【死因研究】候城2：0曼聯　倒地嘅原因唔係兩個死球

案情重組：兩個死球，九十分鐘無法起死回生

侯城賽前先變一招。季前大部分時間踢四後衛，今場突然改排5-4-1，以三個中堅保護禁區，再由McBurnie單箭頭同曼聯後防肉搏。

開局十五分鐘雙方尚算均勢。第17分鐘，Slater開出角球，個波落到遠柱McBurnie腳下。拉文斯擋出近門射門，但Ajayi已經喺門前等住補中，替侯城先開紀錄。

曼聯之後曾經反撲，麥保姆同泰利文斯先後起腳，但未能追平。第37分鐘，泰利文斯喺禁區右側外圍犯規。又係Slater主理，罰球直接送到Mendy頭上，後者近門頂入。侯城兩次死球、兩次落刀，曼聯半場落後0：2。

卡域克換邊後立即用拉舒福特換走杜古，第67分鐘再派錫斯高、明奈入替山度士同泰利文斯。曼聯由無正中鋒變成將錫斯高擺入禁區，尾段連麥佳亞都長時間推上前線。

但換人無改變比數。麥保姆第78分鐘接應古夏直線形成全場最靚嘅機會，仍然被Tzolakis擋出。兩名入球功臣Ajayi同Mendy就算因傷退下，侯城後備防線仍然無失位。

完場侯城守住2：0。兩個死球係最清楚嘅致命傷，而曼聯用足餘下時間，仍然搵唔到一條翻生路線。

死因一：天堂仔傳到個波，守唔住第一點

兩個死球係致命傷，但曼聯嘅防線問題唔係去到Slater開死球先突然出現。

侯城上半場贏咗67%空中對抗同59%地面對抗，由McBurnie喺前面接長傳、頂第一點，再等隊友爭第二點。每次成功護住個波，都可以將比賽留喺曼聯半場，繼續製造犯規同死球。

曼聯要斬斷呢條供應線，責任自然落喺中堅身上。

麥佳亞今場整體唔算有大問題。撇除一次角球突然攬實自己隊友，唔知係想Mark人定驚佢走失之外，大部分時間佢至少企喺正確位置，知道幾時留後、幾時替隊友補位。

真正問題係身邊嘅天堂仔。

曼聯更多由麥佳亞留後，天堂仔就負責離開防線迎擊McBurnie。呢個角色唔只需要速度，仲要判斷落點同出擊時機，再靠對抗喺對手未企穩之前破壞攻勢。

天堂仔有波時並唔差。全場68次傳球成功62次，成功率91%，亦交出8次Line-breaking傳球；地面對抗贏3/5，亦無被對手直接盤過。

但侯城根本無打算同佢鬥傳控。

McBurnie直接捉住佢最未成熟嗰範。天堂仔六次空中對抗只贏兩次，成功率得33%；九十分鐘亦只有一次解圍，整體Defensive Contributions得兩次。

對一個負責率先迎擊對方支點嘅中堅而言，第一點頂唔贏，成套分工就會由最前面開始失效。麥佳亞、兩閘同中場被迫向後保護第二點，侯城亦可以繼續將曼聯拖入自己最有優勢嘅肉搏。

我唔係要將兩個失球全部怪落天堂仔頭上。真正暴露出嚟嘅，係曼聯中堅組合嘅質素缺口：除咗麥佳亞，卡域克暫時無一個既有位置感、又能夠主動出擊壓制支點嘅成熟中堅。結果最講經驗同對抗嘅工作，只能交俾一個仍然交緊學費嘅年輕人。

侯城成晚重複問同一條問題：第一點，邊個頂？

曼聯答唔出。

死因二：古夏拉走嘅唔係中堅，而係自己人

由於錫斯高狀態未足以正選，卡域克選擇用古夏踢False 9。諗法好直接：古夏墮後拉走中堅，再由麥保姆同杜古斜插身後；山度士同泰利文斯就負責向前送波，攻擊防線移動後留下嘅空間。

問題係侯城根本唔需要跟住古夏走。

古夏離開最前線，三個中堅仍然留喺禁區附近，由中場負責迎擊。麥保姆同杜古同樣習慣內切，當侯城中場收窄保護中央，三個攻擊手只係一齊逼入對手人數最多嘅區域。

曼聯前場睇落有人走位，實際無人真正改變侯城防線。

呢個亦令山度士同泰利文斯睇落只識喺後面橫傳。特別係山度士，今場好容易因為全隊輸對抗而被一併拉去祭旗，但佢67分鐘內56次傳球成功52次，交出8次Line-breaking傳球，地面同空中對抗合共贏5/7，而且一次都無被搶甩。

