（會員限定）【課金透視】富咸2：3車路士　下半場係收油定根本搞唔掂？

車路士49分鐘領先3：1，之後踢得難睇，最方便嘅解釋一定係話車仔收油。

聯賽第一場、作客、領先兩球，班波又未完全上力，無理由仲要由頭迫到落尾。減慢節奏、降低風險、將三分袋返屋企，聽落完全合理。唔通領先兩球仲要谷上去搏俾人反擊咩。

問題係，小弟睇波嗰陣完全無覺得車路士係「有意圖地收油」。

真正嘅Game Management，應該係自己決定幾時慢、幾時搶、幾時將個波送返上前場透氣。今場下半場嘅車路士，反而似部車已經踩極都上唔到斜。前場接唔到波、中場守唔住第二點，個波解圍完轉個頭又返嚟。最終保得住3：2，唔代表過程真係喺掌握之中。

所以上一篇戰術覆盤，我先會話車路士「戰術平手，贏在棋子質素」。靠上半場建立優勢，再靠前場三叉戟嘅處理能力拉開比分；至於換邊後逐步交出主導權，就當係新體系未成熟，兼且富咸臨場針對做得好。

今次課金DATA出齊，第一件事當然係睇下自己有無屌錯人。結果係，一半無錯；另一半，可能仲判輕咗富咸。