【死因研究】曼聯 1：1 熱刺　一個自爆一個臨天光瀨尿

案情重組：三分轉過兩次手，最後無人拎走

上半場熱刺明顯佔優，射門七比一，曼聯嗰唯一一次仲要等到34分鐘先出現。不過熱刺幾次機會都無把握，半場仍然0：0，曼聯就帶住主場球迷嘅噓聲入更衣室。

換邊後曼聯逐漸入返局，59分鐘再一口氣換入巴利巴、達洛治同舒克斯。到73分鐘，古亞喺左邊禁區突破後傳俾安保姆，後者背門接球、轉身射入，曼聯終於領先。五分鐘後，熱刺後備入場嘅賓坦古亞同梳爾打交，前者疑似使用施丹絕招用頭撞人，被直接紅牌趕出場。（嗯………）

領先一球、仲多打一個，曼聯似乎已經三分落袋。偏偏補時第二分鐘，東拿利傳中，蘇蘭基同馬天尼斯拉扯到跌低，前者仍然頂到個波入網。1：1，熱刺執返一分，曼聯就臨天光瀨尿……

死因一：熱刺不停出手但拮唔中

熱刺上半場踢得有板有眼，左路配合不停考驗約羅，前場迫搶亦令曼聯出球甩轆。曼聯忙住補位，前面幾個又接唔到波，半場得一次射門，唔係無原因。

最值得睇嘅係熱刺左路。加拉加名義上企喺蘇蘭基後面，但佢會移去左邊，同烏杜治交換位置，沙維奧就可以收窄、靠近前鋒，亦可以再跑返出去接波。對約羅嚟講，問題唔係面前一隻翼快唔快，而係幾個人輪流上佢：跟出去，中間可能漏；留喺原位，對方又可以喺外面配合。呢種情況要靠中場同翼鋒一齊交人、封路，唔係叫個右閘自己一打三就算。

21分鐘嗰次就幾清楚。東拿利將球送俾沙維奧，後者同烏杜治做配合，再將球送入中路，古度斯喺十二碼點附近無人看管下起腳，結果射斜。熱刺唔係傳咗十幾腳、最後求其遠射當完成任務，而係真係有意識地將曼聯防線拉開，再搵到中間可以射門嘅人。

另一條路就係迫曼聯後場出錯。開波三分鐘，拉文斯接麥佳亞回傳後想搵明奈，貝治華即刻爭走個波，蘇蘭基近門起腳，拉文斯再自己救返。門將嗰腳傳波當然有責任，但熱刺有人壓上、有人準備接手射門，先可以將一次出球失誤變成埋門機會。

所以，上半場熱刺0.96 xG，曼聯得0.05，唔係單純好彩。熱刺有方法搶返個波，亦有方法由兩邊攻入去；曼聯就連將個波穩定送到前場都成問題。唯一一次射門，係擋走熱刺攻勢後，由安保姆帶起反擊，再交俾阿麥迪亞路起腳。

但熱刺最撚熱刺嘅地方，就係做咗咁多嘢，仍然得個桔。

兩次重大機會全部無入，固然有拉文斯救波嘅功勞，亦唔可以抹走約羅幾次關鍵攔截。曼聯防線當時係狼狽，但未至於完全任人魚肉；熱刺自己唔爭氣，偏偏就差嗰腳。尤其古度斯嗰次，前面嘅配合已經幫佢清咗條路，最後仍然無射中龍門。

人已經瞓低，刀都遞到手，偏偏自己發雞盲點拮都唔中。咁就唔好怪對方仲有機會坐返起身。

死因二：卡域克有見到問題，但又係差少少

最後贏唔到當然可惜，但卡域克下半場嘅調整確實幫曼聯搶返主導權，呢點值得讚。般奴開始較多喺前場接波，古亞亦有機會帶波攻入禁區。55分鐘古亞落底回傳，泰利文斯射入，雖然個波已經出界、入球唔算，但曼聯已經開始將攻勢推到熱刺門前。

59分鐘嗰次三換，再補返右路支援、前場接應同中場覆蓋，幾個換人都有實際作用。

達洛治換走約羅，幫右路增加進攻支援。約羅上半場幾次攔截都好重要，曼聯能夠守住0：0，佢有功勞；去到下半場要爭取入球，達洛治嘅推進同傳中就比約羅更好。入場後佢好快就由右邊切入，再用左腳傳中搵般奴，31分鐘內創造三次機會，幫曼聯多開咗一條進攻路線。

舒克斯就提供前場接應，俾般奴多一個傳球目標。62分鐘般奴喺禁區附近挑傳，舒克斯走到小禁區左邊接波起腳，被雲希基擋走。嗰次配合就證明，曼聯終於有人接應到般奴向前嘅傳送，再喺門前完成射門。上半場安保姆同阿麥迪亞路接波有限，前後場接唔上，舒克斯入場就幫手駁返呢一段。

巴利巴則幫中場增加覆蓋同處理球嘅能力。71分鐘加拉加喺右邊禁區將球送返中路，巴利巴同明奈一齊處理咗個威脅；尾段佢又喺後場將球送到前面，安保姆利用速度追到防線身後，再逼堅斯基救波。佢嘅活動範圍同向前輸送，令曼聯有更多機會由守轉攻。考慮到佢傷後今場先首次上陣，我估卡域克安排佢踢最後半個鐘，亦有球員狀態上嘅考量。

