【車迷觀點】場場入三球都搞唔掂　車仔真係可以用山齊士贏英超？

兩個失球，兩次唔同判斷

先講第一球。King同Castagne撞牆後由右邊殺入禁區，山齊士當時嘅企位偏向球門中央，重心亦似乎預留咗處理橫傳嘅可能。呢個判斷唔係完全無道理，因為中路有人接應，King嘅射門角度亦相當窄。

但龍門第一件事，始終係封死對手最短嘅入球路線。King最後無傳中，直接射向近柱，山齊士先將重心移返左邊，落地已經慢咗半拍。呢腳射門只有0.07 xG、0.07 xGOT，代表無論位置定射門質素，本來都唔應該構成太大威脅。後防畀King入到禁區當然有責任，但去到最後一下，主要就係山齊士守錯咗答案。

第二球就無咁直接。

Castagne第一腳射門只有0.09 xG、0.03 xGOT，山齊士確實將波救出。

問題係佢既無接實，亦無將波撥向兩邊，而係擋返去龍門正前方，畀Gonzalo García補頂。去到第二腳，射門已經升級成0.56 xG、0.94 xGOT，幾乎無可能再救。

當然，電光火石之間要求龍門精準控制每一個反彈方向，可能有事後孔明之嫌；門前邦仔無控制García，同樣要分擔責任。所以第二球唔係山齊士一個人全責，但頂級龍門同普通龍門嘅差距，往往就係救出第一腳之後，有無順手將第二次危機一併消滅。

兩個失球嘅共同點，唔係山齊士無能力撲救，而係佢將危險處理錯咗次序。第一球防範可能出現嘅橫傳，但放走眼前嘅近柱；第二球完成最基本嘅擋波，又無將反彈球送離最危險區域。佢唔係無做決定，只係兩次都無揀到最好嗰個答案。

英超冠軍可以帶住一個不穩定龍門嗎？

翻查英超歷屆冠軍，要搵一個公認能力較差、全季穩坐正選，最後照樣捧盃嘅龍門，其實比想像中困難。舒米高、施文、施治、雲達沙、古圖奧斯、艾達臣同艾利臣，幾乎每個王朝背後都有一個穩定甚至頂級嘅最後防線。

最接近例外嘅，可能係1999/00球季曼聯。舒米高離隊後，費格遜先後用過保斯尼治、雲達高同泰比，龍門位置一度相當混亂，泰比更加比山齊士更加出名(笑)。但曼聯嗰季聯賽攻入97球，最後以18分優勢奪冠。佢哋唔係證明龍門唔重要，而係話俾大家知，只要我攻擊力夠，後面幾差都一樣奶得起。

到2002/03球季曼聯嘅巴夫斯，以及2013/14球季曼城嘅祖赫特，亦可以算係不穩定龍門奪冠嘅例子。不過兩人巔峰期本身都係頂級門將，只係嗰段時間表現反覆。祖赫特狀態下滑時更加曾經被收起，由彭迪利蒙連續正選七場，其後先重奪位置。

所以歷史提供嘅答案唔係「差龍門一樣可以贏英超」，而係一支冠軍隊偶爾可以承受龍門不穩，但必須具備壓倒性進攻、成熟防線，或者有能力及時作出輪換。龍門犯下嘅錯，始終要由球隊其他地方埋單。

車路士找唔找得起呢張單？

齋睇今場結果，答案好似得得哋？山齊士失兩球，前面就入返三球，最後三分袋袋平安。更加諷刺嘅係，車路士第三球正正由山齊士長傳發動，再由祖奧柏度一路推進完成反擊。山齊士唔係純粹企喺後面倒米，有時甚至會親自落場幫手填返自己挖出嚟嘅窿，上季又好，世冠盃又好都不停有證明過呢件事。

問題係，英超唔係每場都會畀你入到三球。

車路士今季中前場嘅人腳確實有條件製造大量入球，但有潛力同穩定輸出始終係兩回事。彭馬、羅渣士同祖奧柏度今場全部有波入，唔代表三個人可以連續38場替後防補血。尤其成隊波仍然年輕，新球員、新教練同新體系全部一齊開機，前線自己都會有啞火同交學費嘅時候。

仲要…中後場暫時亦唔似有能力替山齊士兜底。今場車路士中場多次被富咸輕易越過，三中堅之間嘅距離、門前看管同第二點保護亦未成熟。當龍門犯錯時，成熟防線理應幫佢清走反彈球；當防線失位時，頂級龍門亦應該間中救返隊友一命。但而家嘅情況，反而似大家排住隊等對方幫手執屎，於是，就大家身上都有屎…仲要一齊臭。

呢個先係車路士最大問題。山齊士嘅錯誤唔係獨立發生，而係疊加喺一條同樣未成熟嘅防線上。1999/00曼聯可以靠97個入球奶住龍門亂局，但今日嘅車路士，前面未證明有同級火力，後面亦未有足夠穩定性。

總結：唔係無可能，只係車路士未負擔得起

理論上，有山齊士做正選唔代表一定無可能贏英超。問題只係將條件放返落今日呢支車路士，小弟就算搵到時間寶石，睇晒1,400,605個結局，都未必搵到幾多個可以順利捧盃。

唔係因為山齊士差到場場送波，而係成隊波本身仍然充滿變數。前線有爆發力但未證明可以穩定輸出，中後場又仲喺度夾緊。當每一條線都需要時間成長，龍門就唔可以同時成為另一個等待全隊補救嘅位置。

換走山齊士當然唔等於即刻換返一座英超冠軍。只不過現階段車路士需要嘅，唔係一個間中可以救全隊嘅龍門，而係一個唔需要全隊間中救返佢嘅龍門。