【賽前明燈】英超富咸對車路士　兩位皇馬前任倫敦交手

前情提要：上次輸1：2，但嗰場已經唔可以作準

最近一次作客富咸，就係今年1月7日嘅英超。結果大家可能仲有少少印象，車仔最終1：2輸波，但當時嘅環境相當騎呢：那個男人啱啱離任，羅生雖然已經落實接手，但全場只係坐喺觀眾席睇波，實際領軍嘅係U21教練麥法蘭，正選陣容亦一口氣換咗六個人。

車仔開局其實唔算差，安素兩次角球都差啲製造入球，但去到22分鐘，Leno直接一腳長傳踢過半場，古古同Harry Wilson鬥跑期間古古被判DOGSO，直接紅牌返更衣室沖涼。

下半場Raúl Jiménez頭槌幫富咸領先，戴納靠角球混戰追成1：1，可惜去到81分鐘，Harry Wilson禁區頂射門省中占士改變方向入網，車仔最終輸1：2。輸波當然係輸波，但由臨時教練、六個輪換，再加超過65分鐘踢少一人，用呢場波預測今次兩隊會點踢，參考價值實在有限。

殺死車仔嗰兩個人走晒，富咸連個腦都換埋

更有趣嘅係，上次幫富咸入波嘅Raúl Jiménez同Harry Wilson，今夏已經一齊離隊。Jiménez重返狼隊，Wilson就轉投列斯聯。後者上季仲係富咸聯賽神射手，換句話講，八個月前親手殺死車仔嘅兩個人，今次連人都唔喺度。

連同佢哋一齊消失嘅，仲有帶咗富咸五年嘅馬高施華。上季佢哋係英超平均年齡最高嘅球隊，靠一班老江湖將隊波長期維持喺中游；今夏馬高施華轉教賓菲加，富咸就搵咗艾比路亞接手，順便將收購方向都扭轉埋。

艾比路亞上任後，第一時間由皇馬帶咗Gonzalo García同César Palacios過嚟。兩個都係佢由青年軍一路教上去嘅親生仔，今次一個預計接手中鋒，一個就爭取前場正選。富咸今夏究竟係成功換血，定係將英超當皇馬青年軍夏令營，第一場當然答唔到；至少可以肯定，車仔今次面對嘅已經唔係上次嗰隊富咸。

兩邊閘都前推，全攻型足球？

由季前幾場波睇，艾比路亞改造富咸最明顯嘅一個位，就係將兩隻閘直接推上前線。對Farense一場就係最好例子，左閘Robinson傳中，去到禁區接應嘅竟然係另一邊嘅Sessegnon。兩隻閘唔止負責拉闊，直頭當自己係翼鋒咁踢。

偏偏沙比季前做緊嘅嘢亦差唔多。車仔轉踢3-4-3，兩名翼衛同樣壓到好前，祖奧柏度就回後接波，等彭馬同羅渣士由佢身後殺入禁區。對皇蘇一場，呢套走位進攻上係幾好睇，但帕利斯查一上咗去，左路就明顯有太多空位。

所以今場未必係車仔控住個波、富咸縮後等反擊咁簡單。兩邊都想將閘位放出去殺人，分別只係邊隊攻得快啲，同埋邊個出完招之後回得切防。如果其中一邊前場失去控球，條邊隨時由進攻通道變成死穴。

賽前明燈：先交兩個答案

講返呢個新系列嘅文………我諗唔少人睇過我上年寫嘅睇波G點文章，由於講咩錯咩，我都覺得邪。所以今季直頭轉下玩法，每場波之前，我會揀兩樣自己認為會發生嘅事，白紙黑字寫低，完場再喺戰術覆盤嘅Facebook Post公開對數。估中就當自己好彩，估錯就證明真係有燈力，去到季尾再睇下我究竟係戰術分析員，定只係一盞識得睇數據嘅神燈。

今場對富咸，我自己就認為…………

💡明燈一：車仔至少有一個死球入球

上季兩次對富咸，車仔合共入咗三球：祖奧柏度接應角球頂入、安素射入十二碼，再加戴納喺角球混戰執雞。即係兩場波踢足180分鐘，我哋無一次靠正常生波直接拆開富咸，反而每次都係死球救命。

今次富咸正選中堅Joachim Andersen停賽，Issa Diop亦已經離隊，預計要由Cuenca拍Bassey。加上車仔仲有新死球教練上任，與其相信沙比套3-4-3第一日開工就運作暢順，我寧願相信角球開入去，禁區入面亂到七彩，再由唔知邊個伸隻腳執雞。

所以第一盞，我估車仔至少有一個入球來自角球、自由球、十二碼或者死球之後嘅二次攻勢。

💡明燈二：車仔入波嘅會係祖奧柏度以外嘅人

祖奧柏度季前入咗七球，最後一場對皇蘇又梅開二度，正常人今場當然會繼續買佢。之但係，既然全世界都知車仔而家最識入波係佢，我係富咸都會將防守注意力放喺佢身上。

何況沙比套進攻唔係要祖奧柏度一個人企喺禁區等餵波，而係要佢間中回後，替彭馬、羅渣士同兩邊翼衛開路。再加上我前面已經燈咗會有死球入球，中堅、安素以至其他執雞人士都有機會搶走個名。

所以第二盞唔係估祖奧柏度食白果，而係車仔至少會有一名祖奧柏度以外嘅入球者。當然，如果最後成場0：0，咁新系列第一日開張就可以一次過燒兩盞，效率極高。

上季同分、兩邊換帥，仲有兩個皇馬舊人第一場英超就正面對碰，今場本身已經夠多變數。我兩個答案就擺咗喺度：車仔會靠死球入波，而且至少一名入球者唔會係祖奧柏度。星期二凌晨3點，睇下沙比同艾比路亞邊個份功課先合格，順便睇下我新系列第一日開張會唔會即刻着燈。