【賽前明燈】英超 新特蘭對車路士 休息多幾日有幾多着數

上場估曼聯贏,再估曼聯下半場有波入,結果車仔贏2:0。兩個預測全部估錯,錯得幾開心。呢啲錯法,多啲都唔緊要。
跟住今場,星期日晚香港時間十點,作客新特蘭。車仔有成個星期休息,對面星期四先踢完歐霸,單睇賽程,今次輪到我哋着數。
不過新特蘭週中換咗六個正選,車仔就休息咗成個星期,仲要等卡些度睇下踢唔踢得。到開波嗰陣,真正喺場上嗰十一個,又有幾多個真係得半行體力?
薩卡星期四踢足90分鐘
講體能,車仔多幾日時間抖同備戰,牌面睇當然係着數。但睇返週中新特蘭嗰場波,除咗老將薩卡踢足 90 分鐘之外,Sadiki 同 Le Fée 都係後備出場,捱到半場落後 0:2 先一齊落場救火;上輪聯賽正選中鋒 Brobbey,更加係去到 64 分鐘先出嚟行個圈。
黑貓最後雖然追唔返照輸 0:2,但呢幾個聯賽主力全部都錫住用,慳返唔少體力。 如果今場 Sadiki 同 Brobbey 正選上陣,車仔埋身肉搏未必會有咩體力上嘅甜頭。
尤其對面最鍾意直接大腳長傳 Bypass 中場搵 Brobbey 做支點,我哋班中堅就算勉強贏到第一點頭槌,個波跌落嚟嗰下 Second ball 邊個先拎到,先係最令人頭痛嘅地方。
頂走咗個波,場攻勢完未?
星期四對薩格勒布戴拿模,新特蘭就有一球畫面好值得車仔警惕。當時沙卡斬死球入禁區,Reinildo 第一時間起腳俾龍門撲出,Danso 即刻喺左邊高速殺出補多腳,個波僅僅擦住門楣出界。新特蘭證明咗,就算你救到第一腳、頂贏第一點,如果禁區入面無人執 Second ball,新特蘭係有能力威脅門將。
亦因為咁,我今場特別緊張卡些度到底趕唔趕得切復出。當我哋班中堅被迫推前同 Brobbey 爭頂嗰陣,身後同禁區頂嘅真空地帶,點都要有人幫手Cover。有健康嘅卡些度喺度,起碼多部中場吸塵機幫你預判落點、搶完波仲可以直接帶出危險區,幫條防線抖啖氣推返出去。但弊在佢今個星期只係跟操咗一半,仲係有少少傷患隱憂。
拉維亞未有足夠身形做到呢份工作、神軒要慳住體力亦未必可以球球幫手,今場車仔面對黑貓嘅長傳同死球轟炸,點樣解決新特蘭嘅二次進攻將會變成關鍵。
講到咁危險,我仍然揀車仔贏
新特蘭有辦法令車仔踢得辛苦,但睇返最近四場聯賽,佢哋合共只入咗一球,仲要係Le Fée對高雲地利射入嘅十二碼。畢竟長傳有人爭頂、禁區有人搶第二點,偏偏去到真正要將個波送入網嗰下,黑貓已經連續幾場交唔到貨。星期四嗰次補射亦一樣,畫面睇落係有威脅,但個波都係出咗界。
呢個入球困境,正正令我今場仍然偏向車仔。就算新特蘭開局靠主場氣勢搶到幾次機會,只要車仔頂得住,佢哋就要繼續諗辦法搵入球。上場對曼聯,我哋都俾過對手機會,般奴同戴亞路把握唔到,羅渣士就自己帶波完成入球。嗰場睇到我幾次想熄電視,但兩隊埋門嗰下嘅差距,最後的確幫車仔攞到三分。
今次車仔有完整一星期準備,彭馬同羅渣士亦有時間恢復,前場把握機會嗰份優勢,我願意再信一次。卡些度踢唔踢得,會影響我哋頂住對面攻勢有幾辛苦;但以新特蘭最近嘅入球表現,我仍然估車仔更有能力將機會變成入球。今場未必贏得舒服,兩邊各自浪費幾次機會都唔出奇,不過真係要揀一隊先完成致命一擊,我會揀我哋。
💡今場預測
預測一:車仔贏波
上面講晒點解,今次就直接揀車仔贏。新特蘭有能力令我哋踢得狼狽,但彭馬同羅渣士有成個星期休息,我相信佢哋有能力幫車仔決定勝負。贏一球都收貨,三分袋到就當我中。
預測二:新特蘭上半場無入球
新特蘭最近四場聯賽唯一入球,要到67分鐘先靠十二碼出現。今次即使有主場氣勢,我都估佢哋要花啲時間先搵到射門機會,車仔有足夠準備之下,應該頂得住頭半場。
所以第二個預測,我估新特蘭上半場食白果,補時都計。
星期日晚十點,希望睇完可以帶住三分去瞓,星期一返工至少無咁難頂。上場估輸就贏,今場難得揀返自己隊波,沙比唔該合作少少………
