【戰術覆盤】英超 富咸2：3車路士　慶幸季初遇上呢隊富咸

比賽簡述

車路士開賽31秒已經領先，拿確斯頂走富咸長傳，彭馬第一時間直線傳俾祖奧柏度，後者冷靜笠過Leno先開紀錄。不過富咸慢慢搶回主導權，23分鐘由京治與Castagne配合後射入追平。

捱過一輪反壓後，車路士41分鐘再次領先。彭馬轉身擺脫對手，再送拿確斯殺入禁區，後者扭過守衛回傳，羅渣士射入加盟後第一球。換邊後不久，祖奧柏度接應山齊士長傳，背身護球再等待彭馬後上窄角度射入，49分鐘拉開至3：1。

但兩球優勢只維持五分鐘。車路士再次被長傳打穿，山齊士將Castagne嘅射門撲返危險區域，Gonzalo García近門頂入。富咸之後繼續向艾殊邦一側施壓，Robinson亦曾越過佢形成笠射機會。車路士幾次調動陣式同人腳，最終有驚無險守住3：2。

三叉戟各入一球，唔等於進攻已成形

沙比第一場擺出羅渣士、彭馬同祖奧柏度，三人距離比預期緊密。祖奧柏度負責拉扯中堅，羅渣士靠身位護球兼向前推進，彭馬就喺兩人之間自由搵位。至少唔再係三個前鋒各自企一忽，拎到波先臨場諗下一步。

第一球正好展示呢種連結。拿確斯頂走長傳一刻，彭馬接波前已經望清楚祖奧柏度嘅走位，唔需要多控一腳就將個波送入防線身後。不過呢球更似打咗富咸一個措手不及，當對方企穩防線，車路士嘅選擇仍然唔多。古斯圖進攻時收得較深，右路無人長期拉闊，三叉戟一齊收窄後，對手亦可以集中防守中路。

第二球最有趣嘅唔止係彭馬轉身擺脫，而係踢緊三中堅中央嘅拿確斯，點解會突然出現喺禁區咁深嘅位置。佢接應、扭過守衛再倒三角回傳都處理得非常出色，只係現階段仍然難以判斷，呢次前插係沙比預設嘅輪轉，定一次成功嘅臨場判斷。

第三球又由山齊士長傳開始，祖奧柏度背身頂住對手，再等彭馬後上。三個入波分別來自突襲、中堅突然前插同直接長傳，共通點都係前場球員靠個人判斷，將未完整成形嘅攻勢加工成入球。

三叉戟確實有火花，但暫時更似三個人識得自己搵食，未足以證明沙比嘅陣地進攻已經成形。

中場有攔截動作，但無掃蕩範圍

如果三叉戟係今場最令人期待嘅位置，占士加拉維亞組成嘅雙中場，就係成套戰術最明顯嘅缺口。

呢度唔係要將拉維亞單獨推出嚟祭旗。佢有落腳、有回收，傳送亦相當穩定；占士更加跑足全場，唔存在唔肯防守嘅問題。真正缺少嘅係卡些度嗰種大範圍掃蕩能力。當前場第一輪壓迫失敗，中間就會突然出現一大片無人負責嘅空間。

車路士前場會互相配合，迫使富咸向指定方向出波；但對手一旦交到第二、第三腳，中場就好容易被直接越過。占士加拉維亞趕到埋身時可以落腳，卻無法迅速橫移封鎖另一側，結果三中堅不停要向前處理第一點，身前嘅第二點就無人控制。

區域防守亦因此變得相當尷尬。後衛明明已經頂走或者截到第一下，個波落地時附近卻有兩三個富咸球員包圍。車路士就算解圍成功都搶唔返控球權，對手執返第二點就可以直接開始下一輪攻勢。

京治嘅入球就係交接問題最清楚嘅例子。富咸由右路配合入禁區，最後竟然係拉維亞跟住京治去到禁區右側，高維爾未能及時接管。三後衛理論上有人數優勢，實際上京治仍然可以喺防線與中場之間完成接應。

呢球當然先要屌鳩山齊士。佢似乎預判京治會傳中，重心提早移向遠柱，結果近柱無守好。一腳威脅唔大嘅射門就咁穿過佢入網。防守交接製造危機，山齊士就負責將危機升級成失球，兩邊都有責任。

更麻煩嘅係，雙中場進攻時亦未能穩定將個波送入前線。三叉戟既要負責壓迫，搶返球權後又要自己推進、自己創造。無咗卡些度，車路士少嘅唔只係一個防中，而係唯一可以同時掃蕩、補位、控制第二點，再將個波送返向前嘅人。占士同拉維亞各自有功能，但擺埋一齊，偏偏連一個卡些度都不如。

