【季前分析】車仔3000個中鋒大盤點 祖奧柏度以外嘅Plan B點揀？
上兩篇右翼同右閘比較，反應比預期中更好。既然大家肯睇，我當然唔會客氣，繼續添食，添到大家見到雷達圖已經想撳Unfollow先考慮收手。
第三篇輪到中鋒。本來人選應該無乜懸念，祖奧柏度、戴納同艾美夏排排坐，三個人啱啱好。點知開季前夕，車仔買入韋碧克，戴納又疑似得罪沙比被踢出一隊。篇文都未開始寫，人選已經變嚟變去。
嗯，太多人揀反而麻煩。於是望一望現有餐牌，直接將祖奧柏度、韋碧克同艾美夏擺埋一齊。
中鋒嘅工作表面上最簡單，總之入波就得。但車路士身邊已經有彭馬同一大堆翼鋒等住要球權，單純自己入得多，又係咪等於最適合成隊波？
所以今篇要問嘅好簡單：
「車路士最需要嘅，究竟係一個自己入波嘅中鋒，定係一個令身邊所有人入波嘅中鋒？」
三個都識入波，分別係入波之前做過啲乜
開始講數據之前，忍唔住望一望FP隔離小編（Link唔貼啦）。佢話車仔一線隊有8名中鋒，標題直頭係「8名中鋒爭1個位」。8個（笑）。
如果計埋U18同U12，我諗寫夠20個都得。將等住賣、準備外借、連一隊位置都未穩嘅球員全部倒落同一個盤，再認真問沙比究竟點揀，自己講出嚟唔笑嗰下真係好嘢。人頭多唔代表競爭真係多，以開季前嘅情況計，值得擺埋一齊討論嘅暫時就係祖奧柏度、韋碧克同艾美夏。
圖中祖奧柏度同韋碧克用25/26英超數據；艾美夏上季傷到九彩，勉強拎嚟計只會畫出一份醫療紀錄，所以改用佢24/25法甲健康上陣時嘅版本。三條線比較嘅係各自喺所屬聯賽同位置球員之中踢出嚟嘅角色，唔係將英超同法甲當成同一個難度直接評分。
最有趣係，三人嘅入球產量其實差唔多。祖奧柏度每90分鐘入0.50球、韋碧克0.52球、艾美夏0.55球。即係大約兩場一球，真正分別要將畫面倒帶，睇下射門之前嗰段路，佢哋各自參與咗幾多。
祖奧柏度條藍線最完整。佢每90分鐘成功傳球17.57次、創造機會0.98次、成功盤扭1.35次，對抗成功率亦有48.3%，幾項都係三人最高。佢會落嚟接應、轉身、駁腳甚至自己盤扭推前，再趕返入禁區完成攻勢。由接單、生產到送貨都要插手，最後仲要親自簽收，算係全能先生。
韋碧克就將工序刪到最少。佢每90分鐘成功傳球15.35次，傳球成功率有79.4%，但盤扭只有0.44次，對抗成功率亦得36%。佢更多係用一兩腳完成接應，再去下一個位置等機會。每90分鐘只被搶斷0.80次，唔係因為護球天下無敵，而係佢好少拖住個波將件事複雜化。
艾美夏就最極端。佢每90分鐘非十二碼xG有0.65、射正1.37次、前場奪回球權0.82次，三項都係最高；但成功傳球只有10.63次，成功盤扭更加得0.27次。1米95嘅身形唔代表佢係Target Man，真正武器係速度、無球走動同攻擊身後空間。其他兩個人會參與將個波搬上前，艾美夏就預早衝去終點等收貨。
簡單講，祖奧柏度參與成條生產線，韋碧克負責縮短生產線，艾美夏就直接企喺出貨口。
幫隊友入波，未必要自己掂到個波
但返去開頭嗰條問題，如果要分「自己入波」同「幫隊友入波」，最直覺當然係望助攻。祖奧柏度有5次、艾美夏3次、韋碧克得1次。照咁排，艾美夏甚至比韋碧克更加識做波。
問題係三人每90分鐘xA分別只有0.07、0.03同0.06，全部唔算高。尤其艾美夏3次助攻背後只有0.70總xA，與其話佢創造力強，不如話隊友生性，將一啲唔算太靚嘅機會變成入球。