曼聯嘅攻勢逐漸接得上，古亞同安保姆73分鐘嗰次配合終於換到入球。古亞突破後搵到前鋒，安保姆亦用高質素嘅接球同轉身完成射門，令熱刺為此前嘅浪費付出代價。

問題係，曼聯進攻改善咗，防守端仍然不停漏水。

換邊後50分鐘，東拿利直線搵到沙維奧，後者落底將球送到門前，要梳爾及時解圍；下一分鐘沙維奧再傳中，蘇蘭基搶到位置但射高。三換之後，曼聯亦試過連續清唔走個波，沙維奧喺小禁區附近起腳，要明奈伸腳封堵。熱刺仍然搵到方法攻入去，曼聯就繼續靠最後嗰下攔截頂住。

計埋熱刺少打一人嗰段，下半場曼聯射門十一比五，兩隊xG仍然係0.75對0.66。曼聯攻勢數量增加，但對方較少嘅幾次攻勢仍然有威脅，場波始終未去到可以放心收埋嘅程度。

卡域克有見到問題，亦用換人改善咗前場接應同推進。但曼聯要贏波，仲需要減少對手攻入危險位置嘅次數。前面終於入到一球，後面仍然要靠守將逐次拆彈，領先之後嗰段時間，自然繼續令人提心吊膽。

死因三：一個自爆，一個臨天光瀨尿

73分鐘失波，熱刺仲有時間追。迪些比隨即換入麥迪臣同雲迪芬，想再搵辦法打開局面，賓坦古亞就喺五分鐘後幫佢將難度較到Hell Mode。

賓坦古亞同梳爾衝突，俾對方推跌後再走埋去，用頭撞向對方，直接紅牌。梳爾嗰下推人亦有份挑起衝突，最後領咗黃牌；賓坦古亞作為有經驗嘅球員，應該知道自己再加嗰一下會發生咩事。後備入場十二分鐘，波都未掂到幾多下，就申請返更衣室沖涼。

熱刺此前浪費機會、下半場失去主動權，當然本身已經有問題。但去到落後一球、需要追分嗰刻，賓坦古亞親手削弱咗球隊最後反撲嘅條件，呢條數就走唔甩。

迪些比賽後話，紅牌之後球隊反而踢出更多勇氣同團結。睇到隊友出事，其他人一齊頂上，值得肯定；不過聽落都幾熱刺，要搞到落後兼打少個，先終於激活團隊精神。呢個Buff嘅發動條件，未免貴咗少少。

89分鐘，迪些比再用馬迪奧斯費南迪斯換走辛尼斯，撤走一個中堅，加多個中場搏最後一段。熱刺已經無乜好保留，繼續向前爭取，曼聯就要處理好呢個對自己有利嘅局面。

而曼聯確實有機會再入。巴利巴由後場將個波送出，安保姆跑到辛尼斯身後起腳，堅斯基救出。嗰球入埋，大家都可以收工；救咗出嚟，曼聯仍然要守好餘下時間。

偏偏補時2分鐘，東拿利送出傳中，蘇蘭基同馬天尼斯喺禁區內互相拉扯，兩個人轉住跌低，蘇蘭基仍然扭到個頭，將個波頂向遠柱入網。

蘇蘭基嗰下值得讚。失去平衡仲頂到個波，而且落點夠刁鑽，拉文斯要救並唔容易。馬天尼斯就要問返自己：貼身糾纏咗咁耐，最後有無真正阻止對方處理個波？身體接觸做到足，最重要嗰下頭槌，偏偏仍然俾蘇蘭基完成。

曼聯領先兼多打一人，仍然容許熱刺用一次傳中搵到中鋒完成攻門，之前爭取返嚟嘅優勢就咁無晒。卡域克下半場修正咗唔少嘢，最後呢一下失守，照樣令所有人返到原點。

熱刺自爆完，隊友幫手執返一分；曼聯睇住對方自爆，以為終於可以安樂收工，結果自己臨天光瀨尿。

結尾：仲未開始忙，已經少少甩碌

作為車迷，呢場當然睇得幾開心，花生都唔使自己買，兩隊輪流餵。不過曼聯接落嚟先真正進入繁忙期，連續作客馬體會、列斯同科木，月底仲要嚟搵車仔。比賽一密，恢復同調整嘅時間都會縮短，今場已經要踢到一半先補鑊，之後仲有幾多餘力俾卡域克慢慢執？

熱刺今場就至少踢出咗一啲可以繼續用嘅配合，少打一人後亦肯追到最後。但埋門把握同紀律一日唔改善，迪些比就仲要繼續喺賽後解釋，點解球隊明明有啲嘢做得好，最後又贏唔到。

曼聯六場僅得六分，創1986/87球季以來最差聯賽開局；熱刺同樣未有聯賽勝仗，六場只得三分，仍然身處降班區。驗完兩邊，原來大家都無乜資格笑對方。

嗯，大家一樣咁差，打和啦SUPER～