【死因研究】利物浦 0：3 114 紅牌之前利物浦做啱咗嘅嘢
星期日晚，英超利物浦主場對114……打錯，我指曼城。
Well，基本上賽後大家都針對曼城114嚟笑，我明呀，場外嗰114條係好笑，前面種落嘅因，亦可能真係改變咗今日嘅果。球隊今日有咩人腳、有幾多本錢，唔會同過去完全無關。不過，場上嗰90分鐘發生咗乜，始終係發生咗，笑完，我都想睇返場上競技嘅部份。
撇開紅牌爭議，我覺得今場幾有趣。睇住利物浦上半場踢，我唔覺得佢哋似係一支傷兵多而且最後會輸 0：3 嘅球隊；換邊之後，亦有啲攻防變化值得睇落去。偏偏大家最後記住嘅，大概都係第二張黃牌，同之後嗰三個入球。
所以今次死因研究，想先望下死者生前做過啲乜。畢竟驗屍報告寫住0：3，唔代表佢由開波嗰刻已經躺平等死。
案情重組
利物浦主場出戰，上半場雙方互無紀錄。換邊後，利物浦有一輪連續攻門，曼城亦喺紅牌前由夏蘭特得到一次入球機會。56分鐘，曼城換入杜古；62分鐘，加雲貝治侵犯杜古，領第二張黃牌被逐。當時仍然係0：0。
之後比賽急轉直下。夏蘭特65分鐘先開紀錄，杜古68分鐘再入一球，卓基喺78分鐘將比分改寫成0：3。利物浦今季聯賽首敗，前後只係用咗大約15分鐘……
死因一：限制得住，未能換成領先
利物浦上半場最值得肯定嘅，係佢哋令曼城無得舒服咁組織進攻。曼城仍然有較多控球，但個波傳嚟傳去，真正去到射門嘅次數唔多。數據記錄，曼城上半場只有三次射門，合共0.08 xG；利物浦就有五次射門、0.47 xG。喺晏菲路踢咗半場，夏蘭特連掂波都有少少困難咁。
呢個限制效果，同利物浦嘅跟人壓迫有關。利物浦會跟住曼城球員嘅移動去施壓，連中堅都可以追到好前。例如雲迪克主動離開防線、上前貼住卓基：卓基想退落嚟接波，身邊仍然有人跟住，曼城就少咗一個可以輕鬆接應再轉身嘅出口。
兩翼亦有明確對手。巴高拿跟紐尼斯，另一邊蒙路斯就留意奧拉尼。當施曼尤持球挑戰阿羅祖，蒙路斯會先望返奧拉尼有冇上嚟；到奧拉尼真係沿邊線或者入楔，佢就跟返去。呢種分工令曼城想靠閘位加入進攻時，仍然要處理身邊嘅追兵。利物浦肯跟、肯搶，曼城每次接波就多咗一層麻煩。
搶波之後點用，亦係呢套打法有趣嘅地方。換邊後47分鐘嗰次高馬斯嘅機會，就延續咗同一個思路。巴高拿原本喺較窄位置跟住紐尼斯，見到機會就上前搶走個波，再送去防線身後俾高馬斯。由盯人到搶波，再到直接威脅龍門，中間幾步接得好快。對曼城呢類想由後場組織嘅球隊，利物浦搶到一下，就有機會瓦解佢哋未及重新企好嘅防線。
單睇上半場同對手換人之前嘅部署，我會話伊拉奧拿嘅準備工作做得唔錯。只係，差咗入波去證明件事。
死因二：杜古入場係第一個分水嶺
換邊之後，曼城仍然要應付利物浦嘅壓迫。高馬斯嗰次機會之後，利物浦繼續有攻門；按射門事件計，下半場開波至紅牌之前，利物浦有七次射門、約0.93 xG，曼城就只有一次射門、約0.28 xG。利物浦喺呢段時間仍然有能力製造威脅，同大家觀感一樣，覺得利物浦有機會贏。