佢未去到控制中場，但至少完成咗將個波送過第一條線嘅工作。

問題係破完第一條線，下一站去邊？

古夏收得太後，鋒線無固定支點；麥保姆同杜古切入中路，又無成功打開Half-space。曼聯可以將個波送到侯城禁區外圍，只係每次準備進入最危險嗰一格，前面都無人背身接應，將攻勢帶入下一階段。

卡域克半場換入拉舒福特，希望重新拉闊防線。拉舒福特可以喺邊線接波、嘗試一對一，亦識得攻擊身後，但曼聯仍然無法利用佢製造嘅闊度，打開翼衛同中堅之間嘅Half-space。

古夏原本想用流動拉走對手，最後拉走嘅只有曼聯自己嘅威脅。

死因三：有咗中鋒，但戰術只剩傳中

換入錫斯高，至少令曼聯禁區有返一個正中鋒。既然侯城已經收成Low Block，利用兩邊闊度傳中，本身亦係合理選擇。

問題係曼聯將成副身家全部押咗落去。

拉舒福特喺左邊搵唔到入中路嘅路，就回傳俾梳爾；右邊情況亦一樣。曼聯一次又一次將侯城防線拉向邊線，卻無人利用中堅同翼衛之間短暫出現嘅空間。

最後一步永遠係斬。

曼聯全場送出34次Open-play傳中，係球隊接近八年來英超單場最多。唔知情嘅話，我仲以為莫耶斯完成二周目回歸，準備喺場邊接受掌聲。

傳中多本身唔等於有問題。禁區有錫斯高，後來連麥佳亞都推埋上去，高空轟炸至少有一個清晰目標。只係侯城由開波已經排三個中堅，亦早就做好功課應付傳中。

曼聯全場39次傳中只成功9次；侯城就完成53次解圍，其中30次集中喺下半場。Ajayi同Mendy去到64分鐘一齊傷出，後備入場嘅McNair同Herrington仍然企穩位置，無俾曼聯喺混亂中搶到缺口。

侯城守到好似踢緊歐聯決賽咁款。每次個波移向邊路，成條防線就一齊橫移；有人出迎，後面就有人補位。曼聯只能重複同一條問題，期待侯城其中一次答錯。

數據睇落攻勢唔少。曼聯下半場13次射門，卻只有3次中目標、1次Big Chance，另外5次未穿過人群就被封走。累積1.10 xG，真正飛向龍門嘅威脅就只有0.31 xGOT。

最諷刺嘅係，全場最黃金嘅機會並唔係來自傳中。

第78分鐘，古夏喺中央送出直線，麥保姆走入防線身後形成單刀，先真正逼到Tzolakis作出重要撲救。幾十次傳中做唔到嘅事，一腳從中路劏入去就做到。

呢次進攻證明侯城並非完全無法被打穿，只係曼聯無能力持續製造同類局面。當無鋒方案失效，卡域克嘅後備方案只係放入一個高大中鋒，再叫全隊將個波送去佢頭頂。

換人改變咗禁區入面係邊個，無改變曼聯點樣進入禁區。

侯城唔單止知道點樣殺死曼聯，仲一早知道曼聯臨死前會點樣求生。

總結：今次係曼聯，下次可能輪到車仔

曼聯有新球員需要磨合，錫斯高亦未夠狀態正選，一場開鑼戰當然不足以判卡域克死刑。至少佢哋無再好似對AC米蘭咁，戰線一推高就任由對手反擊劏開。

但侯城今場贏得合理。佢哋無需要同曼聯鬥控球、鬥身價，只係將有限嘅武器用到最盡，再將對手嘅選擇減到只剩一條。

作為車迷，其實亦無資格笑得太大聲。

車仔之後一樣要面對侯城，亦一定會遇到五後衛、Low Block，同九十分鐘唔介意無控球嘅對手。到時控球率幾高、傳咗幾多腳、將對手壓得幾後，都唔會自動換成三分。

我只希望當第一套方案失效，沙比手上仲有第二條、第三條路，而唔係換入一個高佬，再叫全隊開始斬。Low Block最可怕嘅地方，從來唔係完全無缺口，而係令人愈踢愈心急，最後主動放棄尋找缺口。

今日攤喺驗屍床上面嘅係曼聯。至於車仔會唔會有一日瞓上同一張床，就要睇沙比仲有無收埋其他秘笈。