祖奧柏度嘅幫助最容易睇見。佢墮後接波時，中堅如果跟住走，身後就會出現空位；唔跟，佢就可以自己轉身向前。最難得係佢唔係落咗去就唔上返嚟，每90分鐘仍然做到0.50非十二碼xG，證明佢參與完起步，仲趕得切返入禁區完成攻勢。
代價係當佢落得太深，兩翼或者彭馬必須有人補入禁區。否則成隊波駁得好順，最後抬頭一望，先發現中間無人收貨。
韋碧克嘅幫法無咁花巧。佢會用一兩腳將個波交返俾隊友，再移去下一個位置牽制中堅。價值唔係突然變出一個機會，而係盡量唔好令自己成為進攻黑洞。不過佢對抗成功率只有36%，如果後場不停大腳掟個波上去，叫佢一個人背住中堅做支點，就未必係佢熟悉嘅服務範圍。
艾美夏就示範咗最難喺數據表睇到嘅幫助。只要佢向中堅身後起步，對方防線就要決定跟唔跟。退後一步，彭馬同中場面前自然多一格空間；企住唔郁，艾美夏就可以衝入去收直線。即使個波最後無傳俾佢，嗰次走動本身已經改變咗防線位置。
不過對住成隊縮入禁區、完全無身後空間嘅對手，或者隊友根本送唔出適時直線，佢亦可能跑足成場都似無出現過。
所以中鋒令隊友入波，從來唔只係交出最後一傳。祖奧柏度用接應串連攻勢，韋碧克用簡單處理避免斷纜，艾美夏就靠走動迫防線讓出空間。有人用個波幫隊友，亦有人最有用嗰刻，偏偏連個波都無掂過。
正選無懸念，真正要揀嘅係Plan B
放返落車路士，祖奧柏度做正選其實無乜懸念。唔係因為佢每項數據都贏，而係三個人之中，只有佢可以同時做入球點同連接點。教練唔使每場先揀其中一份工作，因為祖奧柏度一個人做晒兩份，人工仲要只出一份，爽。
真正值得揀嘅，係祖奧柏度唔踢前鋒或者唔上陣時，球隊想保留啲乜。
如果想原套攻勢繼續運作，韋碧克會係比較穩陣嘅答案。佢無祖奧柏度嘅自行拆局能力，但處理簡單、失誤少，亦識得走入位置完成機會。換佢入場，彭馬同翼鋒大致唔需要重新學過點踢，只係成套進攻由完整版切換成慳電模式。
艾美夏就唔係祖奧柏度嘅代用品。佢需要隊友將個波送到前面，未必適合陪球隊慢慢圍住低位防線猜；但當對手防線推高、體力開始下降，或者車路士需要更加直接咁追入球，佢嘅無球衝刺就可以換一種攻擊方法。有時原本塞住嘅空間，未必要多傳十腳先打得開，放隻跑狗直衝落去已經夠。
當然，艾美夏嘅數據來自24/25法甲，25/26又受傷患影響，能否將同一套踢法完整搬到英超，仍然係三人之中最大問號。佢代表嘅係戰術上限，唔係即插即用嘅保證；韋碧克就相反，上限未必令人嘩一聲，但比較清楚球隊會得到啲乜。
所以返去開頭條問題，車路士最需要嘅唔係一個純粹自己入波，或者純粹幫身邊人入波嘅中鋒。正選答案係可以同時做兩份工嘅祖奧柏度；韋碧克負責喺球隊唔想改題目嗰陣，交出一份簡化但合格嘅答案；艾美夏就負責當條題目解唔開嗰陣，索性換另一份試卷。
明明話自己跟餸食飯兼懶得搵多幾個人嘅數據，最後又寫到三個前鋒各有用途。咁睇落，車路士真正嘅優勢唔係餐牌上有幾多個「9號」，而係沙比識唔識睇住對手，叫碟啱嘅餸。
【數據方法論備註】本文使用FotMob聯賽每90分鐘數據。祖奧柏度及韋碧克採用25/26英超數據，分別上陣2,674及2,263分鐘；艾美夏因25/26受傷患影響，改用24/25法甲2,302分鐘數據。雷達圖百分位反映球員喺各自聯賽及位置比較組內嘅相對排名，只用作比較角色形狀，唔代表跨聯賽直接能力評分。