【外借報告】26/27點樣追蹤九名外借兵　回歸嘅課金系列第零篇(免費)

三張仲未知咩料嘅課金卡

九個觀察對象入面，先由最唔似傳統「外借新星」嘅三個講起。

梅迪歷、艾素高同薩達帕耶夫都唔係葛咸土生土長，而係車路士真金白銀買返嚟、到今日仍然未完全兌現嘅投資。只不過，梅迪歷係等待修復嘅舊卡，艾素高仲未成功啟動，薩達帕耶夫就啱啱開包，三張課金卡處於完全唔同階段。

梅迪歷：第一關唔係翻身，係重新做返球員

我都寫過幾次，今次就長話短說，梅迪歷借去熱刺，應該係九宗外借入面最令人百感交集嗰單。

由2024年12月開始離開正式比賽同球隊操練，去到今年夏天先重新加入Pre-season，無論之前天份有幾高，接近二十個月嘅空白都唔可能當無事發生。更何況佢加盟車路士之後73次上陣只入十球，球迷對佢僅餘嘅印象，仍然係速度快到畫面追唔切，但最後一下就成日連自己都追唔切。

偏偏佢今次去嘅係熱刺，教練亦係當年喺薩克達真正用得掂佢嘅迪沙比。感情上，睇住一件車路士高價貨去隔籬鄰舍接受原廠維修，點諗都有少少不爽；但純粹由足球角度出發，呢個可能已經係梅迪歷最合理，甚至最後一次有條件證明自己嘅Reboot。

所以今季追梅迪歷，我唔會見佢一場後備入波就宣佈王者歸來，亦唔會因為頭幾場腳軟就話佢無得救。第一步只係睇佢可唔可以重新承受穩定比賽節奏，搶到持續上陣時間；之後先再睇迪沙比會將佢放喺邊個位置、點樣製造一對一，同埋佢最令人燥底嘅最後決定，到底有無隨年齡一齊成長。

今季試題：離開正式比賽接近二十個月後，梅迪歷仲可唔可以由一件昂貴資產，重新變成一個可靠嘅英超球員？

艾素高：首先證明自己可以連續踢波

相比梅迪歷，艾素高嘅價錢牌無咁搶眼，但佢上季留低嘅答案其實仲少。

2025年加盟之後，大家真正見過佢嘅一隊樣本，主要就係世冠盃嗰三場。之後個球季受傷患打斷，去到季尾，我哋仍然只係大概知道佢幾撞得、覆蓋範圍大、有做防守中場嘅原材料，但未知道呢啲原材料能否砌成一個車路士用得着嘅中場。

今季去史堡，第一關唔應該定得太進取。唔係要佢立即變成新卡些度，而係先要保持健康、取得穩定正選，再證明自己除咗識搶之外，喺法甲受壓之下仍然交到波、轉到方向，同埋有能力將一次成功攔截接駁成球隊下一次進攻。

因此月報追佢，出場時間同正選地位會比入球助攻重要；有足夠數據同片段，先再睇對抗、防守覆蓋、受壓用波同向前推進。踢得少未必代表踢得差，但如果連續幾個月都未能建立角色，本身已經係一個答案。

今季試題：艾素高可唔可以先擺脫傷患，成為一個每星期都可信任嘅法甲正選防中？

薩達帕耶夫：哈薩克天才正式落地測試

薩達帕耶夫就係三個人入面最新、亦最令人有幻想空間嗰張課金卡。

佢喺哈薩克已經唔係普通青年軍屈機，而係踢過一隊同歐聯，亦已經做咗大國腳。今夏跟車路士踢Pre-season亦交到少少見面禮。不過，由哈薩克直接跳入英冠，先係真正嘅壓力測試。以前早熟、快人一步、埋門冷靜，到面對更高強度、更密集身體接觸同更少思考時間時，仲可以保留到幾多？

所以睇佢喺般尼踢成點，唔會只係每月睇佢有幾多入球。仲要睇佢究竟踢中鋒、翼鋒定輔鋒，係固定正選、輪換奇兵，定垃圾時間攝下位；之後先睇佢可唔可以持續入禁區、製造射門，同成年後衛對抗之後仍然完成下一個動作。

十八歲第一季登陸英格蘭，就算無立即大爆發都唔等於失敗。但如果去到季尾，大家仍然只可以用「好有天份」四個字形容佢，而講唔出佢已經將邊一種能力搬到英冠，咁今次外借就只係將問號由哈薩克空運到英國。