轉成類四後衛，富咸就追住邦仔打

下半場開始後，車路士嘅企位已經明顯改變。進攻階段艾殊邦由右中堅移到右閘，高維爾同拿確斯組成雙中堅，哈圖留喺左閘，古斯圖就推高到右翼。沙比似乎喺未換人之前，已經由3-4-3靜靜轉成4-2-3-1。

呢個調動唔難理解。上半場三叉戟企得太窄，古斯圖又收得較深，右路欠缺拉闊點。將佢推前可以增加進攻選擇，亦可以俾邦仔由邊路帶波向前。之後安素換走有黃牌在身嘅拉維亞、查華利亞接替哈圖，再由尼圖直接取代古斯圖，亦反映沙比係先完成轉陣，再逐個換入更適合新位置嘅球員。

問題係艾比路亞亦立即睇中車路士右路。

邦仔突然由三中堅右側變成四後衛右閘，身後空間同防守角度都完全唔同。富咸刻意將人堆向呢一側，利用邊線球員、後上中場同前鋒輪流拉扯。54分鐘第二個失球源自長傳打入防線身後；78分鐘Robinson喺邦仔身前接應長傳，差少少笠入空門；85分鐘再輪到Sessegnon突破佢起腳。

對位球員不停轉，但攻擊位置始終無變。

呢個問題唔應該全部入邦仔數。古斯圖推高後未必次次回得切，中場橫移保護亦繼續不足。當富咸形成Overload，邦仔面對嘅唔係公平嘅一對一，而係要同時睇住兩條走線。中場作為保護防線嘅第一層，唔應該任由對手反覆攻擊同一個弱側。

數據覆盤：入禁區多咗，威脅反而少咗

只睇全場數據，車路士算係合理地贏波。射門17比12、禁區內射門12比7、Big Chances 4比2，xG亦以1.67比1.28領先。

不過拆開上下半場，形勢就完全唔同。上半場車路士射門13比7、Big Chances 3比0，xG以1.46比0.44領先；下半場卻只得4次射門同0.21 xG，富咸反而交出兩次Big Chances同0.84 xG。

最有趣嘅係，車路士下半場有19次禁區觸球，比上半場嘅18次更多，富咸就只得8次。即係車路士唔係入唔到禁區，而係入到去都做唔成威脅；富咸每次突破防線，反而更接近直接埋門。

傳送數字亦反映控制權喺邊。富咸全場完成521次傳送，車路士只有315次；只計對方半場，富咸仍然以254比190領先。車路士唔係靠控球壓住對手，而係靠直接進攻同前場質素製造機會。

三叉戟合計創造10次機會、完成9次成功扭波。當中彭馬有5次成功扭波，羅渣士三次起步全部成功。相反，占士加拉維亞合計只得4次傳送進入Final Third。拉維亞22次傳送成功21次，95%成功率睇落好靚，但真正送入進攻三區嘅只有一次，正好解釋點解佢無乜傳失，前場三個卻仍然要自己搵食。

兩隊跑動距離幾乎一樣，車路士121.45公里，富咸121.42公里；衝刺次數亦只係127比128。問題唔係車路士跑少咗，而係跑去邊，同跑到之後有無形成有效封鎖。

最後係兩個龍門。富咸全場xGOT為1.44，最終入兩球；車路士xGOT只有1.22，卻射入三球。兩邊門將都失得比射門模型預期更多，只係山齊士兩次處理太肉酸，先至特別搶鏡。

數據唔係話車路士唔值贏，而係證明上半場建立嘅優勢，到下半場已經逐步交返出去。最終可以全取三分，靠嘅係前場把握力比富咸成熟，而唔係整套戰術由頭到尾運作順暢。

總結：戰術平手，贏在棋子質素

撇除車迷睇到個心離一離之外，今場其實係一場相當好睇嘅戰術交手。

沙比上半場用緊密三叉戟同高位壓迫製造機會，下半場再轉成類四後衛增加闊度；艾比路亞就因應車路士企位調整，先越過占士拉維亞嘅中場，再集中Overload艾殊邦一側。車路士每改一步，富咸幾乎都即刻搵到新嘅攻擊入口。

單論部署同臨場針對，富咸絕對值得讚。佢哋有意識地利用第二點、區域交接同邊路人數優勢，只係球員之間仲差少少默契，幾次拆開車路士防線後，最後一傳同埋門都未夠狠。

車路士最終贏波唔係完全唔值，但亦帶住幾分運氣。兩個領隊喺棋盤上有來有往，最後車路士手上嗰幾隻棋子比較貴，亦有更多靈光一閃，硬係幫球隊拎走三分。

至於呢隊車路士，安素同卡些度今季仲未一齊正選過，陣容始終未完整。唔奢望佢哋第一年就衝擊英超，但至少唔好俾阿仙奴一隊獨大。一步一腳印，期待下場主場對白禮頓。