【球探報告】山齊士派膠派出世盃門將　馬天尼斯真係車仔終極升級？

大馬勁一圈，但唔係無死角

先唔逐粒數字拆，望完整張雷達圖，大馬相對山齊士嘅升級方向其實幾清楚。

黃色代表大馬，藍色代表山齊士。八項指標之中，大馬喺撲救率、阻止失球、高空接球、成功傳球量、傳球成功率同長傳成功率都佔優。換句話講，車路士唔係單純換入一個名氣更大、識救十二碼嘅世界冠軍，而係由撲救、禁區控制去到後場傳送，幾項日常工作都有實際提升。

山齊士主要只係喺出迎解圍同成功長傳數量輕微領先。呢個形狀亦提醒大家，大馬唔係阿根廷版紐亞，唔會突然將防守範圍推前十碼；佢嘅長傳成功率更高，但出球亦唔係一味大腳向前。真正拉開差距嘅，係質素而唔係數量。

不過雷達圖無放入一項幾搶眼嘅數字：上季大馬有3次Error Led to Goal，山齊士反而只有1次。

如果淨係睇呢格，咁車路士唔止唔應該換人，甚至應該考慮即刻同山齊士續約，畢竟茶記阿叔都識講：喂大哥呀，大馬都3次啦，山齊士先得1次，後者勁好多。

但問題係Error Led to Goal嘅定義窄得可憐，通常只有球員明確犯錯，而且直接導致入波先會被記錄。應救嘅波救唔到、將波撲返落危險區、出迎時判斷錯誤，甚至隊友及時補鑊，全部未必會計落去。

所以3比1可以證明大馬上季確實派過三次致命膠，但唔足以證明山齊士更加穩定。相反，將Daily Work全部攤開，大馬大部分指標都勁少少。佢唔係一個零失誤門將，只係除咗間中派膠之外，能夠為球隊做得更多。

救多兩球、接多十個波，仲唔使犧牲Build-up

整體睇完，逐項拆落去，大馬最直接嘅升級當然係撲救。

上季英超，大馬撲救率70.9%，山齊士就係67.6%；Goals Prevented分別係+3.52同+1.70。呢項數據會根據門將面對射正嘅位置同質素，估算佢比正常情況多救或者少救幾多球。簡單講，大馬上季比預期少失約3.5球，山齊士就少失約1.7球。

換算成每90分鐘，兩人相差約0.06球。如果延伸至完整38場，大馬理論上可以額外阻止約2.3個失球。聽落唔係由超一升級上超二，但爭標本來就係鬥呢啲細節位。可能係兩場和波變贏波，亦可能係領先緊嘅比賽唔使突然進入Hard Mode。

另一項更加實用嘅升級，就係高空控制。大馬上季每90分鐘成功接實1.52次高波，山齊士係1.24次。以完整球季計算，差距大約係11次。

11次唔算多，但每一次接實，都代表中堅唔使再爭第二點、對手無得繼續圍住禁區，球隊亦可以即刻重新組織。尤其而家英超內彎角球、手榴彈同Darkart越嚟越普遍，高空控制可能比多幾次靚撲更加實際。山齊士本身已經屬於英超入面勁果班，大馬就再由「幾好」推高到頂級水平。

最意外嘅反而係Build-up。本身我哋知道山齊士最大嘅優點係傳波，但大馬上季傳球成功率73.7%，山齊士只有66.7%；長傳成功率亦係36.0%對32.1%。而且大馬每90分鐘成功長傳5.56次，山齊士係5.89次，數量幾乎一樣。即係大馬唔係靠少踢長波刷高成功率，而係相近出球量之下，處理得更加準確。

唯一無升級嘅係出迎解圍，山齊士每90分鐘0.68次，大馬就係0.63次。大馬唔係阿根廷版紐亞，沙比將防線推高之後，身後空間仍然要靠整體結構處理。

所以，由山齊士換成大馬，車路士得到嘅唔只係「撲救勁啲」。禁區控制同傳送質素同樣提升，而且唔需要用Build-up作為交換條件；唯一無被解決嘅，係高位防線本身要承受嘅風險。

解決一個變數，代價係Panda仔………？

問題去到呢度，已經唔再係大馬值唔值得取代山齊士，而係車路士願意用幾大代價，購買呢份即食戰力。

表面上，呢單交易平得有少少離譜。維拉已經用接近£30m簽入鈴木彩艷，大馬亦主動表達想接受新挑戰，據報轉會費可能只需約£8.6m。用不足千萬鎊買一個上季仍然排英超前列、啱啱贏完歐霸兼踢入世界盃決賽嘅門將，齋睇轉會費幾乎無得輸。

但平買唔代表平養。大馬現時據報周薪約£150,000，山齊士就約£60,000。假設車路士沿用相近人工簽三年，單計固定薪金已經約£23.4m；連同轉會費，成本超過£32m，仲未計簽字費、獎金同經理人佣金。

更加需要檢查嘅係傷勢。大馬五月歐霸決賽熱身期間右手無名指骨折，當時拒絕接受手術，再帶傷踢完整個世界盃。佢七月仍然表示手指每日都有痛楚。世界盃決賽嗰場證明咗受傷版本仍然可以交出極高上限，但短期爆Seed唔代表可以無痛踢足成季。簽約之前，醫療報告點寫就更加重要。

最後就係Panda仔。車路士當初買入彭達斯，本來就係將佢視為未來一號門將；經過史特拉斯堡一季正選洗禮，今季理應開始接近正式競爭。如果大馬簽兩至三年，山齊士又搵唔到方法清走，Panda仔就會被壓成無乜機會上陣嘅三號門將，最理想都只可以繼續外借，或者長期坐後備等待機會。

某程度上，呢單交易亦代表BlueCo開始推翻自己之前幾年嘅玩法。由以前每個位置都想買年輕資產、等升值、等養成，變成接受高薪老將可以即時提高下限。當然，呢個未必代表Project失敗，亦可能只係球會終於承認，當成隊波開始進入爭標階段，唔係每一個位置都可以繼續慢慢等。

真正需要決定嘅，唔係£8.6m抵唔抵，而係大馬應該成為兩年過渡橋樑，定係另一份會阻塞Panda仔成長路線嘅三年合約。

總結：有時推翻自己，先代表真係想贏

老老竇竇，如果大馬最後真係加盟，我係開心多過擔心。過去幾年車仔已經用青春、潛力同未來交咗唔少學費，去到今日，間中買一個………(嗯，雖然係第三個) 唔需要再等佢升Level嘅球員，唔算背叛Project。

Panda仔當然無辜，本來以為捱完外借就接近上位，突然又有個世界冠軍排喺前面。但所謂未來一號門將，本來就唔應該靠球會預留空櫈，而係有一日親手搶走件正選衫。

反而最有趣嘅係，BlueCo似乎終於開始由「建立一支將來可以爭標嘅球隊」，慢慢變成「為今日爭標補最後幾塊零件」。策略有改變唔一定係壞事，最怕嘅從來唔係推翻自己，而係明知有問題，為咗證明以前無錯而繼續死撐。

如果富咸一場無失分嘅混亂勝仗，最後真係換來一個更可靠嘅門將，咁富咸都算死得其所。山齊士開季第一場雖然派膠，至少可能陰差陽錯交出加盟車路士以來最重要嘅一次Assist。

多謝你呀山齊士，希望你可以盡快搵到愛你嘅球會啦。(好似係)