戰術覆盤

【戰術覆盤】 新特蘭 1:0 車路士 唔順氣但對手今場真係踢得好

發布於

琴晚出文笑114嗰陣,我自己口多,話車仔如果輸俾新特蘭,我一定比任何人都快手出文。仲特登加多句:「沙比,唔該唔好俾機會我證明。」

結果車仔真係輸1:0,而我……敵唔過睡魔,瞓咗。自己挖個窿俾自己踩,仲要瞓醒先返嚟填。嗯,星期一吖嘛,慢工出細貨好正常啫。(好似係)

講返場波,琴晚輸完我又真係無乜嬲。彭馬嗰下無吹,轉個頭波比同高維爾拉拉扯扯就有十二碼,兩球放埋一齊睇,我當然唔順氣。但單講踢波,呢場可能係我今季睇過新特蘭踢得最好嗰場。未領先嗰陣,波比一轉身,我已經驚佢又殺入禁區;到佢哋領先,反而係車仔入到禁區,我都仲未覺得會有波入。

沙比下半場有郁過,二安入嚟之後右邊亦有返啲生氣。只係睇住車仔一步步攻近,黑貓又好似始終守得幾舒服。呢場嘅重點就係:明明已經入咗禁區,點解追和嘅入波仍然同結衣一樣遙不可及?


戰術深潛1:擺多一個中場,前面少咗一個拆局嘅人

沙比今場收起二安,起用軒達臣做正選。進攻時拉維亞會墮後接波,神軒就企喺三個中場入面最高嗰格,尼圖繼續兼職中鋒。車仔有多一個人喺中場接應,但個波由後面送上去之後,仲要有人喺兩線之間接應、轉身,先有可能逼新特蘭啲守衛行出嚟。

偏偏今場就做唔到。新特蘭中場會跟人,後面條防線又收得夠窄。神軒企高咗,好多時都係背住龍門等波;彭馬想掂多幾腳,就要退後。等到個波再送上去,車仔最識喺禁區前轉身嗰個,自己仲喺後面。

所以車仔幾次索性打身後,目標由尼圖、羅渣士到右邊嘅帕仔都有。個諗法好直接:中場有人貼住,就趁對手未收好,用一腳長傳放人去跑。帕仔有一次喺右邊送到靚傳中,羅渣士亦搶到位頂,只係頂斜。呢條路有成功過,但新特蘭只要趕得切企返齊,車仔就好難再炮製到同樣嘅機會。半場唯一中龍嗰腳,已經係尼圖喺禁區外起腳。

我睇到中段覺得神軒有少少多餘,原因就喺呢度。拉維亞已經可以墮後幫手出波,車仔更缺嘅係前面有人接完可以轉身,或者直接帶波過第一個守衛。多擺一個中場,個波係有人駁,但要逼黑貓條防線郁,最後仍然要等彭馬或者羅渣士自己搵辦法。


戰術深潛2:波比一轉身,車仔成條防線就要追

車仔要諗N咁多腳先將個波送到去前面,新特蘭就有個簡單得多嘅出口:直接搵波比。

波比最麻煩嘅地方,係高維爾已經貼住佢,佢照樣可以用手隔開你,再轉身向前。高維爾貼得愈實,波比一轉過咗高維爾,佢就愈難追返對手。有一下波比喺自己半場轉身走甩,科芬拿要橫移將佢趕向外線,最後嗰腳先射高。新特蘭就咁一個接應,已經可以由後場變成反擊。

大約14分鐘,泰比傳中嗰下其實已經係警告。嗰次唔使波比背身轉,佢直接喺門前搶到位,近門射斜。去到搏十二碼嗰球,佢又先轉到身、搶到內線,高維爾要由後追,兩個人先拉扯埋一齊。睇住呢幾下,我最擔心嘅係高維爾明明已經貼到實,波比依然可以話轉身就轉身。

十二碼嗰下我係唔順氣嘅。彭馬喺禁區邊俾奧尼恩踢跌,接觸喺線內定線外或者仲有少少疑問,但球證當時連犯規都無吹。另一邊兩個人都有拉衫,場上吹咗十二碼,覆核後就維持原判。兩球擺埋一齊,作為車迷我就覺得嗰把尺好難捉。

