【車迷觀點】車仔26/27夏窗合唔合格？全方位同你評價買同賣嘅操作

先搞清楚，所謂£500m係點計

今個夏窗最搶眼嘅數字，當然係傳媒所講、車路士透過出售同外借產生接近£500m收入。按目前公開報道嘅固定及初始費用整理，車仔買人約使咗£340m，出售球員同已知借用費就收回約£393m，錄得約£53m淨流入。

呢個數字未計加拿祖將來可能觸發嘅條件性買斷，亦唔會當熱刺已經用£75m買斷梅迪歷。至於2027年先正式加盟嘅誠實仔Ahanor，據報轉會費約£40m，今次會計入未來投資風險，但唔會當成今季戰力。

單睇盤數，車路士無疑交出咗一份相當靚仔嘅成績。只係盤數靚，最多證明球會識得賣人同控制支出；要判斷成個夏窗是否成功，始終要返去最基本一題：收窗之後，沙比手上隊波有無變得更好？

今次買返嚟嘅，睇落真係有用

如果要講今個夏窗最值得肯定嘅地方，唔係買咗幾多個人，而係大部分新兵都有相當清楚嘅用途。

門將位置由山齊士換成馬天尼斯，£7.5m就換到一個經驗、穩定性同指揮能力都更高嘅正選；彭達斯留隊做後備兼接班，連後備安排都比上季合理。

防線就更加直接。拿確斯補速度、單防同高位防線最需要嘅右中堅功能；帕利斯查同查華利亞提供兩翼衛推進，巴高就可以喺左翼衛同中場之間轉換。古古尼亞離隊當然係損失，但車仔並非求其搵一個左閘頂住，而係用哈圖、查華利亞同巴高重新分拆佢原本負責嘅工作。

前場同樣唔係純粹儲印花。加拿祖換成羅渣士填補左Half Space，令彭馬唔再係唯一一個要負責創造同入球嘅核心；昆達就增加右翼持球同爆破能力。中鋒方面，祖奧柏度負責正選、韋碧克提供較簡單穩定嘅後備方案，艾美夏就用身型同衝刺提供另一種踢法。

當然，呢份配置仍然有未解答嘅問題。艾美夏未證明自己可以將法甲表現搬入英超，帕利斯查亦要時間適應；羅渣士目前睇落對辦，但£117m始終存在約£20m溢價。好用同抵買，從來都係兩條不同問題。

不過至少喺即時戰力同戰術方向上，今次唔再好似以前咁，先買一堆潛力股返嚟，再叫教練自己研究點砌同等佢哋升Lv。門將、中堅、翼衛同前場不但正選有所提升，後備選擇亦明顯完整咗。

單計呢部分，小弟會畀即時戰力A，戰術適配A-。未到更高，唔係因為以上位置做得唔夠好，而係成份名單仲有一個位置，收窗之後反而比開窗之前更加單薄同危險。

賣人部門，今次真係無乜得挑剔

買人睇戰力，賣人就要睇球會喺唔同處境下，有無盡量換回合理價值。

安素£125m、安祖山度士£48m、古古尼亞約£47.5m、積臣約£47.5m、細查約£25.7m。呢批球員本身都有戰力，車路士當然唔係賣完就當無損失；當中有人自己想走，亦有人因為新帥定位而被放售；球會可以控制嘅，就係守住底價，唔好因為更衣室氣氛或者死線壓力而平賣。

更加難得嘅，其實係將已經唔在計劃內嘅球員變現。

戴納£45m、托辛£7m、古爾£14.6m，再加David Fofana、基利文、Deivid Washington同Jimmy-Jay Morgan等等，單係呢批非核心球員已經換回接近£85m。計埋佐治轉會同巴迪亞舒尼借用費，收入更加超過£100m。

當中部分交易當然要打個折扣。基利文同Deivid Washington都係賣去同屬BlueCo嘅斯特拉斯堡；巴迪亞舒尼、迪沙施、梅迪歷等人亦只係外借，未算真正永久清貨。但由開窗前名義上38人，收窄至一隊約25至27人，期間仲可以錄得固定淨收入，呢個清洗效率已經好難再要求更多。