但同時，曼城亦開始搵到直接威脅防線嘅機會。紅牌前嗰次夏蘭特射門，就係施曼尤送波入去，夏蘭特走入空位接應，再射斜。單係呢次機會嘅xG，已經高過曼城整個上半場。利物浦原本將對手限制到幾乎無啖好食，去到呢個階段，夏蘭特終於有波餵到自己面前，只係佢自己嘔返出嚟。
56分鐘，那個男人用杜古換走尼戴耶，亦為曼城加咗一種更直接嘅推進方法。杜古攞波之後可以自己帶過對手，利物浦原本各自跟人嘅分工，就要面對一個問題：負責嗰個俾佢過咗，下一個邊個出去補？
前一節提過，蒙路斯會跟住奧拉尼，阿羅祖就要處理面前嘅翼鋒。呢個安排喺各自守得住對手時可以運作；杜古一旦過到阿羅祖，中場就要離開原本位置幫手。紅牌嗰下，正正係杜古突破阿羅祖之後，加雲貝治過嚟協防，最後犯規食第二黃。
杜古入場到對手紅牌得幾分鐘，話係佢一條友扭轉戰局就有少少過火。不過，呢個局部變化已經睇得到：曼城多咗一個可以靠個人突破迫利物浦補位嘅人。加雲貝治嗰次上前，亦反映利物浦有協防反應，只係犯規嘅代價大。至於第二黃值唔值得，嗯，留返俾大家討論。
死因三：紅牌抽走咗中場，分工未及接返
加雲貝治62分鐘領第二黃被逐，當時仍然係0：0。判罰尺度留返俾大家討論，利物浦當時好似倒瀉蘿蟹咁：因為加雲貝治紅咗，由佢補位嗰份工作，要有人即刻接手。
伊拉奧拿喺場邊重新安排，亦準備換入中場，但曼城無好似美少女戰士嘅奸角咁等你變好身先出手。紅牌後，杜古已經有一次由利物浦右路內切，再送波俾奧拉尼入楔嘅攻勢。麥亞里士打要跟住奧拉尼，蒙路斯就未收返入去幫阿羅祖。奧拉尼最後無控好個波，利物浦避過一次，但杜古已經試到嗰邊有空間。
第一個失球，同一個缺口再出現。麥亞里士打仍然要照顧奧拉尼，阿羅祖就要自己面對杜古。蒙路斯有退，但回防唔夠積極，未及時靠過去幫阿羅祖夾擊，杜古就咁帶入中間起腳。個波被擋之後落到夏蘭特面前，曼城取得領先。三分鐘後，杜古再靠個人突破同靚射將比分拉開。
數據亦記低咗呢個斷層。紅牌前利物浦有十二次射門、約1.56 xG，曼城係四次、約0.37；紅牌後，曼城有十一次射門、約1.31 xG，利物浦就只剩一次、約0.16，而且係87分鐘左右嘅直接罰球。原本仲可以搶完再攻嘅利物浦，之後連運動戰射門都無再出現。
杜古帶嚟嘅協防問題，利物浦本來仲有人可以補；加雲貝治被逐之後，伊拉奧拿要即刻重新安排。佢仍然可以收縮、補返中場，嘗試守住0：0，但曼城喺場上球員接好新分工之前就取得領先。由踢少一個，到踢少一個仲要追比分，敗局就喺呢幾分鐘急速成形。
總結：踢得幾好，下次加油
利物浦最後輸 0：3，曼城三分袋袋平安，賽後一堆人跳出嚟笑114……但我自己反而有啲想再睇伊拉奧拿帶利物浦對強隊。
今次佢準備咗一套令曼城踢得唔舒服嘅方法，球員亦執行到；對手開始拆招，利物浦本來仲有機會再接落去。作為球迷，我最想睇嘅正正係呢種你出招、我接招再反擊嘅過程，偏偏去到最有趣嗰陣就斷咗……屌。
114最後會點我唔敢講，但那個男人反應之快的確有少少料到…