【季前分析】四個中場有唔止四種踢法　巴高問點解唔可以我全都要

安素換返嚟嘅，係多半個攻中

同之前一樣，雷達圖比較嘅唔係能力值，而係球員平時將工作量放咗喺邊。安素同軒達臣採用25/26英超每90分鐘數據；巴高用25/26法甲版本；拉維亞近幾季打字多過踢波，只好一路撳「上一季」，撳到22/23修咸頓嗰個健康版本。四條線適合比較角色，唔代表跨球季、跨聯賽直接定輸贏。

安素每90分鐘有0.28非十二碼xG、0.21預期助攻、50.61次成功傳球同2.74次成功長傳。佢唔只係後場派牌，而係會一路參與到攻勢最後一段，既可以轉邊、送直線，亦會自己後上射門。揀佢拍卡些度，實際上係將剩低嗰個中場位，換成多半個攻中。

咁樣彭馬就唔使包辦所有創造。彭馬喺右邊Half-space攞波，安素可以由另一條線後上；前鋒拉走中堅，佢亦會直接攻入禁區。上季15個入球雖然包括5球十二碼，但即使撇除十二碼，佢嘅射門同xG產量仍然遠高過另外三個選項。

代價係卡些度要繼續做苦工。安素每90分鐘成功盤扭只有0.37次，成功率27.1%，對抗成功率亦得44.2%。佢擅長嘅係個波穩定去到中場之後，決定點樣向前；如果對手直接貼身、封鎖轉身空間，負責接走第一腳同處理攻守轉換嘅，多數又係卡些度。

所以安素仍然係最合理嘅正選答案，但唔係因為佢最平衡。啱啱相反，揀佢就係接受中場無咁平衡，將卡些度當成保險，換取更高嘅進攻上限。呢個亦係曼城嗰個男人想要佢嘅原因。

拉維亞同軒達臣，一個轉身解壓，一個直接飛

如果安素負責將個波送去危險位置，拉維亞同軒達臣處理嘅就係更前一步：當對手壓到埋身，中場點樣離開現場。

健康版本嘅拉維亞，答案係自己帶個波走。22/23球季，佢每90分鐘成功盤扭1.13次，成功率68.3%，對抗成功率亦有55.9%。佢可以背住對手接波，靠轉身、護球同短距離盤帶逃離第一重壓迫，卡些度亦可以放心走前一步掃蕩。

但拉維亞將球隊帶離現場之後，未必識得帶大家去目的地。嗰季每90分鐘預期助攻只有0.02、創造機會0.65次，禁區內觸球更加得0.08次。揀佢，車路士會比較容易由後場運出個波；去到進攻三區，安素原本負責嘅創造同後上，就要交俾彭馬、羅渣士同墮後嘅前鋒。

軒達臣就無興趣陪對手玩轉身。佢每90分鐘成功長傳3.32次，四人之中最高；被搶斷亦只有0.28次，唔係因為佢盤扭特別好，而係對手未埋身，個波已經俾佢一腳送走。

不過「直接」唔等於「穩陣」。之前球探報告已經講過，佢整體傳球成功率只有77.9%，長傳成功率亦得37.4%。軒達臣唔係保證每腳送到，而係願意提早轉邊、放入身後或者送去翼位，跳過中場最塞嗰段。對手高壓、車路士想加快節奏，或者領先後唔想再喺自己半場猜到球迷血壓上升，呢件工具就有用。

所以兩個人都唔係安素嘅平價代用品。揀拉維亞，係確保球隊行得過第一重壓迫；揀軒達臣，係索性唔行，一腳飛過去。兩種方法都可以減輕卡些度嘅有球負擔，但同樣要犧牲安素喺前場提供嘅威脅。

巴高唔爭張櫈，佢由左邊搬入嚟

最初分配人選時，我有諗過將巴高擺落左閘篇。佢大部分時間由左路出發，史堡亦試過當佢進攻型左閘用，放埋查華利亞、帕利斯查同哈圖旁邊，表面上合情合理。

但將佢當成普通左閘比較，反而會問錯問題。其他左閘主要留喺外線推進、拉闊或者保護左中堅；巴高最特別嘅地方，就係攞到左閘位之後未必肯留喺左閘位。佢會移入中路接波，令雙中場突然多一個人，所以最後都係將佢塞返入今篇。

Heatmap已經睇得出佢唔係一般左閘，數據亦一樣。每90分鐘55.58次成功傳球、0.27預期助攻、2.74次成功長傳，再加1.00次成功盤扭同57.4%對抗成功率，反映佢有能力喺中路較塞嘅位置接波，而唔係只沿邊線上落。

最重要係，巴高唔一定要同另外三個爭位。四後衛之下，佢可以由左閘移入卡些度旁邊，讓安素自由向前；配拉維亞，三個人可以輪流接波走出壓迫；配軒達臣，就由巴高提供短線接應，軒達臣負責提早轉邊。名單上仍然只係雙中場，有球嗰陣卻可以偷偷變成三個。

當然，數學無免費午餐。巴高一入中路，左邊闊度就要有人補。羅渣士本身又鍾意內收，兩個人同時走入去，左路隨時變成對手最愛嘅西隧。沙比要嘛叫羅渣士留邊耐少少，要嘛安排左中堅拉出去，亦可以喺三中堅之下，俾巴高由翼衛位置開始再按攻勢移動。

佢嘅數據混合左閘同中場時間，法甲環境亦唔可以直接搬入英超；季前又遲歸隊，暫時未有足夠實戰證明沙比會照以上方法使用。巴高代表嘅係一個結構選項，唔係已經測試完成嘅零件。

但呢個選項已經足夠令佢同另外三個人分開。安素、拉維亞同軒達臣回答緊「邊個坐卡些度隔籬張櫈」；巴高就行入嚟問：「點解唔可以由左邊加多一張？」

總結：季前分析，正式收爐

作為季前分析最後一篇，唔再將內文濃縮多次扮總結。

由右翼開始，中鋒同右閘都係幾個人揀一個；去到中堅，就要諗究竟砌一對定三個；再去到左閘同中場，問題已經唔係邊個最強，而係要因應其他位置，決定需要咩能力、個人又應該由邊度出現。

成個系列由一位巴打嘅提問開始，寫到最後，至少解答到我自己作為小小9upper嘅好奇心。球季即將開始，相信沙比對班球員嘅了解，點都會比我呢個坐喺井底、拎住片面數據畫雷達圖嘅青蛙完整得多。

希望睇到呢度嘅巴打都算滿意，下季有機會再寫過。

咩話？攻中同龍門篇去咗邊？

今日記者會提問環節已經結束，下年請早。

【數據方法論備註】本文使用FotMob聯賽每90分鐘數據。安素採用25/26英超3,121分鐘數據；軒達臣採用25/26英超1,922分鐘數據；巴高採用25/26法甲2,170分鐘數據，當中混合左閘及中場角色；拉維亞近季上陣樣本不足，改用22/23英超修咸頓2,230分鐘數據。百分位只反映球員喺各自球季、聯賽及比較組內嘅相對排名，用作觀察角色形狀，唔代表跨球季、跨聯賽直接能力評分。