多只可以攤五年，每年要入帳嘅數相對細咗。

賣人就啱啱相反。球員出售所得嘅會計利潤，可以喺交易發生嗰年即時入帳。尤其由青訓升上嚟、帳面成本接近零嘅球員，賣到幾多幾乎就有幾多利潤；好似熱刺今夏賣青訓，再加上用約4,600萬鎊出售胡斯高域，唔單止帶來現金，亦即時幫盤數補血。

但等陣，又話起完球場無錢？有攤銷同分期加賣人就唔爆煲咁爽？

昔日食錢怪，今日搖錢樹

先講結論，我哋對熱刺「起完球場無乜錢用」嘅印象，唔算錯，只係停留咗喺幾年前。

新球場造價超過十億鎊，工程期間熱刺要搬去溫布萊比賽，球場啟用後不久又撞正疫情。辛辛苦苦起好一個可以坐六萬幾人、預備全年營運嘅場館，轉個頭就要閉門作賽。嗰個階段嘅熱刺的確揹住巨債、現金受壓，利維果時應該堅係一頭煙。

但去到今日，新球場已經唔再只係一個星期踢一次波嘅足球場。

我有查返熱刺2024/25年度財報，球隊即使喺英超排第17，電視及媒體收入由1.66億鎊跌至1.27億鎊，全年總收入仍然達到5.65億鎊。其中比賽日收入有1.27億鎊，商業及其他收入更加高達2.77億鎊。演唱會、NFL、拳賽、F1 Drive、球場Tour、會議活動同Premium Hospitality，全部都可以喺球隊踢成pat屎嘅時候繼續運作。

以前白鹿徑年代，熱刺一年比賽日收入大約只有4,500萬鎊，商業收入亦只有七千幾萬。今日單計比賽日已經差唔多收多八千萬，商業收入更加升咗幾倍。換句話講，利維當年慳慳埋埋起出嚟嘅球場，經過工程延誤同疫情折磨之後，終於由食錢怪進化成搖錢樹。

當然，呢棵搖錢樹後面仍然連住一張非常巨型嘅按揭。熱刺截至2025年6月底仲有8.52億鎊金融借貸，Net Debt亦達到8.31億鎊，數字上就唔多靚仔架啦。

但呢筆債大部分都係球場融資，超過九成採用固定利率，平均利率只有3.07%，平均到期年期17.6年，部分更加去到2051年先還清。佢唔似信用卡碌爆之後下個月收到張八億鎊月結單，比較似用長期低息按揭買咗一個每年持續收租嘅商場。債務仍然係負擔，但未有阻止球場每年製造現金。

唔止球場幫咗熱刺，佢哋其實堅係搵返半個失散多年嘅油王爸爸。

利維喺2025年9月離任執行主席，一個月後Lewis Family就透過ENIC向熱刺注資一億鎊；到2026年夏天，再追加一億鎊Working Capital。九個月合共兩億鎊，呢筆錢唔會突然變成熱刺嘅收入，但係直接補充咗熱刺最欠缺嘅流動現金，再配合賣人所得同分期付款安排，足夠俾新領隊做一次Reboot。

不過，高收入唔等於有盈利。熱刺2024/25仍然錄得9,470萬鎊稅後虧損，手頭現金亦一度跌至約2,000萬鎊，所以Lewis Family嗰兩億鎊先至咁重要。

今季重建，下季靠成績找數

咁解決咗「熱刺邊度搵錢」之後，最後就係最初嗰條問題：SCR同FFP去咗邊？

首先要更新一下球迷腦入面嘅版本。英超由2026/27球季開始，已經正式用Squad Cost Ratio取代PSR。舊制度係計球會三年內蝕幾多錢，新制度就集中睇一隊波每季將幾多收入用喺球員同領隊身上，包括人工、經理人費同轉會費攤銷。

英超設定嘅上限係85%，意思係球隊嘅Squad Cost原則上唔應該超過足球相關收入及球員買賣收益嘅85%。超過85%唔會即刻扣分，第一季仲有最多30%額外寬限，但今季超出85%幾多，下季30%額外寬限就會扣返幾多。

熱刺今季仲有另一個Buff，就係無歐洲賽。

有份踢歐聯、歐霸或者歐協聯嘅球會，除咗英超85%，仲要符合UEFA更嚴格嘅70% Squad Cost Rule。熱刺今季無份，所以暫時只需要處理英超呢邊。不過，千祈唔好理解成「今年無歐洲賽，所以洗大咗都無人理」。

今年買入球員嘅轉會費雖然可以攤分五年，但正正因為攤分五年，條數亦會跟足熱刺五年。假如今季真係咁叻叻入到前四，下季就要接受UEFA 70% Squad Cost Rule審查。

所以熱刺今次唔係開咗無限金錢Cheat，而係趁今季無歐洲賽、英超SCR上限較鬆、球場收入開始成熟，加上股東願意提供現金，一次過將未來幾季嘅重建提前完成。

總結：車仔想學都學唔嚟

講到呢度，車迷可能會問：我哋今季同樣無歐洲賽，點解熱刺可以一口氣Reboot，車路士就仲要賣人、減人工，睇住盤數食飯？

分別係熱刺今次先開始預支未來，車路士早幾年已經預支完。車仔因為之前連續爆買，已經被UEFA罰款兼進入四年監管期，即使今季無歐洲賽，過往紀錄都唔會自動洗白。將來想重返歐聯，仍然要逐年降低Squad Cost，否則再罰錢之餘，甚至會影響歐洲賽球員註冊。

所以同樣無歐洲賽，熱刺係拎住張未碌爆嘅信用卡趁機重建；車路士就係前幾年已經簽爆張卡，而家要準時找數兼修復信貸評級。

不過，我哋仲可以靠賣人去填數，至少唔使好似紐卡素咁賣到入骨先………