但就算嗰球無吹,半場都要處理波比。高維爾已經有牌在身,再由佢一路貼、一路追,下一次波比接到波又要搏多鋪。沙比換邊就用二安換走高維爾,卡些度落去踢中堅。一次換人同時改咗兩個對位:後面換人守波比,前面終於有人可以喺右邊接波就去。到呢個時候,輪到黑貓有一球喺手,可以揀俾車仔去到幾近。


戰術深潛3:右邊過到人,門前仍然無空位

二安半場入嚟,右路即刻多咗個可以突破嘅人。62分鐘,沙比再用古斯圖換帕仔、韋碧克換尼圖,右邊有人可以後上接應,禁區亦有個正牌中鋒爭落點。去到79分鐘,昆達再入嚟打左邊。幾次換人嘅方向好一致:中間俾人跟得咁貼,就由兩邊拉開佢哋,再搵位送入去。

但新特蘭有一球喺手,根本唔急住跟你出去。平時兩排人收成4-4-2,退到最深嗰陣,兩邊又會落返去幫手,睇落甚至似6-4-0。二安過到第一個,後面仲有人補;古斯圖就算後上接到波,黑貓啲中堅亦可以繼續留喺門前,等你傳入嚟。車仔拉闊咗自己嘅進攻,但拉唔開人哋守住嗰一格。

有幾下我以為真係穿到,反而係羅渣士由中間送直線,先搵二安,再搵彭馬插入去。嗰一下夠快,黑貓未補到位,車仔先有機會喺佢哋身後接波。可惜同一條線機會唔多,一次進攻射唔入,就已經無下一次。

去到補時,二安用罰球搵到韋碧克,頂高嗰下已經係下半場另一個明顯機會。沙比換人係有用,車仔入禁區多咗,門前亦終於有人爭到落點。可惜嘅係,用咗整個半場都仍然攻唔破對手。


數據深潛:禁區掂多16次波,xG只多0.02

用數據睇就更加反映出新特蘭守得有幾好。車仔上半場喺對手禁區只掂過三次波,沙比調整之後,下半場升到19次。但xG由0.32只係升到0.34,換邊後六腳射門,一次Big Chance都無計到。

呢組數字幾貼我睇波嗰種感覺。二安可以帶入去,兩閘亦可以由更前嘅位置出波,但車仔只係入去禁區掂波,去到真正可以起腳嗰刻,面前往往仲有人。

另一邊,新特蘭全場九腳射門,比車仔仲少一腳,xG卻係2.38比0.66。就算扣埋十二碼,黑貓仍然有約1.59 xG。波比早段近門射斜,換走佢之後伊斯多又喺六碼區附近起腳,要Panda仔救。新特蘭可以用好少球權,換到喺門前直接起腳嘅機會。

黑貓俾車仔行到禁區邊,甚至俾你入埋去,最危險嗰腳始終無容許車仔出到。呢個先係點解車仔下半場明明攻得近咗,追和嗰球睇落仍然咁遠。


有啲嘢,輸完可以帶得走

輸波梗係燥,尤其係睇住車仔成個下半場壓住對手嚟踢,去到補時都無幾多下令人覺得追得返。不過今場輸得有理由,呢種波反而有啲嘢可以帶走。

新特蘭守得夠紀律,沙比幾次換人亦有見到效果。二安入嚟之後右邊有返突破,韋碧克入去之後門前有人爭落點。下次再遇到一隊肯放你去邊線、死守門前嘅對手,可唔可以早啲將兩樣嘢接埋?邊路一過到人,中間已經有人搶前柱,亦有人後上接倒三角,趁佢哋未企好就起腳。

跟住就到國際賽期。希望傷兵可以趁呢段時間休養好身體,尤其係祖奧柏度。佢返嚟,前面就多一個可以背身接波、幫彭馬同羅渣士駁下一腳嘅人,沙比亦多啲人腳去試。下場主場對列斯,風格又唔同咗,希望沙比可以好好利用國際賽期,將車仔推得更高。