今季試題：薩達帕耶夫喺低容錯率嘅英冠，能否將早熟天份轉化成真正嘅成年賽事威脅？

三個人嘅起跑線完全唔同，所以亦唔會用同一把尺。梅迪歷要修復，艾素高要建立，薩仔就要完成第一次落地測試。到每個月再打開呢三張課金卡，我哋只係要望下邊張最有可能變做SSR，僅此而已。

三個無得慢慢適應嘅爭標實習生

第二組三個人，目的地睇落可能係成份名單最靚。大力（為免大家唔知邊個，我標埋英文：Jesse Derry）去士砵亭，米希卡同艾文蘭路就孖住加盟些路迪，兩間球會都有歐洲賽踢（車仔反而無，笑死），亦同樣以爭冠做基本目標。

不過，名牌公司實習經驗寫落CV當然好睇，真正返工又係另一回事。

爭標球會唔係育成中心，無義務為咗幫車路士養人，白白送十場正選俾一個十九歲仔慢慢適應。聯賽贏波係應份，一失分就會俾人開波，教練每一次換人都要先考慮三分，而唔係倫敦某間球會嘅青訓發展計劃。

所以呢組最大問題唔係「去咗間幾勁嘅球會」，而係一年之後回望，究竟真係參與過爭標，定只係近距離睇住人哋爭標。

大力：去到士砵亭，究竟係一隊定另一隊？

大力上季由水晶宮加盟車路士之後，只用一年就由U21一路踩入一隊。除咗協助青年軍排喺Premier League 2榜首，佢亦獲得三次一隊上陣，甚至喺季尾首次英超正選，可惜未踢完上半場，就因為頭部碰撞直接被送咗去醫院。球會其後將合約延長至2032年，再直接送佢去士砵亭，睇得出對佢嘅發展仍然相當有信心。

但「外借士砵亭」呢五個字，本身其實無我哋想像中咁具體。

士砵亭除咗一隊，仲有踢葡萄牙第二級聯賽嘅B隊同U23。大力可以跟一隊操練、間中坐後備，再落B隊儲比賽時間；亦可以真正打入一隊輪換，喺聯賽、盃賽甚至歐洲賽取得機會。兩種都唔一定係壞事，但發展意義差得非常遠。

所以月報追大力，第一樣唔係睇佢入幾多球，而係先搞清楚佢今個月究竟喺邊一隊返工。一隊訓練、後備席、垃圾時間、盃賽正選同B隊主力，全部都會分開處理，唔會見到「士砵亭上陣」就當佢已經成功登陸葡超。

如果佢真係搶到一隊分鐘，下一步先係睇佢青年賽入面嘅盤扭、內切同埋門，去到成年足球仲剩返幾多。單靠有幾下靈氣唔夠，佢要令教練相信，就算場波未穩、三分未袋，換佢出場都唔會即刻出事。

今季試題：大力可唔可以由士砵亭體系內嘅發展球員，真正打入一隊輪換？

米希卡：青年軍入球王，去到大人場仲入唔入到？

如果淨係睇青年軍履歷，米希卡應該係九個人入面最有資格外借嗰個。

上季佢以隊長身份帶住車路士U21排喺Premier League 2榜首，自己十九場入十八球，最後更加當選賽事最佳球員。青年軍要證明嘅嘢，佢大致已經證明晒；繼續留喺葛咸，其實都無咩Lv可以升。

問題係，青年軍入球多同喺成年足球識入波，中間仲隔住一條幾闊嘅海。

去到些路迪，米希卡大部分時間面對嘅未必係主動壓出嚟互攻嘅對手，而係縮喺禁區附近、準備同佢玩身體對抗嘅成年中堅。以前可以靠走位、反應同埋門快半步解決嘅機會，去到蘇超可能未起到腳，個人已經俾人撞開咗。

但呢個環境亦非常適合驗貨。些路迪大部分本土賽事都會主導控球，禁區附近唔會缺少供應。只要米希卡搶到上陣時間，我哋就可以直接睇到佢最標誌性嘅入球觸覺，究竟只係青年軍限定技能，定真係可以帶上成年賽事。

除咗入球，月報亦會睇佢點樣背身接波、同中堅對抗、參與壓迫，同埋無波可射時仲可以為球隊做到啲咩。入球當然係前鋒最大本錢，但如果成場只有一次射門機會，之前八十九分鐘都好似少打一個，爭標球會未必等得起。

今季試題：米希卡可唔可以將青年軍十九場十八球嘅禁區觸覺，轉化成些路迪一隊真正用得着嘅入球能力？

艾文蘭路：周身刀，今季到底要磨利邊一把？

同米希卡一齊去些路迪嘅艾文蘭路，反而係呢組最難預先定考題嗰個。

佢喺葛咸成長期間踢過中場、中堅同左閘，車路士官方介紹佢時，亦只可以概括成防線同中場都踢得。呢種多功能對青年球員當然係優點，教練要補邊個窿都會第一時間諗起佢；但去到成年隊，周身刀亦有機會變成無一把刀足以搶走正選。