出售同清洗能力，小弟畀A+。呢個唔代表每個離隊決定都一定正確，而係喺決定放人之後，球會幾乎都成功將資產換成合理甚至超額嘅回報。

偏偏漏咗最難補嗰一格

如果今個夏窗就咁完結，車仔大概已經接近滿分。偏偏最後出事嘅，唔係第三門將或者第五中堅，而係成套進攻由後場運上前場時，最難搵人代替嘅中場。

開窗前，車仔至少有安素、卡些度、拉維亞、安祖山度士同艾素高幾個中場選擇。收窗之後，安素同安祖山度士永久離隊，艾素高再被外借；真正可以用嘅只剩卡些度、長期受傷病影響嘅拉維亞、仍未證明英超中場適應力嘅巴高，以及36歲嘅軒達臣。占士可以客串，但客串始終唔等於完整配置。

單獨睇安素交易，£125m係一個合理甚至難以拒絕嘅價錢。球員自己想走，交易亦已經推進到最後階段，球會無理由因為另一單收購出事，就臨時將所有代價推返畀球員承受。從球迷角度，我當然想車仔即刻撳停；但一間球會同球員之間，始終應該保留最基本嘅承諾同信用。

所以問題從來唔係「點解仲要賣安素」，而係去到安素即將離隊，球會仍然未鎖定任何替代者。Camara單Deal點樣喺死線日突然出現、又點樣跟住摩納哥另一單交易一齊收皮，小弟會另外寫文詳細講。對方臨時改變決定唔係車仔可以控制，但放走中場核心之前仍然要依賴一個死線日機會，失敗後手上亦無Plan B，就係球會自己需要承擔嘅風險管理責任。

巴高可以補回部分推進同長傳，軒達臣亦可以喺特定比賽提供傳送；但佢哋都唔係安素嘅直接替代者。卡些度負責嘅工作不同，拉維亞就算技術上最接近，健康狀況亦唔容許球會將成季押喺佢身上。

結果係，大部分位置比上季更完整，中場反而由人滿之患變成一個傷兵就足以拉響警報。陣容完整度只能畀B+，交易程序就由接近滿分跌至A-。成個夏窗最大嘅扣分，幾乎全部集中喺死線前呢一下。

買得唔平，但未去到失控

最後要處理嘅係成本。

羅渣士£117m肯定唔平。即使頭三場已經證明佢相當對辦，小編仍然認為大概有£20m溢價；拿確斯£52m同帕利斯查約£43m至£47m，同樣唔係咩執平貨。再加約£40m、2027年先到隊嘅Ahanor，車仔的確預支咗唔少未來資源。

但貴唔等於錯。羅渣士同拿確斯都係沙比明確需要嘅角色，至少唔係用天價買一個返嚟先研究點用。另一邊，馬天尼斯£7.5m、韋碧克£5m、查華利亞£16.3m、軒達臣免費，亦將整體成本拉返落嚟。

真正風險反而係未知數。艾美夏同帕利斯查能否適應英超、Ahanor將來可以發展到咩水平、韋碧克同軒達臣嘅身體可以維持幾耐，全部都未有答案。不過以佢哋目前嘅預定順位同角色計，球會暫時未需要將成季押喺任何一個未知數身上。

買入性價比同風險控制，我畀A-。有溢價、有預支未來，但大部分支出都有清楚目的，未去到為買而買或者用完今朝唔理聽朝。

最後成績：A-

總結今個夏窗，各項成績如下：

• 即時戰力提升：A
• 陣容完整度：B+
• 戰術適配：A-
• 出售及清洗能力：A+
• 買入性價比與風險控制：A-
• 交易程序與球會操守：A-

所以返去文章最初果條問題：今個夏窗，車仔嘅操作合唔合格？

我嘅答案係A-。唔止合格，甚至相當接近一個優秀嘅轉會窗。

門將、中堅、翼衛同前場都有實際提升，後備配置亦比上季完整；沙比有份參與招聘，大部分新兵都有清楚角色。出售方面更加無乜可以挑剔，無論主力、邊緣人定長期無一隊位置嘅球員，車仔幾乎全部換到合理回報。

今次轉會部門證明咗兩件事：班華爾街狼人非常識賣人，亦開始識得買一批教練真正知道點用嘅球員。至於死線日嘅風險管理，睇嚟就仍然要交學費學嘢。