【車迷觀點】大馬受傷Panda仔提早接棒 新手村未練完就要打大魔王?

睇住大馬暈咗瞓喺地下,再由擔架抬走,嗰刻真係無乜心情諗其他嘢。好彩之後傳嚟嘅消息總算令人鬆返口氣,手術順利完成,人亦已經返屋企休養,不過因為下顎受傷,大馬可能要休養45日~60日左右。至於車仔個龍門,就要交俾Panda仔頂住先。
Panda仔,姐係彭達斯,Penders,我估無乜人唔知……應該。
五月寫佢嗰陣,我仲估呢個後生仔返嚟之後,大概踢下盃賽、坐下後備,慢慢等機會。結果五個月後,佢喺愛華頓突然被推上場,幫手守住今季第一場英超零封,跟住仲可能要連續擔正一個幾兩個月。
等咗成年,終於可以認真睇Panda仔守車仔個龍門,作為一路有跟佢嘅車迷,當然期待。只係打開賽程表望一眼,我又有少少鄧佢陰公………
新手村打咗兩隻怪,就要去打大魔王…
如果車路士係Dragon Quest,Panda仔今季嘅流程大概係:喺新手村附近打咗盧頓同列斯聯兩隻怪,返旅館休息,突然有人衝入嚟話主力勇者重傷,叫佢即刻執裝出發。
「去邊?」
「打熱刺、利物浦同曼聯。」
屌,說好嘅練功區呢?
10月24日主場對熱刺,28日聯賽盃作客利物浦,31日再返史丹福橋對曼聯。八日三場,全部都有足夠話題同壓力。如果大馬真係要休養接近兩個月,12月主場對利物浦、作客曼城,亦可能要由Panda仔把關。呢張賽程表,真係好難令人安心練級。
當然,Panda仔自己都唔係拎住木劍第一次出村。上季喺史堡,聯賽、法國盃、歐協聯都踢過,亦經歷過球隊整體踢得差,要靠佢喺後面頂住嘅日子。今季兩場聯賽盃,至少亦俾佢同車仔防線合作過。
但原本隔一段時間踢場盃賽,踢完可以返去操練,慢慢修正問題;依家可能星期六先交完學費,星期三又要再上場。連續比賽可以幫佢建立節奏同默契,亦會令對手更快睇清佢嘅習慣,專登搵位招呼。
呢段時間最考佢嘅,可能就係犯完錯之後,下一球仲敢唔敢照樣處理。
兩米高係本錢,出迎時間仲要練
對愛華頓嗰廿幾分鐘,已經俾咗少少提示大家。
最搶眼嗰下,肯定係佢衝到禁區邊附近,一拳打走傳中。球會戰報都有特別提到呢次處理,作為臨時上場嘅第一個大動作,的確夠晒醒神。
不過我自己睇,佢嗰下其實慢咗半拍。
個波已經落緊,對手亦衝緊埋嚟,佢最後靠住身高同伸手範圍,勉強搶先打走。如果早少少起步,成件事可以舒服好多;依家就變成門將同對手爭邊個先掂到波,睇到我都有少少縮……嗯,縮咩就交俾大家自行想像。好彩,佢夠高手又長,今次壓贏咗。
呢下可以同時睇到佢嘅本錢,同需要改善嘅地方。佢肯離開龍門,主動處理本來可能落到前鋒頭上嘅傳中,呢個選擇有價值;但出迎距離愈遠,一旦判斷錯或者慢咗,後面留低嘅空間就愈大。身高可以幫佢補返少少時間,之後面對更快嘅走位同更準嘅傳送,就要計得再精細啲。
另一下接高波,亦值得連埋成個過程睇。佢起跳接球時遇到對手爭頂,未能一次過接實,個波甩咗出嚟,但落地之後自己再抱返實。接球嗰下當然未夠穩,補救亦算及時。對手有埋身爭,身體接觸會影響動作,呢啲正正係佢之後要反覆應付嘅場面。
所以今場過後我會有少少保留,但唔係悲觀。突然被推上場,佢仍然肯行出嚟處理高波,身體條件亦確實幫到手。接下來要練嘅,係幾時出、用咩方法處理,以及有對手撞埋嚟嗰陣,動作仲可唔可以保持穩定。
兩米高點都嚇得吓人,就睇下點應付英超班前鋒姐。
第四中堅返嚟,後面可唔可以多條出路?
五月介紹Panda仔,我用過「第四中堅」嚟形容佢。今次接手,佢腳下嗰份本錢,亦係我期待嘅地方。
上季喺史堡,佢已經習慣接回傳、同中堅互傳,等對手壓上再搵出口。Opta喺去年10月嘅分析提過,當時佢每90分鐘完成35次成功傳送,係同期法甲門將最多。呢個數字多少反映,佢喺球隊組織入面有相當重嘅參與,隊友亦願意將個波交返俾佢重新處理。
呢種能力,對而家車仔幾有用。之前幾場領先之後,一受壓就愈退愈深,搶返個波又送返出去,前面班人跑完一輪,轉頭又要返嚟守。如果龍門可以多接一腳,等中堅拉開、中場重新搵位,球隊就多一次機會將個波有組織咁送出去。
但呢件事要成條防線一齊做。你回傳俾佢之後,自己企定定望住佢,前面兩個接應點又全部俾人封死,咁佢腳法再好都只會變成一個比較識傳波嘅受害者。
沙比要安排好邊個落嚟接應、邊個拉走迫搶,以及真係封晒嗰陣,前面有冇人可以接長波。Panda仔自己亦要識揀,幾時值得等多半秒,幾時應該早啲送走。上季佢對雷恩就試過向中路出球失誤,令對手先開紀錄,腳下有技術,始終都要配合判斷。
勇者出發,隊友記得跟埋
講到底,我係想睇Panda仔踢波嘅。跟咗佢成年,由史堡一路睇到返車仔,總會想知自己期待咗咁耐嘅後生仔,真正企喺史丹福橋個龍門前面,會踢成點。
只係呢次機會嚟得令人有啲矛盾。大馬受傷,無人想見到;Panda仔終於可以連續上場,又的確令人心郁。
之後佢可能會神救,亦可能有啲處理睇到我想屌出聲。屌還屌,我希望自己記得五月點樣期待佢,唔好去到十月,一球波就將成年嘅觀察推翻晒。
至於場上嗰班隊友,麻煩都幫幫手。呢位新勇者擺明唔係肉盾系角色,佢已經執好裝出發,唔好打開隊伍名單,先發現你要推個無防嘅勇者上前線受死。