所以今次外借最先要回答嘅，唔係艾文蘭路踢得好唔好，而係些路迪究竟當佢係咩球員。

如果主要踢左閘，就要睇佢喺一隊長時間壓住對手時，能否提供闊度、向前推進，同時守好反擊留下嘅空位；如果返入中場，就要睇佢面對更快逼搶時嘅轉身、傳送同位置感；假如球隊將佢當中堅用，身體對抗同高空波自然又會變成另一份考卷。

因此追蹤艾文蘭路，位置、角色同連續正選次數會比入球助攻重要。只要些路迪逐漸固定咗佢嘅用途，就算唔係場場踢足，今次外借都已經行前一步；相反，如果成季都只係邊度缺人就攝邊度，睇落用途好多，實際上可能仍然未建立真正身份。

今季試題：艾文蘭路能否將多功能轉化成一個清晰而可信任嘅成年隊角色？

呢組三個人唔缺靚履歷，缺嘅係教練喺一場非贏不可嘅比賽入面，仍然願意將佢哋擺落場嘅信任。踢得幾多，未必足以判斷佢哋有幾好；但喺爭標球會完全搶唔到時間，就肯定唔可以扮成無事發生。

三個正式離開新手村嘅葛咸仔

最後一組，先係最傳統意義上嘅外借兵。

麥昆、禾殊同安迪維（呢個堅係要加名，怕你哋唔識佢：Genesis Antwi），三個都由葛咸一路升上嚟，亦同樣係第一次離開車路士，接受一個完整球季嘅成年足球測試。無幾千萬鎊價錢牌，目的地亦無前一組咁華麗，但其實佢哋先係我最想重開外借報告嘅原因。

青年軍入面，教練會睇你有無天份、某幾下處理有無與別不同；去到成年隊，對方只會睇你可唔可以即刻幫手。以前一次失誤係交學費，而家一次失誤可能就係失波、失分，然後下星期連後備席都無埋。

換句話講，新手教學正式完結。之前儲落嗰堆技能，今季開始要落實戰副本。

麥昆：閃電爆完人之後，究竟做到啲咩？

17歲嘅麥昆直接去英冠樸茨茅夫，應該係三個安排入面最大膽嗰個。

佢上季仲可以同時出現喺U18同U21，季尾就已經完成一隊地標戰，今夏更加跟埋一隊去Pre-season。佢最搶眼嘅武器亦唔難理解：起步快、夠直接、拎到波就敢向前爆。叫得麥昆，無返少少閃電速度都講唔過去。

但佢嘅爆破，去到英冠未必可以原封不動搬過去。成年守衛唔一定跑得快過佢，但識得提早封路、用身體攔截，甚至喺佢起步之前已經送一腳歡迎佢嚟到英冠。麥昆第一下爆唔爆得過人固然要睇，爆完之後傳中、射門同最後選擇，先真正決定佢係一件武器，定只係一段幾好睇嘅Highlight。

因此月報唔會淨係數成功盤扭。佢係正選定後備、踢左邊定右邊、每場可以將幾多次推進變成禁區威脅，同埋無波時肯唔肯回防，全部都會影響樸茨茅夫教練下場仲敢唔敢用佢。

17歲第一季踢英冠，坐下後備、撞下板完全正常。最重要係去到幾個月後，佢唔再只係靠速度令人記得，而係開始知道應該幾時爆、爆去邊，同埋爆完要做乜。

今季試題：麥昆可唔可以將青年軍嘅速度與盤扭，轉化成英冠穩定而有效嘅進攻威脅？

禾殊：個腦行得快，個人又頂唔頂得住？

禾殊得17歲，但個一隊履歷已經幾乎行快咗兩三年。

16歲就為車路士喺歐協聯地標上陣，其後再成為歐洲賽正選，上季亦踢過歐聯，今年Pre-season繼續獲得機會。佢嘅技術、視野同用波信心，早就足以令教練越級睇佢；真正未有答案嘅，係呢套技術去到成年聯賽，仲有無足夠時間同空間用得出。

所以韋根同英甲，其實係一個幾合理嘅測試場。

禾殊唔需要每星期對住英超級數嘅中場，但對手會比青年軍更直接、更硬淨，亦更加識得針對一個後生仔落腳。以前佢可以喺中場停一停、望一望再揀傳送路線，今季可能控第一腳嗰刻，身後已經有人撞到埋嚟。技術好唔好係一回事，能否喺身體接觸之前完成Scanning同決定，就係另一個Level。

