【季前分析】車路士三右閘爭兩張櫈　古斯圖真係最廢最應該賣？

個波點樣上去，三個人三種答案

同上一篇一樣，以下用嘅係25/26球季聯賽每90分鐘數據，圖中位置代表球員喺所屬聯賽同位置比較組嘅百分位，中間虛線就係第50百分位。不過今次要戴多頂頭盔：占士同古斯圖上季都有部分時間踢中場，帕拉斯查就主要喺意甲踢右閘同右翼衛，所以幅圖比較嘅係三人實際踢出嚟嘅角色，唔係純粹右閘能力值。

占士條藍線最搶眼嘅地方，係成功傳球、預期助攻同成功傳中。佢每90分鐘成功傳球54.06次，幾乎係帕拉斯查兩倍半；成功傳中亦有1.38次，三人之中最高。奇怪係，佢每90分鐘禁區內觸球只有0.73次，遠低過另外兩人。

呢個唔代表占士對腳生鏽，跑唔郁要留喺後面養生，而係上季嘅佢更多會由右閘移入中場，甚至直接以中場身份上陣。佢唔需要自己衝入禁區，留喺較後位置接波、轉邊同送出最後一腳，一樣可以製造威脅。占士，負責嘅唔係自己殺入禁區，而係決定個波點樣送上去。

帕拉斯查條粉紅線就完全相反。佢每90分鐘成功盤扭2.04次、禁區內觸球2.33次，兩項都係三人最高，但成功傳球只有21.54次。卡利亞里唔需要佢喺後場傳完又傳，而係直接將成條右路交俾佢：攞波、加速、撞過對手，再殺到前場先算。

至於幅圖上面接近六成嘅對抗成功率，亦唔可以直接解讀成防守穩陣。帕拉斯查大量盤扭同搏得犯規，本身已經會推高整體對抗數字。佢證明咗自己可以頂住對手將個波帶前，未證明嘅係面對英超翼鋒時，能否同樣咁將對手擋返轉頭。

古斯圖就企喺兩者中間。佢每90分鐘成功傳球43.55次、奪回球權4.84次，禁區內觸球亦有1.91次；但無占士咁大量控制比賽，亦無帕拉斯查咁靠盤扭爆破。佢最常做嘅係由右閘走入中場接應，再一路跟住攻勢向前，間中直頭走到十號位或者禁區附近。其他兩個人係想辦法將個波搬上去，古斯圖就更加似先將自己搬去下一站，等個波去搵佢。

樣樣識，點解反而最危險？

組軍最殘忍嘅地方，係球會未必由最廢嗰個開始賣，而係睇抽走邊件零件之後，部機仍然可以照行。講明，我唔講國籍、青訓身份、利益乜乜柒柒呢啲，單純由競技角度講。

抽走占士，車路士失去嘅唔只係一個右閘。三個人之中，只有佢可以留喺較後位置承擔大量傳球、長傳轉邊同最後一腳，同時提供對抗、高空波同防守保障。古斯圖可以內收駁腳，帕拉斯查亦唔係完全唔識傳波，但要其中一個完整複製占士嘅工作，暫時都有少少為難人。

抽走帕拉斯查，損失就更加顯眼。成功盤扭、速度、推進同殺入禁區，全部都係另外兩人無法提供嘅極端能力。車路士當然可以靠右翼或者中場將個波運上前，但右閘位本身就再無一個可以接波後直接撞穿成條邊線嘅人。

去到古斯圖，情況就開始微妙。要內收駁腳，占士做得更加穩；要自己推進，帕拉斯查更加直接；要去到禁區附近接應，其他中場同翼鋒亦可以靠移位補上。古斯圖每樣都識，偏偏無一樣係抽走佢之後，球隊完全搵唔到第二個人處理。

呢個唔代表古斯圖無特色。佢由右閘走入中場，再由中場衝到禁區附近嘅能力，正正令教練可以喺一場波入面不停轉換陣形。只不過當球會由「點樣用佢」轉去考慮「無咗佢會點」時，百搭反而會變成一種尷尬：既然每份工作都可以分拆俾其他人，咁係咪真係需要專登留一個人將佢哋綁埋一齊？

所以古斯圖成為最容易被拎去變賣嗰個，未必因為佢能力最低，而係占士同帕拉斯查各自有一件更加難代替嘅武器。三揀二嗰陣，球隊自然更容易留下兩個極端，再犧牲中間嗰個。

之不過，呢套計法有一個幾大膽嘅前提：占士要長期健康兼繼續踢右閘，帕拉斯查亦要落到英超即插即用。只要其中一樣出錯，賣古斯圖就會變成賣走自己唯一嘅救生圈。

三個右閘，未必真係突腳

不過我成篇文最值得懷疑嘅地方，可能係開頭嗰句「三個只能留兩個」。車路士睇落有三個右閘，但三個人根本未必長期爭同一張櫈。

占士上季有唔少時間直接踢中場，必要時亦可以落去右中堅；古斯圖除咗右閘，亦踢過左閘、中場同翼衛；帕拉斯查喺意大利就兩邊閘位同翼衛都踢過，沙比已經兩場都搵佢兼職左閘。球員註冊表上面全部寫住右閘，實際上三個人可以填嘅窿遠遠多過一個。

呢點正正係古斯圖最容易被低估嘅地方。當大家比較正選上限，佢無占士同帕拉斯查咁搶眼；但去到漫長球季，正選受傷、停賽、需要輪換或者臨場轉陣，教練未必需要另一件最強武器，反而需要一個唔使重新砌過成套戰術都可以攝落去嘅人。

所以返去開頭嗰條問題，如果占士、古斯圖同帕拉斯查真係只能留兩個，我仍然會選擇占士同帕拉斯查。前者代表最高即戰力，後者就有最難複製嘅爆破上限；古斯圖確實係最合理套現嗰個。

但現實並無規定車路士一定要三揀二。除非收到足以反映一個英超正選級、多位置兼仍然後生球員價值嘅報價，否則單純因為佢「有價好賣」就主動清走，實際上只係用陣容厚度換取一筆方便入帳嘅收入。

占士同帕拉斯查各自有一張度身訂造嘅專屬座位，古斯圖就似一張無固定位置嘅摺櫈。平時睇落最阻掟，但真係有人突然無櫈坐，偏偏又係全屋最方便拎出嚟救命嗰張。嗯，大概係咁。

【數據方法論備註】本文使用FotMob 25/26球季聯賽每90分鐘數據。占士上陣1,961分鐘、古斯圖2,267分鐘、帕拉斯查3,084分鐘。雷達圖百分位反映球員喺各自聯賽及位置比較組內嘅相對排名；占士及古斯圖部分時間並非出任傳統右閘，帕拉斯查嘅數據則來自意甲，因此只用作比較三人實際角色，唔代表直接能力評分。