【車迷觀點】車仔個Fd史堡又双叒換帥 受害者係高普徒弟馬圖斯

唔准 Google,今年夏天,原本史堡嘅主帥加利奧尼爾去咗教葉士域治,邊個接手教史堡?嗱俾10秒你,如果你答得出「曉高奧利華」,咁篇文大概就係寫俾你睇。
其實我欠咗奧利華一篇文。季初本身想介紹下呢位新領隊,寫到一半,睇返史堡個夏天走咗幾多人,愈寫愈覺得佢慘,結果篇稿就咁擺低咗。到今個星期再見到佢個名,已經係《The Athletic》話史堡炒咗佢,再搵咗史雲斯個領隊馬圖斯過嚟接手。
我篇新帥介紹都未寫完,史堡已經搵緊下一個。平時我認係自己出文慢,但今次點睇都唔可以淨係怪我啩………
十場失廿二球,奧利華有幾冤枉?
先睇成績。史堡今季踢咗十場法甲,三勝一和六負,失咗足足廿二球。最傷係近七場只係攞得四分,唯一一勝仲要係大炒歐塞爾 5:1;嗰晚贏得幾靚都好,另外六場加埋得一分,入國際賽期只係高降班附加賽區兩分。望住呢張成績表,史堡高層aka BlueCo想換人,我明。
但我八月寫史堡嗰陣,聯賽都未開鑼,已經問過 BlueCo 今次割韭菜係咪割到連根拔。上季史堡好地地打入歐協聯四強,結果過咗個夏天,領隊去咗葉士域治,核心嘅巴高同艾美加就去車仔坐後備席同洗廁所。去到奧利華接手嗰陣,史堡個陣已經爛到入心,買人都好要砌得返做一隊波都要花相當時間。
十場失廿二球,做領隊嘅當然要交代。只係我覺得佢最冤枉嘅地方在於,BlueCo 今個夏天將隊波拆骨拆到咁,點都預咗新領隊要花時間重新砌過副偈啩?點知原來喺佢哋心目中,所謂「俾時間你執返好」,就係得十場法甲咁大把。
咁馬圖斯又係咩料?
至於史堡今次睇中嘅新帥馬圖斯(Vítor Matos),今年 38 歲,來頭一啲都唔細。佢之前喺利物浦跟足高普五年,專責做青年軍同埋一隊之間嘅戰術橋樑。
睇返佢喺史雲斯嘅執教軌跡,其實幾有說服力。舊年十一月,史雲斯由葡甲馬里迪莫請佢過檔救火,當時球隊排緊英冠第二十,距離降班區得四分;結果去到季尾,馬圖斯帶隊爬返上第十一收工。嚟到今季仲誇張,頭十五場贏足八場,直接殺上聯賽第六。舊年呢個時候,人哋請佢返嚟係為咗護級;一年後球隊爭取緊升班,就輪到史雲斯要頭痛點樣留住佢。
咁佢手下隊史雲斯到底有咩好睇?上個月佢哋大炒布力般流浪四粒,對家領隊莫比利賽後訪問形容得好傳神:自己班球員喺場上一攞到波,體感上就好似即刻有三個史雲斯球員圍埋嚟搶咁。翻查返史雲斯官網份上季總結,自從馬圖斯接手去到季尾,佢哋嘅場均高位反搶次數已經衝上英冠第二。
史堡肯畀幾耐時間佢教?
好啦……俾你個馬圖斯真係去史堡,咁史堡應該要變成點?
一個字,搶。
用返馬圖斯嘅經歷,睇怕史堡會活用而家陣容嘅年輕度,大打逼搶足球。只要馬圖斯套反搶喺前場截到反擊,後面班守衛自然可以少追幾轉。
但針無兩頭利,戰術一樣。一條友上去逼,後面兩個幾時一齊壓上去、幾時要一齊退後,呢啲默契從來都唔係載入戰術就即刻有,班後生仔點都要落場踢過、撞過板、失過位,再返去訓練場慢慢執。
上季史雲斯俾咗馬圖斯大半季時間去磨,去到今季先真正收到打入升班附加賽區嘅成果;反觀史堡今個夏天先將隊波拆散晒,俾奧利華試咗十場未夠就即刻請佢食豉椒炒魷,然後走去睇中人哋磨咗足足一年嘅成品。
所以我其實幾期待睇馬圖斯教史堡。只係我忍唔住會諗:如果嚟緊頭十場踢完,史堡班後生仔先啱啱開始學識點樣三個人一齊搶波,而聯賽榜又仲排緊第十三嘅話………冷氣房入面嘅 BlueCo,到時仲有無耐性睇埋第十一場先?
嗯,買定包花生先,十場後再傾。