月報追禾殊，重點會係佢踢咩中場角色。究竟係位置較前、專門負責最後一傳，定係要落後少少接波、帶動推進甚至幫手防守？上陣分鐘當然重要，但佢有無開始掌握比賽節奏、受壓之下仲敢唔敢要波，同埋失去球權之後會唔會變成中場缺口，先係真正嘅成年足球考題。

有時後生技術中場落到低組別，最難唔係做唔到靚嘢，而係未學識點樣喺一場好亂、好多碰撞、完全唔按劇本行嘅比賽入面繼續做自己。

今季試題：禾殊可唔可以頂住英甲嘅身體與比賽節奏，將用波天份變成一個成年中場可以長期依靠嘅能力？

安迪維：法甲唔會淨係睇佢識唔識助攻

三個人入面，安迪維年紀最大，外借級數亦跳得最高。

佢過去兩季已經係車路士U21常規成員，踢過左右兩邊閘同翼衛，亦有兩次一隊上陣。上季主要擔任右閘，向前推進、後上同傳中都係佢最容易令人留下印象嘅部分。今季直接加盟史堡踢法甲，明顯唔再係叫佢落去試下大人波，而係要睇佢可唔可以喺頂級聯賽建立位置。

不過，進攻閘喺青年賽通常比較容易搶鏡。後上一次、落底一次、交到一球靚Cut-back，已經足以剪入精華；防守時遲半步回位、遠柱漏人或者俾對手捉住身後空間，就未必有人特別記得。

去到法甲，個次序會倒轉。

安迪維有能力向前係Bonus，但首先要令教練相信，面對成年翼鋒嘅速度、身體與走位，佢守得住自己嗰邊。月報除咗會睇佢踢左定右、閘位定翼衛，亦會留意一對一防守、回追、遠柱保護，同埋球隊失去控球時佢企喺邊。唔可以因為偶爾有助攻，就將佢俾人當成雪糕筒嘅事當無發生過。

當然，守得穩亦唔代表要將佢改造成一隻唔過半場嘅閘。真正理想嘅答案，係佢適應法甲防守要求之後，仍然保留到原本嘅速度、力量同進攻參與，證明自己唔只係青年軍入面跑得勁，而係一個兩邊都幫到手嘅現代閘位。

今季試題：安迪維能否先喺法甲建立防守可信度，再將青年軍嘅進攻能力完整帶上頂級聯賽？

三個葛咸仔，三份難度完全唔同嘅畢業試。

我唔預期佢哋一季之內全部變成車路士一隊球員。只不過，當新手村大門關上之後，潛力就唔可以再永遠停留喺「聽講好勁」。今季開始，佢哋總要喺真正嘅足球世界，留低一樣可以令人記得嘅嘢。

最後，亦可能係大部分巴打嘅最後一篇外借報告

呢篇明明只係用嚟交代「今季會睇邊九個人」，結果都可以俾我寫到咁撚長。上季份外借報告寫到半路斷氣，今季第零篇已經有重蹈覆轍嘅氣勢。睇嚟問題未必淨係車路士外借部人數太多，我本人唔識收筆都要負返少少責任。

呢篇第零篇會免費公開，但由下一篇正式月報開始，就會鎖入課金會員區。講得現實啲，分分鐘大部分睇到呢度嘅巴打，同今季外借報告嘅緣份就到此為止。明明啱啱先介紹完九個人，轉個頭就同大家講下回有緣再會，個商業模式都幾有車路士風格。

不過，就算你完全無打算課金，我仍然覺得呢九個名值得記低。

唔需要為咗佢哋每星期四圍搵直播，亦唔使逐次正選後備都記低。只係間中望下佢哋有無波踢、有無開始站穩。可能一年之後，當中大部分人仍然返唔到車路士一隊；但只要有一兩個突然跑出，至少你會知道佢唔係一夜之間由石頭爆出嚟。

至於願意繼續睇落去嘅課金巴打，我今季會再試一次，幫大家將每個月真正值得知道嘅變化，整理成人類睇得明嘅文字。唔敢再講咩雄心壯志，只可以話有人肯課金出糧，幫車路士外借部返工好似都無上季咁戇鳩。

咁下一篇開始，我哋正式逐個月開卡驗貨。

無課金嘅巴打亦唔緊要。希望到日後其中一個名突然出現喺車路士一隊名單，你至少可以同身邊人講一句：

「呢條友？我上年好似見過佢個名。」