【車迷觀點】五場過後車仔怒失N個死球　死球部門係呃飯食定真材實料

至少進攻端證明，呢班人唔係白受糧

先睇最直接嘅成果。

按照Set-play xG數據，車路士頭五場英超由死球製造咗約2.94 xG，實際攻入3球。換句話講，入球數同創造出嚟嘅機會質素相當接近，唔係靠住兩三腳世界波，扮到自己好勁咁款。

對賓福特賽前，車路士官方亦特別提到，頭四輪英超只有白禮頓嘅死球入球比車仔更多。官方出文多數會揀好聽嗰面嚟講，但至少證明一件事：進攻死球唔係完全無產出，嗯，好事嚟嘅。

然後就大家記憶猶新啦，對賓福特一戰踢得肉酸。車仔全場有12個角球，set-play xG只有0.24，佔盡數量都無製造到幾多真正威脅。

當然，單場食白果，唔足以抹走前四場累積落嚟嘅成果。所以第一關嘅答案其實幾清楚：有。

至少喺進攻端，死球部門確實交出咗可以量度嘅回報。

有入波，唔代表全部係麥菲功勞

有產出係一回事，啲產出有幾多真係來自死球部門，又係另一回事。

最典型係對阿仙奴嗰球。占士由中場附近開出罰球，個波經過連續四次頭槌，最後懷斯解圍失敗，羅渣士喺禁區外窩利射入。《The Athletic》賽後亦提到，呢球好難直接歸功於一套精密設計。

羅渣士留喺禁區外等第二點，可能係預先安排；但個波連彈四次，再啱啱好落到佢面前，如果話你知麥菲賽前對球員講：「我就估個波會喺禁區彈足4次跌去果度，羅渣士你去果邊Standby啦。」，我打完段字都笑咗。

不過，判斷死球部門有無做嘢，亦唔可以只睇最後邊個入波。對賓福特大量使用短角球，就明顯係一個針對對手嘅選擇。

車仔全場傳中只有2次成功，成功率得7%。由生波進攻開始，尼圖同查華利亞已經好難將個波送過賓福特嗰排高大防線。如果角球照樣直接吊入去，只係換個位置再撞多次牆。

開短嘅目的，就係逼一名守將離開禁區，再改變傳球角度，避免同對手企定定鬥高。問題唔係短開本身，而係拉咗人出嚟之後，車仔有無做到下一步。

77分鐘嗰次，短角球成功製造羅渣士傳中，再引發巴高喺禁區內倒地嘅十二碼爭議，至少成套配合有將個波送入危險位置。48分鐘嗰次就完全相反，幾腳轉移過後，查華利亞將個波笠去一個無人嘅位置，前面做咗咁多嘢，最後一下全部清零。

所以「嘢嘢都開短角球」唔係問題本身。車仔點解咁開至少有合理答案；真正未有答案嘅係，球員能否將第一步部署變成最後一下威脅。

頭五場睇落，進攻死球確實有刻意安排，但完成度未夠穩定。麥菲可以認領當中一部分功勞，未去到每粒死球入波都可以拎返屋企掛喺牆上做自己戰利品。

防守有部署，但結果唔合格

如果只睇企位，車仔嘅防守死球並唔係十個人縮入禁區，然後等個波跌落嚟。

對阿仙奴守角球時，車仔曾經一次過擺四名球員喺禁區外甚至前場。對侯城亦見到類似安排，刻意將多人留喺外圍，用反擊威脅迫對方留人看守。

作用其實好直接。進攻方本來可以將大部分高大球員推入禁區搶點，但當車仔前面留住幾個人，對手就唔敢將所有人塞晒入去。表面上車仔少咗人協助防守，實際上亦同時削減對方可以參與進攻嘅人數。

類似做法上季古華已經用過，唔係麥菲落車第一日突然發明。不過選擇保留呢套安排，再因應對手調整留前人數，本身仍然係死球部門嘅部署。

問題係，有部署唔等於有效果。

按照Sky Sports嘅統計口徑，車路士頭五場英超已經失咗4個死球。數據亦顯示，對手五場由死球累積製造約4.27 xG。失球唔係幾次低機率攻門全部碌入，而係車仔堅係持續俾人製造到高質素機會。

對侯城嗰球，車仔雖然用前場人數拉走對手，但角球開入禁區後，阿積伊仍然搶到第一點，再由Belloumi完成攻門。你可以減少對方入禁區嘅人數，但留低嗰班人守唔住第一點同第二點，前面拉走幾多個都無用。

對阿仙奴亦一樣。車仔留四個人喺前面，的確令對手無法將全部兵力推入禁區；但阿仙奴用低腰波同反方向操作，照樣將禁區搞到一鑊粥。卡拉費奧利最後因越位食詐糊，只代表車仔逃過失球，唔代表原本嘅防守安排成功。

最難辯護始終係賓福特嗰球。Janelt賽後直接講，佢哋上半場已經發現車仔遠柱有大片空位，所以決定下半場專攻嗰邊。結果第一次角球就照住計劃執行，由舒達碧克喺遠柱搶到第一點，再由Anthony完成攻門。

對手唔係求其斬入去撞彩，而係用45分鐘睇到問題，再用一個角球解決車仔。

球員當然有責任。輸第一點、走甩對手、起跳慢半步，全部都係落場嗰班人要處理。但當侯城可以搶第二點、阿仙奴可以用傳送方式繞過安排、賓福特更加可以半場鎖定遠柱漏洞，就唔能夠將每一次都分開當成球員突然斷線。

車仔防守死球唔係無部署，甚至睇得出教練團想主動限制對手擺幾多人入禁區。只係頭五場交出嚟嘅結果已經好清楚：有諗法，但暫時守唔住。

最後判決

寫到最後，死球從來唔會一日練成。單係睇麥菲喺場邊嘅反應，有時揮手揮到成個重金屬樂隊主音咁，有時個波開咗出去就即刻攤大雙手轉身抱頭，唔使收音都知佢屌咗出聲，明顯球員實際做出嚟嘅嘢，同佢腦海入面預設嘅畫面有差異。

當然啦，想像同實際執行本身就係兩個世界。想像中嘅我一樣識倒掛金鈎，實際落到場，可能跑兩步已經喘氣。麥菲可以設計好每個人幾時起步、邊個拉走對手、皮球落喺邊一點，但真正落場之後，球員身高、起跳時間、對手臨場改動，甚至當日嘅日照角度同風速，都足以令戰術板上面嗰幾條靚箭嘴變成無意義嘅鬼畫符。

但呢啲因素可以解釋一個死球戰術點解失敗，唔可以永遠替死球部門免責。專門教練存在嘅價值，本來就唔係創作一套想像中完美嘅套路，而係盡量減少呢啲不確定性，令球員喺混亂入面仍然知道自己應該企邊、望邊同做乜。

所以五場過後，我嘅初步判決係：麥菲唔係無料，死球部門亦唔係多餘，但目前交出嘅整體成績仍然不合格。

嗯，我唔期望死球會突然突飛猛進，但求神拜佛，失少幾球我已經會還神……