【車迷觀點】史堡五連敗後終和紐卡素 BlueCo割韭菜割到連根拔？
最近出文速度已經明顯慢咗。以前見到單新聞，可能即日已經開稿；而家由諗題、搵資料到真正落筆，隨時人哋單新聞都變舊文。
照道理，有限嘅出文Quota應該留返畀啲多人關心、呃到流量嘅題目。但史堡今個夏天搞成咁，我又真係好難唔提下。
本來呢篇文係由五場熱身賽全敗果時寫。點知我仲未排到篇文出街，史堡喺最後一場熱身賽逼和紐卡素，再靠十二碼捧走VisitMalta Weekender冠軍。打算大大隻字喺標題寫住史堡五連敗BlueCo食撚屎嘅我，呆撚咗。
但呢場反彈，反而令問題變得更加清楚。
史堡當然唔係死咗，新帥Oliveira亦未必真係收到一箱爛零件。真正值得問嘅，唔係佢哋今個夏天輸咗幾多場，而係點解BlueCo明明不斷養出好球員，史堡每隔一段時間卻總要由接近散架嘅狀態重新開始？
五連敗唔係死因，只係症狀
史堡季前先後以0：7輸士砵亭、0：2輸布力般流浪、3：4輸白禮頓、2：5輸艾華斯堡，再以0：2不敵弗賴堡。首五場全敗，合計入5球失20球，無論熱身賽有幾多水份，個樣都唔會好睇。
不過，熱身賽始終只係熱身賽。
史堡開操較遲，世界盃兵陸續先歸隊，新教練又要試人同轉陣。最後一場對紐卡素，佐真遜已經補上龍門位置，球隊落後之後亦能夠追成1：1，再靠十二碼捧盃。證明史堡並非已經壞死，新一批人腳亦開始砌出少少形狀。
所以，五連敗唔足以判Oliveira死刑，更加唔代表史堡新季一定收皮。但六場法定時間五負一和、入6球失21球，至少反映出一件事：呢隊波又一次要用整個季前重新建立最基本嘅默契。
而呢次重新開始，並唔係突然發生。
半年內，成熟一棵抆一棵
第一刀早喺一月已經劈咗落嚟。
羅生季中直接升職去車路士，史堡唯有臨時搵O’Neil接手；同一時間，正選中堅沙亞被車仔提早收回。短時間內同時換教練、抽走後防主力，原本建立咗半季嘅體系已經要重新調整。
去到季尾，史堡再失去一批已經成熟嘅核心。
隊長艾美夏加盟車路士，巴高亦被車仔買走，正選龍門彭達斯借滿歸隊。艾美夏提供前場速度同縱深，巴高負責左路推進、組織同定位球，彭達斯就守住最後一關。呢三個人唔係求撚其三件可以隨時替換嘅蛋散，而係分別支撐住前場、後場出球同龍門位置。
然後連負責重新砌隊嘅人都走埋。O’Neil接手不足半年便轉教葉士域治，史堡半年內迎來第三位教練。Oliveira七月中先正式上任，既要重新建立踢法，亦要等新一批人腳陸續到位。
球員離隊本身唔係意外，亦唔可以全部屈落車路士度。
彭達斯本身就係借將，借期幾時完一早定好；艾美夏加盟車路士更加早於2025年已經安排；巴高升值後被出售，亦係BlueCo養成模式嘅正常流程。養成球會要出售球員，本身無罪。
真正要問責嘅係銜接。
BlueCo明明一早知道邊啲人會走、幾時會走，但史堡仍然要去到最後一場熱身賽，先見到佐真遜正式補上龍門，先開始砌返出一隊完整少少嘅球隊。
對紐卡素嘅表現證明新零件唔一定差，甚至可能幾好用。問題係交貨太遲，Oliveira只能夠一邊安裝，一邊準備開季。
呢種情況偶爾發生一次，可以當轉會窗甩轆；但當史堡每年都要送走最成熟嗰批人，再用新教練、新核心同新角色重新開始，問題就唔再係某一單交易，而係成套模式對球隊延續性造成嘅固定成本。
點解明知會傷，仍然要繼續收割？
答案唔止係BlueCo鍾意Trading，仲有條數逼住佢哋繼續做。
UEFA判史堡嚴重違反SCR，完整罰款係€25M，當中€13M要即時支付，另外€12M就視乎球會能否大幅降低球隊成本比例。€13M大約等於史堡上季殺入歐協聯四強所得嘅收入，換句話講，辛苦踢足一季賺返嚟嘅歐戰錢，差唔多原封不動交返畀UEFA。
更加麻煩嘅係，史堡今季無歐戰。
少咗獎金、門票同商業曝光，收入下降；但人工同轉會攤銷唔會因為星期四晚得閒咗就自動消失。要將SCR壓返落70%，最直接嘅方法始終係控制支出，同繼續出售球員套現。
於是BlueCo養成模式開始自己咬自己條………尾。
史堡將球員養大、升值再出售，球員買賣自然非常成功；但成熟主力離隊之後，球隊戰績同延續性就更容易受影響。戰績受影響，歐戰收入消失；收入下降，球會又更加需要出售球員改善條數。
呢個循環唔代表BlueCo模式已經失敗。相反，最尷尬嘅地方正正係佢運作得相當成功。
艾美夏、巴高同彭達斯順利成材，證明史堡確實有能力培育球員；對紐卡素一役亦證明，新人到位之後，球隊並非無法重新建立競爭力。
但Excel計到一個球員幾時升值、幾時出售最有利，計唔到一隊波每次拆完再砌，要幾耐先重新建立默契。球員交易所得嘅收益會即刻入帳，失去延續性嘅代價，就要由教練、球員同球迷喺球場上慢慢支付。
韭菜可以割，但唔可以抆呀大佬
諗咗一輪，最初我想用「拔苗助長」形容BlueCo，但其實唔完全準確。
BlueCo種出嚟啲苗唔係無生，直頭生得好靚。問題係每逢有一棵開始成熟，佢哋就即刻連根拔起，搬去車路士或者拎出市場套現。
養成球會要賣人，其實天經地義。韭菜長成唔割，唔通真係留返嚟開花咩？
但正常收割會留返條根，等下一批慢慢長出嚟。每年賣走一兩個主力，球隊仍然可以靠原有教練、骨幹同體系延續落去；如果連教練、隊長、龍門同幾個核心位置一齊換，嗰個已經唔叫收割，而係成棵抆走。
球員成長同球隊成長，從來係兩個唔同嘅時鐘。
一個新仔可以喺半年內升值，一隊波就要經歷磨合、犯錯同調整，先慢慢建立角色、信任同默契。BlueCo可以加速前者，卻無辦法Bypass後者。
所以史堡真正要證明嘅，從來唔係下一批新仔夠唔夠高潛力。BlueCo已經證明咗自己識買人、識養人，亦非常識賣人。
真正未證明嘅，係佢哋識唔識留下足夠嘅根，令史堡唔使每逢收成之後，都重新變返一塊地。
否則BlueCo當然可以年年豐收，但史堡永遠只會係一間成功嘅育苗場，成為唔到一隊真正成熟嘅球隊。