【季前分析】£117m羅渣士注定正選　車仔左翼仲有咩好頭痛？

寫到第四篇，終於輪到左翼。照返之前嘅玩法，今篇應該將羅渣士、尼圖同基頓斯排排坐，再扮晒蟹咁問大家邊個最適合做正選。問題係，車路士用£117m破紀錄買羅渣士返嚟，沙比又開口講明佢由左邊入嚟最舒服，除非佢第一課操練已經得罪晒成間球會，否則個正選位大概打風都打唔甩。

尼圖本職始終偏向右翼，擺去左邊更加似兼職；基頓斯上季就傷多過踢，連一份足夠穩定嘅英超數據都交唔出。表面上係三個左翼競爭一個位置，實際上呢場比賽未開始，就已經知道結果。

「你老味咁你仲寫？又嚟呃稿費？」

但正選係邊個，同左路打算點樣運作，係兩條完全唔同嘅問題。陣容表將羅渣士個名放喺左邊，唔代表佢會乖乖黐住邊線；尼圖同基頓斯就算唔係正選，亦代表另外兩種完全不同嘅左路選擇。

所以今篇唔問邊個最強，亦係唔扮三國鼎立。真正要問嘅只有一句：「車路士想個波點樣由左邊入禁區？」