【車迷觀點】英冠冠軍升上英超即刻病發　林伯特無料定高雲程度唔夠？

四場全敗，四種不同病徵

高雲成為繼2017/18球季水晶宮之後，另一支開季四連敗兼一球不入嘅英超球隊。當年法蘭迪保亞踢到第四場就被炒，有呢個比較，點睇都唔係咩吉兆。

但如果逐場拆開，高雲又未至於衰到貼地。四場同樣輸波，出事方式卻完全唔同。

首場作客阿仙奴，我會話係純粹嘅程度差距。高雲全場只有4次射門、0.20 xG，喺對方禁區更加只有3次觸球。呢啲唔係一句「前鋒腳風唔順」可以解釋，而係連個波都送唔到去足以威脅對手嘅位置。對住衛冕冠軍，英冠嗰套主動進攻未開到機，已經被人抆咗插頭。

第二場主場對侯城，情況完全唔同。高雲有68%控球，成功傳球超過500次，射門、xG同禁區觸球全部佔優。上半場更加造出兩次相當有威脅嘅頭槌，只要其中一次入網，成場波可能已經係另一個故事。

偏偏換邊之後，高雲雖然繼續攞住個波，進攻威脅卻突然斷電。下半場只得3次射門，最後更被侯城用快速攻勢一刀劏死。

而家睇完侯城作客車仔嗰場，呢個結果又未必有當初睇落咁失禮。侯城面對車仔一樣可以主動讓出球權，再靠快速轉換同後備球員嘅速度製造威脅。真正值得追究嘅唔係高雲點解會輸俾另一支升班馬，而係當對手刻意將主動權交俾佢哋，林伯套波反而唔識點樣將主導變成三分。

第三場作客曼城，林伯索性轉玩法。高雲全場只完成139次傳球，成功率得64%，數字睇落似足捱打；但佢哋同時做到12次射門、19次禁區觸球，同曼城各有3次重大機會，最終只輸0：1。

放棄同曼城鬥控球之後，高雲反而重新搵到威脅。只不過1.23 xG入面有0.62來自死球，運動戰始終未算順暢。

然後就去到白禮頓。

0：5睇落係四場入面最痴線嘅一場，但上半場其實未散。高雲頭45分鐘有10次射門，xG更加以1.00對0.98稍稍領先，Rudoni同Onyeka亦先後迫使華保根救險。佢哋有過入球機會，只係把握唔到，反而被白禮頓先開紀錄。

真正崩潰發生喺換邊之後。51分鐘防線反應慢，被Yalcouyé攻入第二球；兩分鐘後Awoniyi再因起踭直接領紅。由落後一球變成落後兩球兼打少一個，原本仲有得醫嘅病情，幾分鐘內急轉直下，最後失到五球。

所以，四場全敗係事實，但「完全無得踢」就唔係。除咗阿仙奴一戰，另外三場都曾經出現過攞分機會，只係無一次捉得住。

第一原因：英冠嘅主動權，帶唔上英超

上次寫林伯特，我其中一樣讚佢嘅，係佢學識咗用進攻解決防守問題。

高雲地利上季喺英冠攞到95分、攻入97球。佢哋靠主動控球同前場壓迫，長時間將比賽困喺對手半場。對手忙住守，自然無咁多機會反過來考驗高雲條防線。就算死球防守同轉換保護仍然有瑕疵，亦可以用更強嘅進攻產量遮住。

問題係，呢種踢法有一個非常昂貴嘅前提：你要有能力長時間掌握主動權。

去到英超，對手傳球更快、控球更穩，前鋒處理有限機會嘅能力亦高一截。高雲以前可以靠壓迫將對方困喺後場，而家一次迫唔中，對手已經可以將個波送到防線面前。原本用嚟保護自己嘅進攻失去壓制力，背後啲舊患自然逐樣走返出嚟。

四場嘅走勢，其實亦反映林伯一路向後退。對阿仙奴，原有打法完全運作唔到；對侯城，攞到控球都無法維持威脅；去到曼城同白禮頓，高雲開始減少後場猜傳，直接將個波送上前場，再靠第二點、傳中同死球搵機會。

改變之後，進攻數字的確有改善。曼城同白禮頓兩場加埋造出2.62 xG，但當中1.36來自死球，差唔多佔咗一半。

死球當然都係足球一部分，上年阿仙奴直接頭佢食糊，升班馬靠死球搶分更加無乜失禮。只係當運動戰無法持續供應機會，死球就會由其中一件武器，變成唯一一包止痛藥。食完可能頂得住一陣，個病始終無根本性地醫好。

林伯喺英冠建立嗰套體系並非垃圾，只係套系統需要球隊有能力控制比賽，先可以發揮最大效用。升上英超之後，高雲失去以前享有嘅時間、空間同容錯率，原本嘅強項亦無法再遮住弱點。

第二原因：藥有食到，但未止到屙

高雲四場加埋造出4.11 xG，最後一球都入唔到。單純將責任判落林伯身上，肯定唔公平。

領隊可以將球員送到適當位置，可以設計傳中、反擊同死球，但始終要球員自己生性，射個波過白界。侯城、曼城同白禮頓三場，高雲都有足以改變比賽嘅機會，只係前線一次又一次錯過。

不過，林伯亦唔可以拎住幾次射失，當成自己完全無責任。

對阿仙奴同侯城，高雲下半場嘅迫搶強度都有提升。尤其對侯城，PPDA由上半場7.3降至3.8，證明佢哋無縮返後面等死。問題係，迫得更加積極，換返嚟嘅只有3次下半場射門。林伯交得出第一步，但無下文。

之後佢再改用直接踢法，靠長傳、第二點同死球繞過組織問題，的確令高雲重新製造到威脅。只係每種方法都只能短暫見效，一到先失波、錯失機會或者比賽形勢轉差，成套計劃就會迅速脫軌。

白禮頓一戰嘅紅牌當然唔係林伯叫Awoniyi起踭，十人應戰後再失三球亦唔應該全部當成戰術罪證。但一隊波連續四場都無法承受逆境，問題已經超出某一名前鋒或者某一次防守失誤。

林伯有轉藥，亦唔係坐喺度等死。班底程度不足，解釋咗點解每場都咁難踢；但點樣將有限能力拼成一套穩定嘅求生方案，本身就係升班領隊要交嘅功課。

四場之後，林伯仍然未搵到一張可以止瀉嘅藥方。

結尾：未死得，不過嗰頭近

所以，返去最初嗰條問題：英冠冠軍升上英超突然死火，係林伯特問題，定係高雲程度唔夠？

依家我會將主要病因，判落程度差距。

四場比賽未足以推翻林伯喺英冠嘅進化，但已經證明，將一套成功方法練得更熟，同適應一個完全唔同嘅環境，係兩回事。

真正由英冠升上英超，考驗嘅係當你再無能力控制比賽，仲識唔識用另一種方法生存。林伯已經開始轉變，只係暫時仲未搵到一套可以維持90分鐘嘅答案。

上次寫佢，我期待呢位最熟識嘅陌生前度，有朝一日練成完全體，再返嚟完成當年未完嘅故事。

依家睇落，佢的確升咗Lv。只係一入英超地圖，先發現之前攞到嗰張，原來仲係新手村畢業證書。

張死亡證明可以收埋先。高雲需要適應，林伯需要時間。

但最麻煩嘅地方係，英超通常兩樣都唔會俾得太多。